သိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 3 ပီပၢႆၼႆႉ ၸဵမ်ၵူႈပၢႆးပၢႆးတူၵ်းတႅမ်ႇလူင်းႁူၺ်ႈၵူႈဝၼ်းပႃးၸဵမ် ပၢႆးမၢၵ်ႈမီးၵၢၼ် ႁႃၵိၼ်လဵင်ႉတွင်ႉ။ ယႃႈမဝ်းၵမ်လိူင်ႇၼမ် ၽူႈလၵ်ႉၸၵ်ႉၶုတ်ႈၵေႃႈလိူင်ႇ၊ ပၵ်းပိူင် ၸိုင်ႈမိူင်းၵေႃႈ ဢမ်ႇႁူမ်ႇငမ်းၵႅတ်ႇၵင်ႈပၼ်ၵူၼ်းမိူင်းလႆႈ ထူပ်းၽေးသင်မႃးၵေႃႈ ၵူၼ်းမိူင်းဢမ်ႇ ႁွၼ်ႇတွၼ်ႉလႆႈလွင်ႈသၢႆႈတႅၼ်း။

ၼႂ်းမိူင်းတႆးပွတ်းဢွၵ်ႇ တႃႈၶီႈလဵၵ်း – ၵဵင်းတုင် ၽူႈလၵ်ႉလိူင်ႇ ဢမ်ႇၵူဝ်ဢမ်ႇႁႄ ၶဝ်ႈႁိူၼ်းလၵ်ႉၶူဝ်း တင်းၵၢင်ဝၼ်းလႄႈ ၵၢင်ၶိုၼ်း။ ၼိုင်ႈလိူၼ်လႂ် ၺႃးလၵ်ႉဢမ်ႇယွမ်း 20 လမ်း ဢမ်ႇမီးၸုမ်းလႂ်ဢဝ် ပုၼ်ႈၽွၼ်းပၼ် ဝႃႈၼႆ။

ၸိုင်ႈတႆးပွတ်းႁွင်ႇသမ်ႉ ၵူၼ်းမိူင်း လႆႈပၢႆႈၽေးသိုၵ်းၼပ်ႉႁဵင်ၼပ်ႉမိုၼ်ႇ၊ ၸိုင်ႈတႆးပွတ်းၸၢၼ်းသမ်ႉ မၢင်ဢွင်ႈတီႈ ၵေႃႈ ပဵၼ်ပၢင်တိုၵ်း၊ မၢင်ဢွင်ႈတီႈ သိုၵ်းမၢၼ်ႈ တဵၵ်းတဵင်ၵဵပ်းသိုၵ်းၵဵပ်းၶွၼ်ႇ။ တၢင်းပွတ်းဢွၵ်ႇၶူင်းသမ်ႉ ဢမ်ႇပဵၼ်ပၢင်တိုၵ်းသိုၵ်းသိူဝ်သေတႃႉၵေႃႈ ၽူႈလၵ်ႉၸၵ်ႉၶုတ်ႈသမ်ႉလိူင်ႇ ၵူၼ်း လႅၼ်ၵိၼ်ၵၼ်ၵေႃႈၼမ် ၼႆယဝ်ႉ။

ဝၼ်းတီႈ 18/07/2024 ယၢမ်းၵၢင်ၼႂ်ၼႆႉၵူၺ်း ၼၢင်းယိင်း ၵူၼ်းတႃႈၶီႈလဵၵ်း ၵေႃႉၼိုင်ႈ ၵႂႃႇၸၢႆႇၵၢတ်ႇႁွင်ႈလိုၵ်ႉ ၵမ်း ၼိုင်ႈၵူၺ်း ၺႃးၵူၼ်းလၵ်ႉဢဝ်ရူတ်ႉၶိူင်ႈၵႂႃႇ လမ်းၼိုင်ႈ ၼႆယဝ်ႉ။  

မိူဝ်ႈထတ်းတူၺ်း ၼႂ်း CCTV တီႈၵၢတ်ႇၼၼ်ႉ လႆႈႁၼ် ၵူၼ်းၸၢႆး 2 ၵေႃႉ ၶီႈရူတ်ႉၶိူင်ႈမႃး လမ်းၼိုင်ႈ မႃးၵိုတ်းႁိမ်းၵၢတ်ႇၼၼ်ႉသေ ယႃႉႁူဝ်ရူတ်ႉၶိူင်ႈ ဢၼ်ၵိုတ်းဝႆႉၼၼ်ႉသေ ႁေႃႈပၢႆႈ။ ၼႃႈတႃၵူၼ်း ၸိူဝ်းဢၼ်မႃးလၵ်ႉၼၼ်ႉတႄႉ ဢမ်ႇႁၼ်ၸႅင်ႈလီ။ ၽွင်းၸဝ်ႈၶွင်ရူတ်ႉၶိူင်ႈ ၵႂႃႇလၢတ်ႈတီႈႁူင်းပ လိၵ်ႈတႃႈၶီႈလဵၵ်းၼၼ်ႉ လႆႈႁၼ်ၵူၼ်းမႃးၸႅင်ႈ လွင်ႈရူတ်ႉ ဢမ်ႇယွမ်း 4 ၵေႃႉ။ လၢတ်ႈလႆႈဝႃႈ ၼႂ်း ဝၼ်းလဵဝ်ၵူၺ်း ရူတ်ႉၶိူင်ႈၵူၼ်းမိူင်းႁၢႆ ဢမ်ႇယွမ်း 5 လမ်းၼႆ ၼၢင်းယိင်း ဢၼ်ၺႃးလၵ်ႉရူတ်ႉၶိူင်ႈ တီႈတႃႈၶီႈလဵၵ်းလၢတ်ႈၼႄဝႆႉၼင်ႇၼႆ –

“မိူဝ်ႈႁဝ်းၵႂႃႇႁူင်းပလိၵ်ႈၼႆႉ ႁၼ်ပိူၼ်ႈမႃးတၢင်ႇလၢတ်ႈ လွင်ႈရူတ်ႉၶိူင်ႈႁၢႆ ဢမ်ႇယွမ်း 4 ၵေႃႉၶႃႈ။ ပ လိၵ်ႈၶဝ်တႄႉ လၢတ်ႈပႃးဝႃႈ ပေႃးပဵၼ်ၵူၼ်းႁဵတ်းၵၢၼ်လၵ်ႉရူတ်ႉပိူၼ်ႈၸိူင်ႉၼႆ ပေႃးၶဝ်ႁၼ်ပိူၼ်ႈ မီးၵေႃႈ ၶဝ်တိုၼ်းပႂ်ႉတူၺ်းဝႆႉယူႇတႃႇသေႇယဝ်ႉ။ လူဝ်ႇလႆႈၾၢင်ႉလီလီႁင်းႁဝ်းၵူၺ်း”- ဝႃႈၼႆ။

မိူၼ်ၼင်ႇ တီႈဝဵင်းၵဵင်းတုင်ၵေႃႈ ၵိုတ်းရူတ်ႉၶိူင်ႈဝႆႉ ၸွမ်းႁၢၼ်ႉ ၸွမ်းၾင်ႇတၢင်း ၸိူဝ်းၼႆႉ ပေႃးဢမ်ႇ ပႂ်ႉတူၺ်းၸိုင် ဢမ်ႇႁိုင် 10 မိၼိတ်ႉ 20 မိၼိတ်ႉၵေႃႈ ၺႃးလၵ်ႉ။ ၸဝ်ႈၶွင်ရူတ်ႉၶိူင်ႈ မၢင်ၵေႃႉၵေႃႈ တၼ်းလႆႈၶိုၼ်း မၢင်ၵေႃႉတႄႉ သုမ်းလၢႆလၢႆ။

တေႃႈၼင်ႇ ရူတ်ႉၶိူင်ႈၵိုတ်းဝႆႉ ၼႂ်းႁိူၼ်းၽႂ်မၼ်းၵူၺ်းၵေႃႈ ၺႃးၵူၼ်းလၵ်ႉ ၶဝ်ႈၸူၼ် ၶဝ်ႈဢဝ်။ တီႈၵဵင်းတုင်ၼႆႉ ရူတ်ႉၶိူင်ႈႁၢႆၵူႈဝၼ်း ၼိုင်ႈလိူၼ်လႂ် ဢမ်ႇယွမ်း 20 လမ်း။ ၼၢင်းယိင်း ၵူၼ်းၵဵင်းတုင် ၵေႃႉ ၼိုင်ႈ လၢတ်ႈၼႄၼင်ႇၼႆ –

“သင်ႇၵႄႇ တီႈၵဵင်းတုင်ၼႆႉ ႁၢႆၵူႈဝၼ်းယဝ်ႉၼႃ။ ၵိုတ်းဝႆႉ 10 ၼႃးထီး 20 ၼႃးထီးၵေႃႈ ႁၢႆယဝ်ႉ။ မၢင်ၵေႃႉၵေႃႈ တၼ်းလႆႈၶိုၼ်း၊ မၢင်ၵေႃႉၵေႃႈ ဢမ်ႇလႆႈၶိုၼ်း။ ၵူၼ်းမႃးၵၢတ်ႇလူင်ၸိူဝ်းၼႆႉ ၵေႃႈႁၢႆ။ ၵူၼ်းၸိူဝ်းယူႇတီႈႁိူၼ်းၵေႃႈ ၺႃးပိူၼ်ႈမႃးယႃႉသေႃးသေ လၵ်ႉၵႂႃႇၵေႃႈ မီးတင်းၼမ် ။ ပေႃးတူၺ်းတႄႉ ၼိုင်ႈလိူၼ်ၼႆႉ မွၵ်ႈ 20 လမ်း ဢမ်ႇယွမ်းယဝ်ႉ ဢၼ်ႁၢႆၵႂႃႇၼႆႉ။ တေႃႈၼင်ႇ ၵႃးပိူၼ်ႈၵိုတ်းဝႆႉ တီႈ ၾင်ႇၼွင်ၶမ်းၼၼ်ႉ တင်းႁၢႆၵႂႃႇဢေႃႈ မိူဝ်ႈပူၼ်ႉမႃး 2 လိူၼ်ၼႆႉ”- ဝႃႈၼႆ။

ရူတ်ႉၶိူင်ႈ ဢၼ်ပလိၵ်ႈၶဝ်ႁႃသွၵ်ႈပၼ်လႆႈၶိုၼ်းတႄႉ ၵမ်ႈဢေႇၵူၺ်း ဢၼ်ဢမ်ႇႁႃႁၼ်လႆႈ မီးတင်းၼမ်။ ဢၼ်ၺႃးလၵ်ႉသေ ဢမ်ႇမႃးၸႅင်ႈလႄႈ ဢမ်ႇလႆႈႁူႉသဵၼ်ႈမၢႆမၼ်းၸွမ်းၵေႃႈ မီးၼမ်။ ပလိၵ်ႈမၢၼ်ႈၵေႃႈ ဢမ်ႇသႂ်ႇၸႂ်ၼိူဝ်လွင်ႈ ၼႆႉ ဢဵၼ်ႁႅင်းပလိၵ်ႈၵေႃႈဢမ်ႇႁၼ်မီးၼမ်  ၵႂႃႇတၢင်းလႂ်မူတ်း ဢမ်ႇႁူႉၼႆ ၵူၼ်းၵဵင်းတုင်လၢတ်ႈ။

ရူတ်ႉၶိူင်ႈဢၼ်ၵႆႉႁၢႆၼမ်ၼႆႉ တေပဵၼ်သႅၼ်း Wave 125 ၊ 110 ဢၼ်မိူင်းထႆးႁဵတ်းဢွၵ်ႇ။ သႅၼ်း PCX လႄႈ Click ၸိူဝ်းၼႆႉတႄႉၵေႃႈပႃး ၊ ၵူၼ်းလၵ်ႉၼႆႉ လိူၵ်ႈလၵ်ႉရူတ်ႉၶိူင်ႈ ဢၼ်ၸၢင်ႈႁၵ်းၶေႃးမၼ်းငၢႆႈၼၼ်ႉ ဝႃႈၼႆ။

မိူင်းတႆးပွတ်းဢွၵ်ႇၼႆႉ ၵူၼ်းမိူင်းဢွၼ်ၵၼ်သိုဝ်ႉ ၸႂ်ႉရူတ်ႉၶိူင်ႈဢၼ်ႁဵတ်းဢွၵ်ႇ တၢင်းမိူင်းထႆး။ ပေႃးတႅၵ်ႈၵၼ်တၢင်းရူတ်ႉၶိူင်ႈ ဢၼ်ဢွၵ်ႇတၢင်းမိူင်းၶႄႇ မၼ်းမီးၵႃႈၶၼ်သုင်လႄႈ ၵူၼ်းလၵ်ႉၸင်ႇပၵ်း တႃပႂ်ႉလၵ်ႉဢဝ်ၵႂႃႇၶၢႆတေႃႇယူႇတႃႇသေႇ။ 

ၶၢဝ်းပၢႆးမၢၵ်ႈမီးတူၵ်းၼႆႉ တီႈတႃႈၶီႈလဵၵ်း ၵူၼ်းလုၵ်ႉတၢင်ႇတီႈ မႃးယူႇသဝ်းႁႃၵိၼ်လဵင်ႉတွင်ႉၵေႃႈ ၼမ်။ လွင်ႈႁႃလၵ်ႉ ၸူၼ်ၵၼ်ၼႆႉ မိူၼ်ပဵၼ်ၵၢၼ်ႁႃၵိၼ်လဵင်ႉတွင်ႉၵႂႃႇယဝ်ႉ။ မီးလၵ်းထၢၼ်ၼႂ်းၵွင်ႈ ထၢႆႇ CCTV ယူႇၵေႃႈ ပလိၵ်ႈ ဢမ်ႇတွၼ်ႉတီႉလႆႈသေ ဢဝ်မႃးပၼ်တူတ်ႈတၢမ်ႇသေပွၵ်ႈ ၵူၼ်းပိုၼ်ႉ တီႈလၢတ်ႈၼင်ႇၼႆ။ 

“တီႈတႃႈၶီႈလဵၵ်းၼႆႉ မၼ်းမိူၼ်ၵၢၼ်ၶဝ်ဢၼ်ၼိုင်ႈယဝ်ႉ။ ၵူၼ်းလၵ်ႉၸိူဝ်းၼႆႉ ၼႂ်းၵွင်ႈထၢႆႇ CCTV ႁိူၼ်းၽႂ်ႁိူၼ်းမၼ်းတႄႉ ႁၼ်ၵူၼ်းလၵ်ႉမၼ်းယူႇဝႃႈၼႆသေတႃႉၵေႃႈ မၼ်းဢမ်ႇမီးၽႂ်ၵႂႃႇ သွၵ်ႈႁႃတီႉၺွပ်းၶဝ်။ ပေႃးၺွပ်းၵေႃႈ ႁဵတ်းဢဝ်ၼႃႈတိူဝ်ႈမၼ်းၵူၺ်း။ ပလိၵ်ႈၶဝ် ယၢမ်ႈပိုၼ်ၽၢဝ်ႇလၢတ်ႈဝႃႈ ၶဝ်ၺွပ်းလႆႈ ရူတ်ႉၶိူင်ႈဝႆႉၼမ်ၼႆသေ ၽိူဝ်ႇ ၵူၼ်းမိူင်းၵႂႃႇတူၺ်း သမ်ႉလႆႈႁၼ်ပဵၼ်ရူတ်ႉၶိူင်ႈ ဢၼ် ယွၵ်းလၢႆလၢႆ။ မိူၼ်ၶဝ် တင်ႈၸႂ်ႁဵတ်း တင်ႈၸႂ်ဢဝ် ဢၼ်ယွၵ်းမႃးၼႄသေယဝ်ႉၵေႃႈ လၢတ်ႈဝႃႈ ၶဝ်ၺွပ်းလႆႈ”- ဝႃႈၼႆ။

ၵူၼ်းလၵ်ႉၼႆႉ လၵ်ႉဢဝ်ရူတ်ႉၶိူင်ႈၵူၼ်းမိူင်းၵႂႃႇသေ ၵႂႃႇယႃႉမိၵ်ႈမၢႆဢိၼ်ႊၵျိၼ်ႊ ရူတ်ႉၶိူင်ႈပႅတ်ႈ တွၵ်ႇသႂ်ႇမၢႆၼပ်ႉဢၼ်မႂ်ႇမၼ်း ၸိူဝ်းၼႆႉ ယဝ်ႉၵေႃႈ ၵႂႃႇၶၢႆတေႃႇ ၵူၼ်းၵၢင်(ပွႆးၸႃး) ၶဝ် ဢမ်ႇၼၼ် ၵႂႃႇၶၢႆပၼ်ၵူၼ်း ၸိူဝ်းယူႇၵႆဝၢၼ်ႈၵႆဝဵင်း ၸိူဝ်းၼၼ်ႉ။

ၵူၼ်းလၵ်ႉ မၢင်ၸိူဝ်းသမ်ႉ ၽွတ်ႈပဵၼ်ၸုမ်းသေ ႁဵတ်းၾဵတ်ႉသ်ပွမ် တၢင်ႇၶၢႆၼိူဝ်ဢွၼ်ႊလၢႆႊၵေႃႈမီး။ ၸိူဝ်းဢမ်ႇႁူႉ ၵေႃႈ တူၵ်းပဵၼ်ယိူဝ်ႇၶဝ်။ ယွၼ်ႉဝႃႈ ၶဝ်တေလူတ်းၵႃႈၶၼ်မၼ်းသေၶၢႆလႄႈ ၽႂ်ၵေႃႈ မၢင်ႇၵိူဝ်းလႆႈၵႃႈပေႃးသေသိုဝ်ႉ ဢဝ် ၵူၼ်းလၵ်ႉၶဝ်ၵေႃႈ ၸင်ႇပဵၼ်ၵၢၼ်မႃးၶိူဝ်းယႂ်း။ ရူတ်ႉၶိူင်ႈ ဢၼ်ဢွၵ်ႇတၢင်းမိူင်းထႆးၼႆႉ ၼိုင်ႈလမ်းလႂ် တီႈဢေႇသုတ်း သႅၼ်ႁွမ်း 40 ပျႃး ၸိူဝ်းၼႆႉလႄႈ ၵူၼ်းၸိူဝ်း ၺႃးလၵ်ႉတႄႉ လႆႈဝႃႈလူႉယႂ်ႇသုမ်းၼမ် ဝႃႈၼႆ။