ၸုမ်းပၢႆးမွၼ်းတႆးတင်း ၸုမ်းတူင်ႇဝူင်းတႆး တႃႈၶီႈလဵၵ်း – မႄႈသၢႆ လႅၼ်လိၼ်တႆး – ထႆး ႁူမ်ႈၵၼ်ႁႃ ငိုၼ်းၵွင်ၵၢင် တႃႇ ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ မွၵ်ႈငိုၼ်းထႆး 2 သႅၼ်ဝၢတ်ႇ။
တႄႇဢဝ် ဝၼ်းတီႈ 19-21/07/2024 ၶၢဝ်းတၢင်း 3 ဝၼ်းမႃးၼႆႉ ယူႇတီႈ ၸုမ်းပၢႆးမွၼ်းတႆး Tai Artists Group လႄႈ မုၵ်ႉၸုမ်းၸၢဝ်းၶိူဝ်းတႆး ၽွမ်ႉႁူမ်ႈၵတ်းယဵၼ် ႁူမ်ႈၵၼ်သေ ႁႃငိုၼ်းၵွင်ၵၢင် တီႈႁိမ်းလူတ်ႊတတ်ႊ (Lotus) ဝဵင်းမႄႈသၢႆ ၸႄႈတွၼ်ႈၵဵင်းႁၢႆး ၸိုင်ႈထႆး တႃႇၸွႆႈထႅမ်ၵူၼ်းပၢႆႈၽေးသိုၵ်း ၼႆယဝ်ႉ။
ၽူႈတူင်ႉၼိုင်ႈ ၼႂ်းမုၵ်ႉၸုမ်းၸၢဝ်းၶိူဝ်းတႆး ၽွမ်ႉႁူမ်ႈၵတ်းယဵၼ် လၢတ်ႈတီႈၽူႈတွႆႇႁွၵ်ႈဝႃႈ -“ႁဝ်းၶႃႈ 2 ၸုမ်းႁူမ်ႈၵၼ်သေ ႁပ်ႉလူႇၶၢမ်ႇငိုၼ်း တႃႇၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆးၶႃႈဢေႃႈ။ ႁဝ်းၶႃႈ မႃးၸတ်းပၢင်လူႇၶၢမ်ႇ တီႈႁိမ်း ၶၢင်လူတ်ႊတတ်ႊ Lotus မႄႈသၢႆၼႆႉသေ ယွၼ်ႉဝႃႈ ဢွင်ႈတီႈၼၼ်ႉ သမ်ႉ ၵူၼ်းတႃႈၶီႈလဵၵ်း – မႄႈသၢႆ ၵႆႉမႃးဢႅဝ်ႇယဵမ်ႈၼမ်လႄႈ တႃႇတေပဵၼ်မႃးပၢင်လူႇၶၢမ်ႇၼႆႉ ပီႈၸၢႆး တုၺ်ႈ မိဝ်းသိၵ်ႉတႆး ဢွၼ်ၼမ်းၸတ်းၶႃႈဢေႃႈ”- ဝႃႈၼႆ။
ၼႂ်းၶၢဝ်းတၢင်း 3 ဝၼ်းၼႆႉ မီးၵူၼ်းတီႈၸမ်ၵႆ ၸိူဝ်းမႃးဢႅဝ်ႇလႄႈ ၼႂ်းဝဵင်းမႄႈသၢႆလႄႈ ၸိူဝ်းမႃးလႄႇ လူတ်ႊတတ်ႊၶဝ် ႁူမ်ႈၵၼ်ၵမ်ႉၸွႆႈ ၼႂ်းဝၼ်းႁႅၵ်ႈ ဝၼ်းတီႈ 19 ၼၼ်ႉ လႆႈႁပ်ႉငိုၼ်းၵမ်ႉၸွႆႈ 21,420 ဝၢတ်ႇ၊ ဝၼ်းထူၼ်ႈသွင် ဝၼ်းတီႈ 20 သမ်ႉ လႆႈႁပ်ႉငိုၼ်းၵမ်ႉၸွႆႈ 31,650 ဝၢတ်ႇလႄႈ ဝၼ်းလိုၼ်းသုတ်း ဝၼ်းတီႈ 21 သမ်ႉ လႆႈႁပ်ႉငိုၼ်းၵမ်ႉၸွႆႈ 126,950 ဝၢတ်ႇ။ ၵမ်ႈၼမ် ပဵၼ်ပီႈၼွင်ႉၵူၼ်းမိူင်းၼႂ်း တႃႈၶီႈလဵၵ်းလႄႈ မႄႈသၢႆ မႃးၵမ်ႉၸွႆႈ ၼႆယဝ်ႉ။
“မိူဝ်ႈတႄႇမၼ်း ဢၢင်ႈလူႇၶၢမ်ႇပႃး တႃႇငိုၼ်းၸတ်းပၢင်သွမ်း ပၼ်မေႃႁွင်ႉၵႂၢမ်း ၸၢႆးသၢႆမၢဝ်းယူႇ။ ၵူၺ်းၵႃႈ ၶိုၼ်းမႄး ဢုပ်ႇဢူဝ်းငူပ်ႉငီႉၵၼ်ထႅင်ႈၵမ်းၼိုင်ႈသေ တူၵ်းလူင်းၵၼ်ဝႃႈ ၸုမ်းပၢႆးမွၼ်းၶဝ် တေၶပ်းၶိုင် ၵႂႃႇႁင်းၵူၺ်းဢဝ် တေဢမ်ႇဢဝ်ငိုၼ်းတီႈၼႆႈယဝ်ႉ။ ငိုၼ်းဢၼ်ၵဵပ်းၸိူဝ်းၼႆႉတႄႉ တႃႇၸွႆႈထႅမ် ၵူၼ်းပၢႆႈၽေးၵူၺ်းၶႃႈ”- ၽူႈၶဝ်ႈၸုမ်း ၼႂ်းမုၵ်ႉၸုမ်းၸၢဝ်းၶိူဝ်းတႆး ၽွမ်ႉႁူမ်ႈၵတ်းယဵၼ်လၢတ်ႈ။
ၽူႈႁွင်ႉၽဵင်းၵႂၢမ်းတႆး ဢၼ်မႃးၶဝ်ႈႁူမ်ႈ တူင်ႉၼိုင် ႁႃငိုၼ်းၵွင်ၵၢင်ၸွႆႈသမ်ႉ မိူၼ်ၼင်ႇ – ၸၢႆးႁၢၼ်လႅင်း၊ ၼၢင်းသႅင် ဢွၼ်ႇ၊ ၼၢင်းလၢဝ်လၢဝ်၊ ၸၢႆးၸွမ်လိူၼ်၊ ၼၢင်းၶဵမ်ၶမ်း၊ ၸၢႆးၼေႃႇၾႃႉ၊ ၸၢႆးသၢႆလိူၼ်လႄႈ ဢိၵ်ႇထႅင်ႈလၢႆၵေႃႉ ၼႆယဝ်ႉ။
ပူၼ်ႉမႃး မိူဝ်ႈဝၼ်းတီႈ 03/07/2024 ၼၼ်ႉၵေႃႈ ယူႇတီႈ ၸုမ်းပၢႆးမွၼ်းတႆး ဢိၵ်ႇပႃး ပီႈၼွင်ႉတီႈၸမ်ၵႆ ၸွႆႈထႅမ် ၵူၼ်းပၢႆႈၽေးသိုၵ်း တီႈဝတ်ႉၶူဝ်တႅၼ်ႈ၊ ဝတ်ႉၼမ်ႉပႅၼ်ႈ၊ ဝတ်ႉပၢင်ႇလေႃႉ၊ ဝတ်ႉၼႃးသွင်း၊ ဝတ်ႉၶူဝ်မုင်း၊ ဝတ်ႉၸွႆးၵုင်း၊ ဝတ်ႉၼွင်ပိင်ဢွၼ်ႇလႄႈ ဝတ်ႉပွၵ်ႉဢၢင်းလူင် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မႃးယဝ်ႉ ၵမ်းၼိုင်ႈ။
လိူဝ်ၼၼ်ႉ ၽွင်းၶဝ်ႈဝႃႇသႃၼႆႉ ယူႇတီႈၸုမ်းတူင်ႉၼိုင်တူင်ႇဝူင်းတႆး ၼႂ်းၵဵင်းမႂ်ႇ – လမ်းပုၼ်းလႄႈ ၵုင်းထဵပ်ႈ ၸိူဝ်း ၼၼ်ႉၵေႃႈ လူင်းပိုၼ်ႉတီႈ ႁႃငိုၼ်းၵွင်ၵၢင် တႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းၸိုင်ႈ တႆးပွတ်းႁွင်ႇ မိူၼ်ၼင်ႇ ဝႃႈ ၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ