လိူၼ်ၵျူႊလၢႆႊ 14 တေႃႇ 18 ၼႂ်းၽွင်းသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ၵိုတ်းတိုၵ်းၾၢႆႇလဵဝ်ၼႆႉ ၾၢႆႇမၢၼ်ႈ SAC ပွႆႇၸုမ်းတူဝ်တႅၼ်းၶဝ် ဢၼ်ၵႅမ်ၽူႈၵုမ်း ၸယၽ (စရဖ) ၸွမ်ႁၢၼ် မိၼ်းတူႇလႄႈ ၽူႈၵွၼ်းတိူင်းသၢမ်လႅမ်ထွင်း ဢွၼ်ႁူဝ်ၼၼ်ႉ ၵႂႃႇငူပ်ႉငီႉၸွမ်း ၽူႈယႂ်ႇၸုမ်းဝႃႉ UWSA တီႈပၢင်သၢင်း၊ ပိူဝ်ႈတႃႇႁၢမ်ႈႁႄႉပၼ် သၢႆသိုၵ်းၵဝ်ႈၵၢင်ႉ ဢၼ်လုၵ်ႉတၢင်းႁူဝ်ပိုၵ်ႉ၊ လုၵ်ႉတၢင်း ၼွင်မွၼ်လႄႈ လုၵ်ႉ တင်းၼမ်ႉပွင်ႈ ၸိူဝ်းၼႆႉသေ ၽိုတ်ႉၶဝ်ႈၸူးလႃႈသဵဝ်ႈ။

ၵူၺ်းၵႃႈ UWSA ပႆႇပႃႈယွမ်းႁပ်ႉ ၼႄလွင်ႈတၢင်းတႄႉဝႃႈ ၸုမ်းဢူၺ်းလီၶဝ် ပေႃးဢိူမ်ႈၸမ်ၼႃႇ ယဝ်ႉလႄႈ တေလႆႈတူၺ်းၼႃႈၵၼ်၊ ၵွၼ်ႇၶဝ်ပႆႇမႃးၽႅဝ်တႄႉမဵဝ်းၼိုင်ႈ ၼႆယဝ်ႉ။ တီႈၼႆႈ လီၶုၵ်းၸႂ် လႆႈ ပိူင်ပဵၼ်ဝၼ်းတီႈ 11 ပူၼ်ႉမႃး ၼၼ်ႉယူႇ၊ ၸုမ်းၵဝ်ႈၵၢင်ႉလႄႈ ၽီၻီဢႅၾ်ႉ (ပႃတႅပ်း) ၶဝ် ပေႃး ဢိူမ်ႈထိုင် ႁူဝ်ယႃႉ၊ မိူင်းပၢတ်ႇယဝ်ႉၸင်ႇ UWSA ၶဝ်ႈမႃးၵုမ်းဝဵင်းတၢင်ႉယၢၼ်း ဢမ်ႇၸႂ်ႈႁိုဝ်။

လွင်ႈတူၺ်းတေႃႇၼႃႈၵၼ်ၼႆႉ ဢိင်ၼိူဝ်ၽွၼ်းပၢင်ႈ ၶွင်ၸုမ်းတူဝ်ၵဝ်ႇဝႆႉႁႃႉၼႆ တေႃႈတေလႆႈၼပ်ႉ ပႃးယဝ်ႉ။ ၸဵမ်မိူဝ်ႈပၼ်ႁႂ်ႈ UWSA ၵုမ်းၵမ် ဝဵင်းတၢင်ႉယၢၼ်းၼၼ်ႉ ၾၢႆႇမၢၼ်ႈ SAC တိုၼ်းတေမီး ဢဵၼ်းဢၢၼ်း ပိူဝ်ႈတႃႇႁႂ်ႈၸွႆႈႁႄႉ ၵင်ႈပႃး ဝဵင်းလႃႈသဵဝ်ႈယူႇ။

UWSA ၵေႃႈ လၢမ်းႁူႉၸွမ်းလႄႈ ၸင်ႇတၵ်းဝႆႉၼၵ်း ႁူမ်ႇလူမ်ႈပၼ် ၼႃႈတီႈၸိူဝ်းတိတ်းၸမ်တၢင်း ၾၢႆႇလႃႈသဵဝ်ႈ ဢၼ်ပျီႇတူႉၸိတ်ႉပူဝ်ႇမူၼ်း သုမ်ႇငုမ်းပဵၼ်ယႂ်ႇမႃးၼၼ်ႉယဝ်ႉ။ ၵူၺ်းၵႃႈ တႃႇတေၵုမ်း ၵမ်လႃႈသဵဝ်ႈၼႆႉ ၶၼ်တေႃႇလွင်းမၼ်းယႂ်ႇ၊ ၽႅၼ်ၵၢၼ်ဢိူမ်ႈလေႃႇလႃႈသဵဝ်ႈယူႇၼႆႉ ၸၢင်ႈပဵၼ်ၽႅၼ် ၵူႈၵၼ်တင်း ၵၢၼ်ဢိူမ်ႈလေႃႇ သိၼ်ႉၵူး၊ မတ်ႉတယႃႇ၊ ပတဵင်ႇၵျီး (စဉ်ႉကူး၊ မတ္တရာ၊ ပုသိမ်ကြီး) တေႃႇ ထိုင်ဝဵင်းလိူဝ်ႇ ၸိူဝ်းၼႆႉလႄႈ ဢမ်ႇၵႃး မွၵ်ႈသွင်သၢမ်ၸုမ်း တူၵ်းလူင်းႁူမ်ႈၽႅၼ်။

ၸုမ်းၵဝ်ႈၵၢင်ႉလႄႈ ၽီၻီႇဢႅၾ်ႉ ဢၼ်ယိုဝ်ႈယိုတ်း ယူႇၸွမ်းမၢၼ်ႈ ခလရ ၂၃ တီႈသႅင်ၵႅဝ်ႉၼၼ်ႉၵေႃႈ ယွၼ်ႉဢမ်ႇ ၸၢင်ႈၶဝ်ႈ မိူင်းယႆ၊ တၢင်ႉယၢၼ်းလႄႈ ၶိုၼ်းပိၼ်ႇယိုဝ်းသွင်ၵႄးယူႇၼၼ်ႉၵေႃႈ ၵူၺ်း ပဵၼ်ပိူဝ်ႈတႃႇ တႆႇႁုပ်ႈၸွမ်းၶွပ်ႇဝိူင်းလႃႈသဵဝ်ႈသေ ႁိပ်ႇႁွပ်ႈဢိူမ်ႈၸူး လွႆးလွႆးယူႇလႄႈ ထႃႈဢမ်ႇလႆႈ ၽွၼ်းပၢင်ႈ ဢုၵ်းသုၵ်းဢူၺ်ႈသူၺ်ႈတႃႇမၼ်းပႄႇ UWSA ၵေႃႈ တေဢမ်ႇလႃႈလီႈဢေႃး၊ တေဢမ်ႇ လမ်တၼ်ၶဝ်ႈၵုမ်းလႃႈသဵဝ်ႈသႄႈ။

ၵျူႊလၢႆႊ 11 လႄႈ 13 ပေႃးဝႃႈ UWSA လႄႈ SSPP ၶဝ်ႈၵုမ်းတၢင်ႉယၢၼ်းလႄႈ မိူင်းယႆ ယဝ်ႉၵေႃႈ ထႅင်ႈသေ ဝၼ်းသွင်ဝၼ်းၵူၺ်း သိုၵ်း SAC ၶီႇၵႃးလူင် ဢမ်ႇယွမ်း 35 လမ်း လုၵ်ႉၾၢႆႇလွၵ်ႈၸွၵ်ႇ – ပႃႉထူး ၶဝ်ႈၸူးလႆႈတီႈတၢင်းတွင်ႇ ၶျေႇ တေႃႇထိုင် ပေႃးၶဝ်ႈတိုၵ်းလႆႈၶိုၼ်း ၼႂ်းဝဵင်းၵျွၵ်ႉမႄးၼႆႉ ဢမ်ႇၸႂ်ႈ လွင်ႈလႆႈလွင်ႈပၼ် ၼႂ်းၵႄႈၶဝ်သွင်ၾၢႆႇ – သၢမ်ၸုမ်းၼႆ ဢမ်ႇၸၢင်ႈဝႃႈ။

ပေႃးၸႂ်ႈတႄႉၸိုင် ၵၢၼ်တူၵ်းလူင်း ၼႂ်းၵႄႈၸုမ်းဢူၺ်းလီၽၢၵ်ႈၼိူဝ် (FPNCC) ၼႆႉ ၵဵဝ်ႇလူၺ်ႈလၢႆး ဝႆႉဝၢင်းၸႂ်ၼိူဝ် SAC ၼၼ်ႉ ၸွင်ႇဢမ်ႇမီးၶေႃႈထၢမ်ဢၼ်ဝႃႈ ၵၢၼ်သုၼ်ႇၸုမ်းပဵၼ်ယႂ်ႇႁႃႉ ၵၢၼ် ဢူၺ်းလီပဵၼ်ယႂ်ႇ ၼႆယဝ်ႉႁိုဝ်။

ပဵၼ်ႁိုဝ်ၵေႃႈလၢႆးလႃႈ၊ UWSA ၵုမ်းၵမ် ဝဵင်းတၢင်ႉယၢၼ်းလႄႈ SSPP ၵုမ်ႈၵမ်ဝဵင်းမိူင်းယႆၼႆႉ လွၼ်ႉ မွၼ်းဢမ်ႇမိူၼ် ၵၼ်။ UWSA ၵုမ်းၵမ်တၢင်ႉယၢၼ်းၼႆႉ ပဵၼ်ၵၢၼ်တွၼ်း ဢၼ်ဢမ်ႇတၢပ်ႈသဵင်ႈတိုၼ်း၊ SSPP ၵုမ်းၵမ် မိူင်းယႆသမ်ႉ ပဵၼ်ၵၢၼ်တိုၼ်း လႆႈၶိုၼ်းၶွင်တိုၼ်းၵူၺ်း၊ ပိူင်ႈၵၼ် တႄႉတႄႉဝႃႈဝႃႈဢေႃႈ။

ပဵၼ်ႁိုဝ်ပဵၼ်လႃႈ ၸၢမ်းႁႂ်ႈဝႃႈ ပဵၼ်ၵၢၼ်တွၼ်း ဢၼ်ဢမ်ႇတၢပ်ႈသဵင်ႈတိုၼ်း တေႃႉတႄႉလႆႈဢဝ်ၼႃႈမႆႈ ႁဵတ်းၵေးလၢင်းသေ ၶဝ်ႈၵုမ်းလႃႈသဵဝ်ႈယဝ်ႉ။ သမ်ႉတေလႆႈတမ်း ပိူင်ၽွင်းငမ်းတူဝ်ၵဝ်ႇ မိူၼ်ၸိူင်ႉ ၸႄႈဝဵင်းမၢၵ်ႇမၢင် ဢၼ်မီးၸိုဝ်ႈဝႃႈ ပႃးဝႆႉၼႂ်းတိူင်းၽွင်းငမ်းႁင်းၶေႃဝႃႉသေ သမ်ႉဢမ်ႇၸၢင်ႈ ၽွင်း ငမ်းတႄႉၼၼ်ႉၼႆၸိုင် တႃႇဝႃႈ UWSA တေဢမ်ႇႁပ်ႉၵုမ်းလႃႈသဵဝ်ႈၼၼ်ႉ တေဢမ်ႇမီးသႄႈ။

ၼႂ်းၵႄႈၼႆႉ ႁူမ်ႈဝႃႈတၢင်ႇၸုမ်းၸၢဝ်းဢမ်ႇတၼ်းဝူၼ်ႉၵေႃႈ ယူႇတီႈ ၸုမ်းၸၢဝ်း ၸိူဝ်းၵဵဝ်ႇၵွင်ႉၵၢၼ် မိူင်းၶဝ် ဢမ်ႇၶႆႈ ၸႂ်ထၢမ်ထိုင်ၵၼ်ဢမ်ႇလႆႈတႄႉ ယွၼ်ႉသင်သိုၵ်းတႆးၼင်ႇၵၼ် တိုၵ်ႉပိုတ်းတိုၵ်းၶႃႈ ၸႂ်ၵၼ်ယူႇ ဢၼ်ဝႃႈၼၼ်ႉယဝ်ႉ။

ယူႇတီႈ ပေႃႈမႄႈၵူၼ်းတႆး ဢၼ်လႆႈပၢႆႈ လႆႈတၢႆႁၢႆတုၵ်ႉယၢၵ်ႈ ယွၼ်ႉၽေးသိုၵ်း ၼႂ်းမိူင်းတႆးယူႇ ဢၼ်ဢမ်ႇၸႂ်ႈ ယွၼ်ႉသိုၵ်းတႆး လမ်းတိုၵ်းၽူႈၶဵၼ်ၽုင်ႇ၊ သမ်ႉတိုၵ်ႉပဵၼ် ယွၼ်ႉၸၢဝ်းၶိူဝ်းဢွၼ်ႇၼႂ်း မိူင်းတႆး လမ်းတိုၵ်းတေႃး ၸဝ်ႈဢႃႇၼႃႇ သိုၵ်းမၢၼ်ႈၼၼ်ႉၵူၺ်းၼႆတႄႉ တပ်ႉသိုၵ်းတႆးလႄႈ ၵူၼ်းမိူင်း ၸၢဝ်းတႆး တေႁဵတ်းႁိုဝ်ၵူမ် ၵဵဝ်ယွၼ်ႈၽဵင်ႇၵၼ် ဢၼ်ဝႃႈၼၼ်ႉ ႁူႉတေလႆႈပွႆႇသုမ်းသဵၼ်ႈသၢႆၸႂ်၊ ၼႃႈ လိၼ်မိူင်းလႄႈ ၼမ်ႉၸႂ်ႁၵ်ႉၶိူဝ်းတင်းၼမ်ထႅင်ႈသေ ၵွၼ်ႇ ၸင်ႇတေၸၢင်ႈၶဝ်ႈၶိုင်ႁူမ်ႈမိုဝ်းၵၼ်လႆႈ ယဝ်ႉယူဝ်ႉၼႆ ယွၼ်းပၢႆးၼႄတၢင်းႁၼ်သုၼ်ႇတူဝ်သေ တေၶွတ်ႇယွတ်ႈသၢႆၵႂၢမ်းယဝ်ႉဢေႃႈ။