တႄႇဢဝ် ဝၼ်းတီႈ 25 လိူၼ်ၵျုၼ်ႊၼၼ်ႉမႃး သိုၵ်းမၢၼ်ႈ ယိုတ်းမိူင်းတင်း  သိုၵ်းတဢၢင်း TNLA ႁႅၼ်းသိုၵ်းလေႃႇတိုၵ်းၵၼ်တီႈ ၸႄႈဝဵင်းၵျွၵ်ႉမႄးႁၢဝ်ႈႁႅင်းလႄႈ ႁဵတ်းႁႂ်ႈမၢၵ်ႇလူင်တူၵ်းသႂ်ႇ ၵူၼ်းမိူင်း လူႉတၢႆ ဢမ်ႇယွမ်း 30 မၢတ်ႇၸဵပ်းၸွမ်းထႅင်ႈ တင်းၼမ် ။

ဝၼ်းတီႈ 16 လိူၼ်ၵျူႊလၢႆႊၼႆႉၵေႃႈ မၢၵ်ႇလူင်တူၵ်းသႂ်ႇ ၵူၼ်းမိူင်းတၢႆထင်တီႈ ထႅင်ႈ 3 ၵေႃႉ။ ထိုင်ဝၼ်းတီႈ 17 ၼႆႉ ၵေႃႈ ပၢင်တိုၵ်း တိုၵ်ႉပဵၼ်ႁႅင်းလႄႈ ၵူၼ်းမိူင်းၶႂ်ႈႁႂ်ႈၵိုတ်းတိုၵ်းပၼ်ဝႆးဝႆး ၼႆယဝ်ႉ။

ႁွင်ႈၵၢၼ်ၾၢႆႇပွင်ႇၶၢဝ်ႇ သိုၵ်းတဢၢင်း TNLA  ပိုၼ်ၽၢဝ်ႇဝႃႈ တေၵိုတ်းတိုၵ်း ၶၢဝ်းတၢင်း 4 ဝၼ်း (ဝၼ်းတီႈ 15 ထိုင် 18) ဝႃႈၼႆသေတႃႉ ၼႂ်းၸႄႈဝဵင်းလႃႈသဵဝ်ႈ ၵျွၵ်ႉမႄး ၼွင်ၶဵဝ် သဵင်ၵွင်ႈ တႅၵ်ႇပႆႇ ယဵၼ်။ တေႃႈၼင်ႇ ဝၼ်းတီႈ 16/7/2024 ၼႆႉ သိုၵ်းမၢၼ်ႈတင်း သိုၵ်းတဢၢင်း TNLA  ယိုဝ်းၵၼ် ႁၢဝ်ႈႁႅင်းထႅင်ႈတင်းဝၼ်းသေ ယၢမ်းႁူဝ်ၶမ်ႈ 4 မူင်း မၢၵ်ႇလူင်တူၵ်းသႂ်ႇ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ တိူဝ်ႉသႂ်ႇၵူၼ်းမိူင်း တၢႆထင်တီႈ 3 ၵေႃႉလႄႈ ၾႆးမႆႈပႃးရူတ်ႉၵႃး လူႉၵွႆတင်းၼမ်။

ဢၼ်မၢၵ်ႇလူင် တူၵ်းသႂ်ႇႁၢဝ်ႈႁႅင်းၼႆႉ ပဵၼ် 2 တီႈ၊ တူၵ်းသႂ်ႇႁၢၼ်ႉမႄးၵႃး တီႈၼႂ်းပွၵ်ႉ 8  ၊ ရူတ်ႉၵႃး လူႉၵွႆလၢႆလမ်း၊ ထႅင်ႈတီႈၼိုင်ႈသမ်ႉ တူၵ်းသႂ်ႇ ၵူၼ်းတီႈဝၢၼ်ႈၶူဝ်မုင်းၼၼ်ႉ တၢႆထင်တီႈထႅင်ႈ 3 ၵေႃႉ။ ၶဝ် 3 ၵေႃႉၼၼ်ႉ ဢမ်ႇၸႂ်ႈၵူၼ်းပိုၼ်ႉတီႈ ပဵၼ်ၵူၼ်းတၢင်းမိူင်းမၢၼ်ႈ တူင်ႈပဵင်း မႃးႁႃႁဵတ်းၵၢၼ် ႁႃ ၵိၼ်လဵင်ႉတွင်ႉတၢင်းၼႆႉၵူၺ်း။ ဢၼ်မၢၵ်ႇလူင် တူၵ်းသႂ်ႇ 2 ဢွင်ႈတီႈၼႆႉ ၶၢဝ်းယၢမ်းဢမ်ႇပေႃးပိူင်ႈ ၵၼ် ၵူၼ်းၵျွၵ်ႉမႄးလၢတ်ႈၼႄဝႆႉၼင်ႇၼႆ-

“ၼႂ်းပွၵ်ႉ 8 ၼၼ်ႉတႄႉ မၢၵ်ႇလူင်တူၵ်းသႂ်ႇၵႃးသေ ၾႆးမႆႈ။ ပဵၼ်ႁၢၼ်ႉမႄးၵႃးဢေႃႈ။ ထႅင်ႈတီႈသမ်ႉ ပဵၼ်တီႈၶူဝ်မုင်း ၶႃႈဢေႃႈ။ ၶဝ်တေႁဵတ်းၵၢၼ်သေ တိုၵ်ႉလိုဝ်ႈယူႇ။ မၢၵ်ႇလူင်တူၵ်းသႂ်ႇၶဝ်သေ တၢႆထင် တီႈ 3 ၵေႃႉ။ ၶဝ်တိုၵ်ႉၼင်ႈလိုဝ်ႈ ဢုပ်ႇၵၼ် ယူႇတီႈတင်ႇၼင်ႈၼၼ်ႉ မၢၵ်ႇလူင်သမ်ႉ မႃးတူၵ်းသႂ်ႇလႄႈ ၸင်ႇတၢႆၶမ်တင်ႇဝႆႉ။ ၶဝ်ၼႆႉ လႅပ်ႈတေပဵၼ် ၵူၼ်းတၢင်းမိူင်းမၢၼ်ႈၵူၺ်း”- ဝႃႈၼႆ။

ၵူၼ်းဢၼ်ၺႃး မၢၵ်ႇလူင်တူၵ်းသႂ်ႇ လူႉတၢႆထင်တီႈၼႆႉ သႅၼ်းပၢၼ်ဢႃယု မီး 40- 50 ၸိူဝ်းၼႆႉ တင်း 3 ၵေႃႉ ပဵၼ် ၸၢႆး 2 ၵေႃႉလႄႈ ယိင်းၵေႃႉၼိုင်ႈ။ ၵူၼ်းမိူင်း မၢတ်ႇၸဵပ်းလူႉတၢႆ ၸွမ်းပၢင်တိုၵ်း ၸိူင်ႉၼႆၼႆႉ ၸိူဝ်းဢၼ်ၵူၼ်းတၢင်းၼွၵ်ႈဢမ်ႇႁူႉ ဢမ်ႇႁၼ်မႅၼ်ႈ ဢမ်ႇယိုၼ်းထိုင်လႆႈၵေႃႈ ၸၢင်ႈမီးထႅင်ႈ တင်းၼမ်ၼႆ ၵူၼ်းပိုၼ်ႉတီႈလၢတ်ႈ။

ၶမ်ႈဝႃးတင်းၶိုၼ်းၵေႃႈ သဵင်ၵွင်ႈတိုၵ်ႉတႅၵ်ႇယူႇဢမ်ႇထၢတ်ႇ ထိုင်မိူဝ်ႈၼႆႉ ဝၼ်းတီႈ 17 ၵေႃႈ တိုၵ်ႉယိုဝ်းၵၼ်ယူႇ။ သဵင်မၼ်းမေႃးမႃး တၢင်းဝၢၼ်ႈၼွင်ပိင်ဢွၼ်ႇ၊ တူဝ်းၵဵတ်ႉဢေႊသျႃႊဝေႃႊလႄႈ ပၢင်ပဝ်းလူင်။ ၶဝ်ယိုဝ်းၵၼ်ၸွမ်း ၼႂ်းပႃႇ ၼႂ်းထိူၼ်ႇၶႅပ်ႇဝဵင်းၸိူဝ်းၼၼ်ႉလႄႈ လွင်ႈပိူင်ပဵၼ်ၶဝ်တႄႉတႄႉ ဢမ်ႇႁူႉႁၼ်ၸွမ်း။ မၢင်ၵေႃႉလၢတ်ႈဝႃႈ ႁၼ်ၶိူင်ႈမိၼ်သိုၵ်းမၢၼ်ႈ မႃးပၼ်ႇလဵပ်ႈပွႆႇမၢၵ်ႇၵႂႃႇၵေႃႈမီးၼႆ ၵူၼ်းၵျွၵ်ႉမႄးလၢတ်ႈၼႄဝႆႉၼင်ႇၼႆ –

“မိူဝ်ႈဝႃး တင်းၶိုၼ်း ထိုင်မိူဝ်ႈၼႆႉၵေႃႈ တိုၵ်ႉလႆႈငိၼ်းသဵင်ႈၵွင်ႈယူႇ။ ၶဝ်တေတိုၵ်းၵၼ် ၸွမ်းသဵၼ်ႈ တၢင်းလူင်တႄႉ ဢမ်ႇၸႂ်ႈ။ ၶဝ်တေယိုဝ်းၵၼ်ၸွမ်း ၼႂ်းပႃႇၼႂ်းထိူၼ်ႇ ၸိူဝ်းၼၼ်ႉဢေႃႈ။ မၢင်ၵေႃႉ ၵေႃႈဝႃႈ ႁၼ်သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ သႂ်ႇ 2 ၵမ်းၼႆဢေႃႈ။ ယွၼ်ႉသဵင်ၵွင်ႈ သႅၼ်းလဵၵ်ႉ သႅၼ်းယႂ်ႇ မေႃးပၼ်းဝႆႉလႄႈ ၽႂ်ၵေႃႈ ဢမ်ႇတၼ်း ၸႅၵ်ႇလႆႈဝႃႈ ပဵၼ်သဵင်မၢၵ်ႇသင်လၢႆလၢႆ”- ဝႃႈၼႆ။  

ဝၼ်းတီႈ 15/7/2024 ယၢမ်းဝၢႆးဝၼ်း ၼၼ်ႉၵေႃႈ မၢၵ်ႇလူင်တူၵ်းသႂ်ႇ တီႈႁၢၼ်ႉၶၢႆၶဝ်ႈၽၵ်း ပွၵ်ႉပၢင်ပဝ်းလူင် ဝဵင်းၵျွၵ်ႉမႄး ၽူႈၸၢႆးၵေႃႉၼိုင်ႈ လူႉတၢႆထင်တီႈ။

ၵူၼ်းမိူင်းၵျွၵ်ႉမႄးၼႆႉ ၵိၼ်းၸႂ်ယွၼ်ႉပၢင်တိုၵ်းမႃးလၢႆပွၵ်ႈ ၊ ပၢႆႈယဝ်ႉလႆႈပၢႆႈထႅင်ႈ။ ၵူၼ်းၸိူဝ်းမီး ဢဵၼ်မီးႁႅင်း ပၢႆးယူႇလီၶႅမ်ႉတႄႉ ပၢႆႈလႆႈငၢႆႈယူႇသေတႃႉ ၵူၼ်းၸိူဝ်းသႅၼ်းဢႃယုယႂ်ႇ၊ ၵူၼ်းဢမ်ႇၸၢင်ႈ ပၢႆ ၸိူဝ်းၼႆႉတႄႉ ပဵၼ်ဢၼ်ယၢပ်ႇ ၵိၼ်းၶၢၼ်ၸႂ်။ ၵူၼ်းၸပ်းတၢင်းပဵၼ်ႁႅင်း ဢမ်ႇတူင်ႉတူဝ်လႆႈ ၸိူဝ်းၼႆႉ ပေႃးၶၢႆႉၵႂႃႇၶၢႆႉမႃး ဢမ်ႇသၢင်ႇထုၵ်ႇ သၢႆၸႂ်ၶဝ် ၸၢင်ႈလူႉပႃးၵွၼ်ႇယဝ်ႉ။ ယွၼ်ႉၼၼ် ၶႂ်ႈႁႂ်ႈပၢင် တိုၵ်းၵိုတ်းပၼ်ဝႆးဝႆးၵူၺ်းယဝ်ႉၼႆ – ၵူၼ်းၵျွၵ်ႉမႄး ဢွၼ်ၵၼ်တုၵ်းယွၼ်း ၼင်ႇၼႆ။