ၸုမ်းပၢႆးမွၼ်းတႆး (Shan Artists Group) ႁူမ်ႈၵၼ်သေ ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵျွၵ်ႉမႄး တႃႇငိုၼ်းမၢၼ်ႈ 30 သႅၼ်ပျႃး။
ဝၼ်းတီႈ 03/07/2024 ပူၼ်ႉမႃးၼႆႉ ယူႇတီႈ ၸုမ်းပၢႆးမွၼ်းတႆး ဢိၵ်ႇပႃး ပီႈၼွင်ႉတီႈၸမ်ၵႆ ၸွႆႈထႅမ် ၵူၼ်းပၢႆႈၽေးသိုၵ်း တီႈဝတ်ႉၶူဝ်တႅၼ်ႈ၊ ဝတ်ႉၼမ်ႉပႅၼ်ႈ၊ ဝတ်ႉပၢင်ႇလေႃႉ၊ ဝတ်ႉၼႃးသွင်း၊ ဝတ်ႉၶူဝ်မုင်း၊ ဝတ်ႉၸွႆးၵုင်း၊ ဝတ်ႉၼွင်ပိင် ဢွၼ်ႇလႄႈ ဝတ်ႉပွၵ်ႉဢၢင်းလူင် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။
ၼၢင်းမူဝ်ၶၢဝ်ၼူၼ်း ၽူႈတၢင်တူဝ် ၸုမ်းပၢႆးမွၼ်းတႆး တီႈဝဵင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ယူႇတီႈ ႁဝ်း ၶႃႈၸုမ်းပၢႆးမွၼ်းတႆးသေ လႆႈလူႇၶၢမ်ႇငိုၼ်း တႃႇၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆးပွတ်းႁွင်ႇ တင်းမူတ်း လႆႈၵမ်ႉၸွႆႈၵႂႃႇ 30 သႅၼ်ပျႃး။ ယူႇတီႈ ၸၢႆးႁၵ်ႉၶိူဝ်းႁၢၼ်ႁဝ်းၶႃႈသေ ၸွႆႈတိတ်းတေႃႇ ၶပ်ႉၶိုင်ပၼ်ၵႂႃႇလီငၢမ်းယဝ်ႉၶႃႈ။ ယၢမ်းလဵဝ်ၵေႃႈ ယူႇတီႈ ၸုမ်းပၢႆးမွၼ်းႁဝ်းၶႃႈသေ တိုၵ်ႉႁပ်ႉငိုၼ်း လူႇထႅင်ႈယူႇၶႃႈ”- ဝႃႈၼႆ။
တႄႇဢဝ် ဝၼ်းတီႈ 25/06/2024 ၼၼ်ႉမႃး ၵူၼ်းဝဵင်းၵျွၵ်ႉမႄး ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈဝႆႉ တီႈဝတ်ႉဝႃးၽႃသိူဝ်ႇ ႁူဝ်ၵူၼ်းမွၵ်ႈ 16,000 ၵေႃႉယဝ်ႉ။ ယၢမ်းလဵဝ် လူဝ်ႇတၢင်းၸွႆႈထႅမ်ႁႅင်း ၶဝ်ႈၼမ်ႉတၢင်းၵိၼ် ၼႆယဝ်ႉ။
ဢိင်ၼိူဝ် လွင်ႈၼႆႉ ယူႇတီႈ တပ်ႉသိုၵ်းတဢၢင်း TNLA ႁႅၼ်းသိုၵ်းလေႃႇတိုၵ်ႉ တပ်ႉသိုၵ်းမၢၼ်ႈ ယိုတ်းမိူင်း မႃးႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄးသေ ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင်၊ ၶိူင်ႈမိၼ် ပွႆႇမၢၵ်ႇၸွႆႈလႄႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 50 ပၢႆယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ