သိုၵ်းၵဝ်ႈၵၢင်ႉ ယိုဝ်းပေႃႈလုၵ်ႈဢွၼ်ႇလဵၵ်ႉ တၢႆၵေႃႉၼိုင်ႈ တီႈမိူင်းယႆ

ၼႂ်းလိူၼ်ၵျူႊလၢႆႊၼႆႉ သိုၵ်းၵဝ်ႈၵၢင်ႉ ပိုၼ်ၽၢဝ်ႇ ၵိုတ်းယိုဝ်း 2 ၵမ်း တႄႇဢဝ်ဝၼ်းတီႈ 14 ထိုင် 18 ၵမ်းၼိုင်ႈ ထိုင်မႃး ဝၼ်းတီႈ 19 ၶိုၼ်းပိုၼ်ၽၢဝ်ႇ ၵိုတ်းတိုၵ်း ၸူဝ်ႈၶၢဝ်း တေႃႇထိုင်လိူၼ်ၵျူႊလၢႆႊ သဵင်ႈထႅင်ႈ ၵမ်းၼိုင်ႈ။ ၵူၺ်းၵႃႈ သိုၵ်းမၢၼ်ႈ သမ်ႉလႃႈလီႈ လၢမ်းလိမ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်း၊ တူၵ်းသႂ်ႇၼႂ်းဝၢၼ်ႈၼႂ်းသူၼ် တိူဝ်ႉၺႃးၵူၼ်းမိူင်းလူႉတၢႆ။ ၵွပ်ႈၼႆ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ် တင်းသိုၵ်းမၢၼ်ႈယူႇ တၢင်းၸႄႈဝဵင်းသီႇပေႃႉ၊ လႃႈသဵဝ်ႈ ၸိူဝ်း ၼႆႉ။   

ယၢမ်းတဵင်ႈၶိုၼ်းၸၢႆႉ 1 မူင်းၶိုင်ႈ မိူဝ်ႈၼႆႉ ဝၼ်းတီႈ 22/07/2024  ၵၢင်ၼႂ်ၸဝ်ႉမိူင်းပႆႇလႅင်း မၢၵ်ႇလူင် သိုၵ်းမၢၼ်ႈ တူၵ်းသႂ်ႇၼႂ်းဝၢၼ်ႈႁူဝ်တိုဝ်ႉ ဢၼ်မီးၾၢႆႇတူၵ်းဝဵင်းမိူင်းယႆ ဢမ်ႇယွမ်း 3 ၵမ်း ၵူၼ်းမိူင်း တူၵ်းၸႂ်သေ ဢွၼ်ၵၼ်ၼႅတ်ႈပၢႆႈ သမ်ႉၵႂႃႇၺႃးသိုၵ်းၵဝ်ႈၵၢင်ႉ MNDAA ဢၼ်ပႂ်ႉတၢင်းၶဝ်ႈ တၢင်း ဢွၵ်ႇဝၢၼ်ႈၼၼ်ႉ ယိုဝ်းၵူၼ်းဝၢၼ်ႈတၢႆ ၵေႃႉၼိုင်ႈ ဝႃႈၼႆ။

တိုၵ်ႉမႅၼ်ႈ ၽွင်းၵူၼ်းမိူင်းၼွၼ်းလပ်းယဵၼ် ဢမ်ႇမီးပၢင်တိုၵ်းသိုၵ်းသိူဝ်သင်သေတႃႉ သိုၵ်းမၢၼ်ႈ တပ်ႉတၢင်းဝဵင်းမိူင်းယႆ ဝၢႆႇပၢၵ်ႇၵွင်ႈလူင် ယိုဝ်းၵႂႃႇတူၵ်းႁိမ်းဢိူင်ႇဝၢၼ်ႈၸွမ်းၶႅပ်ႇဝဵင်း။ ႁဵတ်းႁႂ်ႈၵူၼ်း မိူင်းတိုၼ်ႇသၢၼ်ႈ ႁႃတၢင်းပၢႆႈ။ ၵူၼ်းဝၢၼ်ႈပၢႆႈမီ ၺႃးသိူဝ် ပၢႆႈမၢၵ်ႇလူင်သိုၵ်းမၢၼ်ႈ သမ်ႉၺႃးသိုၵ်း ၵဝ်ႈၵၢင်ႉႁႄႉ၊ ၽွင်းၶဝ် ပေႃႈမႄႈလုၵ်ႈပႆႇတၼ်းၵိုတ်းၼၼ်ႉ သိုၵ်းၵဝ်ႈၵၢင်ႉ ယိုဝ်းသႂ်ႇတိူဝ်ႉၺႃးပေႃႈ ၸဝ်ႈႁိူၼ်း။ ယၢမ်းလဵဝ် ၵိုတ်းဝႆႉမေးၼၢင်းလႄႈ လုၵ်ႈဢွၼ်ႇလဵၵ်ႉ ဢႃယု 4 ၶူပ်ႇ ၵူၼ်းမိူင်းယႆ လၢတ်ႈၼႄဝႆႉၼင်ႇၼႆ –

“ၶဝ်ငိၼ်းသဵင်မၢၵ်ႇသေ ၶဝ်သမ်ႉ ဢၢၼ်းပၢႆႈၶဝ်ႈမိူဝ်းၼႂ်းၵၢင်ဝၢၼ်ႈ ၼႂ်းၵႄႈၵူၼ်းၵိုၼ်းၼၼ်ႉ။ ႁိူၼ်းၶဝ်သမ်ႉ မီးၼွၵ်ႈဝၢၼ်ႈဢိတ်ႉၼိုင်ႈၶႃႈဢေႃႈၼၼ်ႉ။ မိူဝ်ႈၶဝ်လႅၼ်ႈ မိူဝ်းထိုင် တီႈတၢင်းၽႄၶဝ်ႈ ဝၢၼ်ႈၼၼ်ႉ သမ်ႉမီးသိုၵ်းၵဝ်ႈၵၢင်ႉၶဝ် ပႂ်ႉဝႆႉ။ သိုၵ်းၼၼ်ႉတႄႉ ႁၢမ်ႈၶဝ်ယူႇ ဝႃႈယႃႇပေႇႁႂ်ႈၶဝ်ႈဝၢၼ်ႈ ၵႂႃႇၼႆ ၵူၺ်းၵႃႈ တၢင်းလႂ်ၵေႃႈၵူဝ်လႄႈ ဢၢၼ်းၶဝ်ႈဝၢၼ်ႈၵႂႃႇ သိုၵ်းၵဝ်ႈၵၢင်ႉ ဢၼ်ပႂ်ႉတီႈၼၼ်ႈ ၸင်ႇ ယိုဝ်းပႅတ်ႈ ၵေႃႉၼိုင်ႈ။ ပဵၼ်ၵူၼ်းၸၢႆး လုၵ်ႈမေးမၼ်းတႄႉ ဢမ်ႇ ၺႃးယိုဝ်းၼင်ႇၵဝ်ႇ”- ဝႃႈၼႆ။  

ၵူၼ်းၵေႃႉ ဢၼ်ၺႃးသိုၵ်းၵဝ်ႈၵၢင်ႉ MNDAA ယိုဝ်းတၢႆၼႆႉ ၸိုဝ်ႈၸၢႆးလိုၼ်း ဢႃယု 20 ပၢႆ တႄႇၼႃႈႁိူၼ်း မီးလုၵ်ႈယိင်းဢွၼ်ႇ ဢႃယုတိုၵ်ႉမီး 4 ၶူပ်ႇ။ ၵူၼ်းဝၢၼ်ႈႁူမ်ႈၵၼ် လုမ်းလႃးၶၢပ်ႈတူဝ်မၼ်းၸၢႆး သေ သၢင်းၵျူဝ်ႇပၼ် မိူဝ်ႈၼႆႉ။ မုင်ႉႁေႃႁိူၼ်းၼႆႉ ၶဝ်ပဵၼ်ၵူၼ်းႁႃၸဝ်ႉၵိၼ်ၶမ်ႈ ၵိၼ်ၸၢင်ႈၽုၵ်ႇႁႆႈ သွမ်ႈၼႃးသေ ႁႃၵိၼ်ဝၼ်းလႂ်ဝၼ်းၼၼ်ႉ ယၢမ်းလဵဝ်သမ်ႉ ၵေႃႉပဵၼ်ၸဝ်ႈၽူဝ်လူႉသဵင်ႈယဝ်ႉလႄႈ တႃႇၵွၼ်းၼႃႈႁိူၼ်း လဵင်ႉလူလုၵ်ႈလၢင်းတႄႉၵိၼ်းၸႂ်ယဝ်ႉ။ မီးလွင်ႈလူႉလွင်ႈတၢႆ ၸိူင်ႉၼႆၵေႃႈ ဢမ်ႇ မီးသိုၵ်းၸုမ်းလႂ် ဢဝ်ပုၼ်ႈၽွၼ်း သၢႆႈတႅၼ်းသင်ပၼ်ၶိုၼ်း ၵူၼ်းပိုၼ်ႉတီႈလၢတ်ႈ။

ဢိင်ၼိူဝ် ပိူင်ပဵၼ်ၸိူဝ်းၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး တပ်ႉသိုၵ်း MNDAA လႄႈ SSPP ၵေႃႈ ဢမ်ႇလႆႈ။

မၢၵ်ႇလူင် ဢၼ်သိုၵ်းမၢၼ်ႈယိုဝ်း မိူဝ်ႈႁူဝ်ၼႂ်ၸဝ်ႉၼၼ်ႉ ဢမ်ႇယွမ်း 3 ၵမ်း။ တူၵ်းသႂ်ႇတၢင်းႁွင်ႇ ဝၢၼ်ႈႁူဝ်တိုဝ်ႉ ၼၼ်ႉ ၵမ်းၼိုင်ႈ၊ တူၵ်းသႂ်ႇၼႂ်းဝၢၼ်ႈ ၵမ်းၼိုင်ႈလႄႈ တူၵ်းသႂ်ႇၼိူဝ်သဵၼ်ႈတၢင်း ၼႂ်း ဝၢၼ်ႈ ၵမ်းၼိုင်ႈ။ မၢၵ်ႇလူင် တူၵ်းသႂ်ႇ ႁိူၼ်းလူႉၵွႆ 2 လင်သေတႃႉ ဢမ်ႇမီးၵူၼ်းတိူဝ်ႉမၢတ်ႇၸဵပ်းၸွမ်း။ ဢၼ်တၢႆၼၼ်ႉတႄႉ သင်ဢမ်ႇၺႃးယိုဝ်းတႄႉ ဢမ်ႇတၢႆၼႆ ၵူၼ်းမိူင်းယႆ လၢတ်ႈၼႄဝႆႉၼင်ႇၼႆ –

“မၢၵ်ႇလူင်ၼႆႉ တေပဵၼ်မၢၵ်ႇလူင်သိုၵ်းမၢၼ်ႈဢေႃႈ။ တူၵ်းသႂ်ႇတီႈ သဵၼ်ႈတၢင်းၼႂ်းဝၢၼ်ႈတီႈၼိုင်ႈ လႄႈ တူၵ်းသႂ်ႇတီႈ ႁိူၼ်းလုၵ်ႈၼိုင်ႈ ယဝ်ႉၵေႃႈ တၢင်းႁွင်ႇဝၢၼ်ႈၼၼ်ႉ လုၵ်ႈၼိုင်ႈၼႆဢေႃႈ။ ႁိူၼ်းၵွႆ ၵႂႃႇ 2 လင်ၶႃႈဢေႃႈၼၼ်ႉ။ မိူဝ်ႈမၢၵ်ႇလူင်တူၵ်းတႄႉ ဢမ်ႇမီးၵူၼ်းလူႉတၢႆမၢတ်ႇၸဵပ်းသင်။ ၵူၺ်းၼႃႇ မိူဝ်ႈၵူၼ်းဝၢၼ်ႈၽူင်ႉပၢႆႈၼၼ်ႉ သမ်ႉၺႃးသိုၵ်းၵဝ်ႈၵၢင်ႉယိုဝ်းတၢႆ ၵေႃႉၼိုင်ႈ”- ဝႃႈၼႆ။

ဝၢၼ်ႈႁူဝ်တိုဝ်ႉၼႆႉ ယူႇယၢၼ်သဵၼ်ႈတၢင်းလူင် မိူင်းယႆ – သီႇပေႃႉ မွၵ်ႈ 1 လၵ်း ၊ မီးလင်ၶႃးႁိူၼ်း 100 ပၢႆသေ မီးၵူၼ်းယူႇသဝ်း ႁူဝ်ၼပ်ႉဢမ်ႇယွမ်း 1,000 ။ ယၢမ်းလဵဝ် ဢွၼ်ၵၼ်ပၢႆႈၵႂႃႇ ယူႇဝႆႉ တီႈလွတ်ႈ ၽေး ၵမ်ႈၽွင်ႈ ပၢႆႈယူႇၸွမ်း ႁိူၼ်းယေးပီႈၼွင်ႉ မိူၼ်ၼင်ႇ ဝၢၼ်ႈမေႃႈ၊ ဝၢၼ်ႈပႃႇၵၢင်း ၸိူဝ်းၼႆႉ။ ၵူၼ်း ပိုၼ်ႉတီႈ ၸိူဝ်းၼႆႉ ၵမ်ႈၼမ် ႁဵတ်းၵၢၼ်သူၼ်ႁႆႈၼႃးလႄႈ လဵင်ႉဝူဝ်းၵႂၢႆးသေ ႁႃၵိၼ်လဵင်ႉတွင်ႉ။

ယၢမ်းလဵဝ် ပဵၼ်ၶၢဝ်းၾူၼ် မႅၼ်ႈၽွင်းၵူၼ်းဝၢၼ်ႈၶဝ် ၽုၵ်ႇႁႆႈသွမ်ႈၼႃးသေတႃႉ ယွၼ်ႉၵုမ်ႇလႆႈပၢႆႈ ၽေးသိုၵ်းၸိူင်ႉ ၼႆလႄႈ ၵၢတ်ႈၵၢၼ်ၵၢၼ်ငၢၼ်း ၊ လုၵ်ႈဢွၼ်ႇၵေႃႈ ၶၢတ်ႇၵၢၼ်ႁဵၼ်း ၊ ၵူၼ်းၸပ်း တၢင်းပဵၼ်လႄႈ ၵူၼ်းဢႃယုယႂ်ႇၶဝ် ၵေႃႈ ယၢပ်ႇၽိုတ်ႇ ၵိၼ်းၸႂ်လွင်ႈယႃႈယႃလႄႈ ငိုၼ်းတွင်း။ သင် ပဵၼ်လႆႈ ဢမ်ႇၶႂ်ႈႁႂ်ႈမီးပၢင်တိုၵ်း ၸိူင်ႉၼႆ – ၵူၼ်းမိူင်းယႆလၢတ်ႈ။

တီႈဝၢၼ်ႈႁူဝ်တိုဝ်ႉၼႆႉ မိူဝ်ႈဢွၼ်တၢင်း မီးသိုၵ်း SSPP တူင်ႉၼိုင်ဝႆႉၵူၺ်း ယၢမ်းလဵဝ်သမ်ႉ လႆႈႁၼ်သိုၵ်း MNDAA မႃးဢဝ်တီႈယူႇ ပႂ်ႉၵိၼ်းၸွမ်းသဵၼ်ႈတႃႈသၢႆတၢင်းဝႆႉလႄႈ ၵူၼ်းမိူင်း ပဵၼ်ဢၼ်ပႅၵ်ႇႁူ ပႅၵ်ႇတႃဝႆႉ ဝႃႈၼႆ။

ဝၼ်းတီႈ 11/07/2024 ၼၼ်ႉ သိုၵ်းဝႃႉ UWSA တင်း သိုၵ်းတႆး SSPP ၵေႃႈ ႁႅၼ်းသိုၵ်းၶဝ်ႈ မႃးၼႂ်း ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇထႅင်ႈ တင်းၼမ်။ ယၢမ်းလဵဝ် ၸဵမ်ဢဝ် သိုၵ်းၵဝ်ႈၵၢင်ႉ၊ သိုၵ်းဝႃႉ၊ သိုၵ်း SSPP ၊ သိုၵ်းမၢၼ်ႈ ၸိူဝ်းၼႆႉ ယူႇလေႃးလႄးၵၼ်ဝႆႉလႄႈ ဢမ်ႇႁူႉ သိုၵ်းၸုမ်းလႂ် ၵေႃႉၵုမ်းဝႆႉဝဵင်းမိူင်းယႆတႄႉတႄႉ။ ၵူၼ်းမိူင်းတႄႉ ဢမ်ႇႁူႉတေလႆႈပိုင်ႈၽႂ် ၸုမ်းလႂ် – ဢမ်ႇၸၢင်ႈတမ်းၸႂ်လႆႈသေၸုမ်းၼႆ – ၵူၼ်းပိုၼ်ႉတီႈလၢတ်ႈ။

မိူဝ်ႈႁူဝ်လိူၼ်ၼႆႉ ၽွင်းပၢင်တိုၵ်းတီႈလႃႈသဵဝ်ႈႁၢဝ်ႈႁႅင်းၼၼ်ႉ ၵူၼ်းမိူင်းလႃႈသဵဝ်ႈ ပၢႆႈၽေးသိုၵ်းလူင်း မႃးတၢင်းမိူင်းယႆ။ ၼၼ်ႉၵေႃႈ မႃးၺႃးသိုၵ်းၵဝ်ႈၵၢင်ႈ ဢၼ်ပႂ်ႉဝႆႉတီႈဝၢၼ်ႈၶႃးသီးၼၼ်ႉ ႁႄႉၵူတ်ႇထတ်းထဵတ်ႈထၢမ်သေ တီႉၺွပ်း ဢဝ် ၼုမ်ႇၸၢႆးၵေႃႉၼိုင်ႈၵႂႃႇ။ ၽွင်းၵေႃႉ ပဵၼ်မႄႈၵႂႃႇၸွမ်းယွၼ်းၼၼ်ႉသိုၵ်းၵဝ်ႈၵၢင်ႉဝႃႈ သူင်ႇတူဝ် မၼ်းၸၢႆးၵႂႃႇ ၾိုၵ်းၵၢၼ်သိုၵ်းယဝ်ႉ – ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 5 လိူၼ်ၵျူႊလၢႆႊၼႆႉ သိုၵ်းမၢၼ်ႈ ၶလယ 67 မိူင်းယႆ ယိုဝ်းၵွင်ႈလူင်ၵႂႃႇ တၢင်းဢိူင်ႇႁူဝ်ယသေ မၢၵ်ႇလူင်တူၵ်းသႂ်ႇ ႁိမ်းႁူင်းႁဵၼ်း (ၽႄ) ၸၼ်ႉသုင်။ ထိုင်မႃး ဝၼ်းတီႈ 7 မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈလူင် ဢိူင်ႇႁူဝ်ယ ၾႆးမႆႈလူႉၵွႆ 2 လင်။