ၸုမ်းပၢႆးမွၼ်းတႆး ၼႂ်းမိူင်းထႆး ႁူမ်ႈၵၼ် ၸွႆႈၵႃႈယူတ်းယႃ ၸၢႆးလၢဝ်သႂ်

ၸုမ်းပၢႆးမွၼ်းတႆး ၼႂ်းမိူင်းထႆး ႁူမ်ႈၵၼ်သေ ၸွႆႈၵႃႈယူတ်းယႃ ၸၢႆးလၢဝ်သႂ် ဢၼ်ပဵၼ် ၸဝ်ႈပၢႆးမွၼ်းတႆး ၵိုၵ်းပိုၼ်း ၸိုဝ်ႈ သဵင်ယႂ်ႇ တႃႇငိုၼ်းမၢၼ်ႈ 20 သႅၼ်ပျႃး။

ၵၢင်လိူၼ်ၵျုႊလၢႆႊ 2023 ၼႆႉ ၸုမ်းတူင်ႉၼိုင်တူင်ႇဝူင်းတႆးလႄႈ ၸုမ်းပၢႆးမွၼ်းတႆး ၼႂ်းမိူင်းထႆး ႁူမ်ႈငိုၼ်းၵၼ်သေ ၸွႆႈထႅမ် တႃႇၵႃႈယူတ်းယႃ ၸၢႆးလၢဝ်သႂ် ၸဝ်ႈပၢႆးမွၼ်းတႆး ယၢမ်းလဵဝ် မၼ်းၸၢႆးပဵၼ်ဝႆႉ တၢင်းပဵၼ် ယဵဝ်ႈဝၢၼ်၊ ပွတ်ႇ ၵႂ်ႈလႄႈ တပ်း ၸိူဝ်းၼႆႉ လႆႈယူတ်းယႃတူဝ်ဝႆႉ တီႈဝဵင်းပၢင်ႇဢူးလူင် (မေႇမဵဝ်ႉ) ။

ၼၢင်းမူဝ်ၶၢဝ်ၼူၼ်း မေႃၵႂၢမ်းတႆး ၸိုဝ်ႈသဵင်ယႂ်ႇ တီႈဝဵင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ၸုမ်းပၢႆးမွၼ်းတႆး တီႈ ၼႆႈ ၵိုင်ႉၵၢင်ႉၼႅတ်ႈႁွင်ႉႁႃၵၼ်သေ ၸွမ်းၼင်ႇႁဝ်းယိုၼ်ႈမိုဝ်းထိုင်လႆႈ ၸင်ႇႁူမ်ႈႁွမ်းငိုၼ်းၵၼ်သေ ၸွႆႈၵမ်ႉထႅမ်ပၼ် ၵႃႈ ယူတ်းယႃ ပီႈလၢဝ်သႂ်ၵႂႃႇ ၶႃႈဢေႃႈ။ ယွၼ်ႉႁဝ်းၶႃႈ ႁိပ်ႈၼႅတ်ႈႁႅင်းၼႃႈလႄႈ တၼ်းၵဵပ်းၵၼ်လႆႈ ငိုၼ်းမၢၼ်ႈ 20 သႅၼ်ပျႃး သေ လႆႈၵမ်ႉၸွႆႈမိူဝ်းပၼ် ပီႈလၢဝ်သႂ်ယဝ်ႉၶႃႈ”- ဝႃႈၼႆ။

ၸုမ်းတူင်ႉဝူင်းတႆးလႄႈ ၸုမ်းပၢႆးမွၼ်းတႆး ၼႂ်းမိူင်းထႆး တီႈလႆႈႁူမ်ႈၵၼ် ၸွႆႈထႅမ်ၵႃႈယူတ်းယႃပၼ် ၸၢႆးလၢဝ်သႂ် ၸဝ်ႈပၢႆး မွၼ်းတႆး ၼႆႉသမ်ႉ မိူၼ်ၼင်ႇ ၸၢႆးတႃႇဢူး (ၸိူင်းလႅဝ်း)၊ ပီႈဢေး၊ ၸၢႆးဢဵၵ်ႇ (Youtuber ) ၊ ၸၢႆးတဵင်းႁၢၼ်ႇ၊ ၸၢႆးၸၢမ်ႇ ထုၼ်း၊ လၢၼ်ႉ M Zone ၵူၼ်းၶိူဝ်းတႆး (ထိူတ်ႉထႆး)၊ လၢၼ်ႉဢမ်းၽၼ်းၵႅဝ်ႈ၊ ၼၢင်းမူဝ်ၶၢဝ်ၼူၼ်း၊ ၼၢင်းမွၵ်ႇမူၺ်လႅင်း၊ ၼၢင်းလၢဝ်ၼုမ်ႇမၢဝ်း၊ ၼွင်ႉၾူၼ်၊ ၼၢင်းၼွင်ႉၼူၼ်း၊ ၸၢႆးသိူဝ်မႂ်ႇ၊ ၸၢႆးဢဵၵ်ႇ (Drum) ၊ ၼၢင်းႁွမ် ၼူၼ်း၊ ၸၢႆးလိူၼ်သႂ်၊ ၸၢႆးဢူး လႄႈ ၸၢႆးဢွၼ်ႇလႅင်း ၸိူဝ်းၼႆႉ။

“ႁႂ်ႈမေႃတႅမ်ႈၵႂၢမ်းႁဝ်းၶႃႈ ပီႈလၢဝ်သႂ် ႁႂ်ႈၸဵဝ်းႁၢႆ ၸဵဝ်းၶႅၼ်းသေဢမ်ႇၵႃး ႁႂ်ႈမႃးပဵၼ်တီႈပိုင်ႈဢိင် ၽူႈၵိူဝ်းၵုမ် ၸဝ်ႈပၢႆးမွၼ်း ႁဝ်းၶႃႈ တင်းသဵင်ႈတင်းၼမ်။ ႁဝ်းၶႃႈ ၸဝ်ႈပၢႆးမွၼ်း တီႈလႂ်သေဢမ်ႇဝႃႈ ဢမ်ႇလူင်လိုမ်းပီႈဢၢႆႈႁဝ်းၶႃႈ ၸၢႆးလၢဝ်သႂ် ယုမ်ႇ ယမ်ဝႃႈ တေမီးထႅင်ႈတင်းၼမ်ယူႇ တေႁူမ်ႈၸွႆႈၵႃႈယူတ်းယႃ ပၼ်ပီႈလၢဝ်သႂ်ႁဝ်းၶႃႈၵႂႃႇထႅင်ႈ”- ၼၢင်းမူဝ် ၶၢဝ်ၼူၼ်း သိုပ်ႇ လၢတ်ႈၼႄၼင်ႇၼႆ။

ၸၢႆးလွမ်ႉဝုၼ်း မေႃၵႂၢမ်းတႆး တႄႇႁွင်ႉၽဵင်းၵႂၢမ်း ႁႃငိုၼ်းၵွင်ၵၢင် ၸွမ်းႁၢၼ်ႉၶဝ်ႈၽၵ်းတႆး တၢင်းမိူင်း ၵွၵ်ႇ (ၵုင်းထဵပ်ႈ)၊ ရယွင်းလႄႈ ၵဵင်းမႂ်ႇ တႄႇဢဝ် ဝၼ်းတီႈ 15 ၼႆႉၵႂႃႇ ငိုၼ်းသူးတီႈလႆႈမႃးၼၼ်ႉ တေဢဝ်ၸွႆႈ ၵႃႈယူတ်းယႃ ပၼ် ၸၢႆးလၢဝ်သႂ် တင်းမူတ်း ၼႆယဝ်ႉ။

ၸၢႆးလၢဝ်သႂ် ၽူႈတႅင်ႇတႅမ်ႈၽဵင်းၵႂၢမ်းတႆးၼႆႉ ပဵၼ်ပီႈဢၢႆႈလူင် မေႃႁွင်ႈၵႂၢမ်း ၸၢႆးသၢႆမၢဝ်း ၸဝ်းပၢႆးမွၼ်း ၵိုၵ်းပိုၼ်း ၸိုဝ်ႈ သဵင်ယႂ်ႇ။ ယၢမ်းလဵဝ် ၸွမ်းၼင်ႇဢႃယုယႂ်ႇယဝ်ႉလႄႈဢမ်ႇယူႇလီတင်းပီႈတင်းၼွင်ႉ။ ၸၢႆးလၢဝ်သႂ် လႆႈလုမ်းလႃး တူဝ်ဝႆႉတီႈ ႁိူၼ်းယေး ဝဵင်းပၢင်ႇဢူးလူင် (မေႇမဵဝ်ႉ) ဝႆႉ မီးၶၢဝ်းတၢင်း လိူၼ်ပၢႆယဝ်ႉ။ ၸၢႆးသၢႆမၢဝ်းတႄႉ လုၵ်ႈလၢင်းမေးၼၢင်းလုမ်းလႃး ယူတ်းယႃတူဝ်ပၼ်မီးဝႆႉတီႈဝဵင်းလူင်တႃႈၵုင်ႈ ၼၼ်ႉၵေႃႈဢမ်ႇယူႇလီ လႆႈမွၵ်ႈ 2 ပီယဝ်ႉ။

ၸၢႆးလၢဝ်သႂ်ၼႆႉ မီးဢႃယု 81 ပီ မၼ်းၸၢႆး ပဵၼ်လုၵ်ႈၸၢႆး လုင်းပႃႉၶႅင်ႇ ပႃႈၼၢင်းဢေးၸဵင်ႇ ပဵၼ်ၵူၼ်းၸႃတိ ဝဵင်းမူႇ ၸေႊ ၸိုင်ႈတႆးပွတ်းႁွင်ႇ။ မီးပီႈ ၼွင်ႉ ႁူမ်ႈတွင်ႉ 6 ၵေႃႉ ၸၢႆးလၢဝ်သႂ်ၼႆႉ ပဵၼ်ပီႈဢၢႆႈလူင် လိူဝ်ၼၼ်ႉ ၸၢႆးလိူၼ်ၶမ်း၊ ၸၢႆးသၢမ်၊ ၸၢႆး သၢႆမၢဝ်း၊ ၸၢႆးလႅင်းသႂ် (မေႃၵႂၢမ်း ၵေႃႉၼိုင်ႈ)လႄႈ ၼၢင်းတဵင်းႁၢၼ်ႇ။ ယၢမ်းလဵဝ် ၵိုတ်းၸၢႆးလၢဝ်သႂ်၊ ၸၢႆးသၢႆမၢဝ်းလႄႈ ၸၢႆးလႅင်းသႂ် 3 ၵေႃႉ ၵူၺ်းယဝ်ႉ။ ၸၢႆးလၢဝ်သႂ်ၼႆႉ ယၢမ်းလဵဝ် မီးဝႆႉ လုၵ်ႈၸၢႆး 3 ၵေႃႉ လႆႈႁူႉၼင်ႇ ၼႆ။