လိူၼ်ၵျူႊလၢႆႊၼႆႉၵူၺ်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းသႅၼ်ဝီ ဢမ်ႇယွမ်း 3 ပွၵ်ႈယဝ်ႉ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလူႉတၢႆ ၵေႃႉၼိုင်ႈ။
ဝၼ်းတီႈ 13/7/2024 ယၢမ်းၵၢင်ၶမ်ႈ 9 မူင်း မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇထႅင်ႈ တီႈပွၵ်ႉဝဵင်းၼၢင်း တၢင်းၽႄၵူတ်ႉ ၶၢႆလႄႈ ၵုၼ်လူင် ၼႂ်းဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇရူတ်ႉၵႃးလႄႈ ႁိူၼ်းယေးၵူၼ်းမိူင်း လူႉၵွႆ ၵမ်ႈၽွင်ႈ ဝႃႈၼႆ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇဢေႃႈ တိူဝ်ႉၺႃးၵႃးလမ်းၼိုင်ႈ။ ယဝ်ႉၵေႃႈ သဝ်ၾႆးႁၵ်းလူမ်ႉတဵင်တၢင်း၊ ၸၢၵ်ႇမၢၵ်ႇ တိူဝ်ႉၺႃးႁိူၼ်းယေး ၵူၼ်းဝၢၼ်ႈလူႉၵွႆၸွမ်းထႅင်ႈ ဢမ်ႇယွမ်း 3 – 4 လင်။ လွင်ႈတုမ်ႉတိူဝ်ႉ ၵူၼ်းမိူင်းလူႉတၢႆမၢတ်ႇၸဵပ်းတႄႉ ဢမ်ႇမီး”- ဝႃႈၼႆ။
ၸွမ်းၼင်ႇ ၽႅၼ်ၵၢၼ်ယၼ်ႇသိုၵ်း 1027 ၸုမ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇသေ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ ဝဵင်းသႅၼ်ဝီ မႃးႁၢၼ်ႉတေႃႇထိုင်ယၢမ်းလဵဝ် ဝႃႈၼႆ။
ၼႂ်းလိူၼ်ၼႆႉၵူၺ်း သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇ တီႈဝဵင်းသႅၼ်ဝီၼႆႉ မိူဝ်ႈဝၼ်းတီႈ 3 ယၢမ်းဝၢႆးဝၼ်း 2 မူင်းပၢႆ မႃးပွႆႇသႂ်ႇတီႈဢိူင်ႇမိူင်းလီ တိူဝ်ႉၺႃး ၽူႈၸၢႆး လူႉတၢႆၵိုၵ်းႁိူၼ်း ၵေႃႉၼိုင်ႈ။ ဝၼ်းတီႈ 4 ယၢမ်းၵၢင်ၼႂ် 12:15 (တဵင်ႈ ၶိုၼ်းၸၢႆႉ) မႃးပွႆႇထႅင်ႈ 3 လုၵ်ႈ တီႈပွၵ်ႉ 2 ႁူင်းပလိၵ်ႈမၢၼ်ႈ ၼၼ်ႉၵေႃႈ တိူဝ်ႉၺႃး ႁိူၼ်းယေးၵူၼ်းမိူင်းလူႉၵွႆ (ယွၵ်းယွႆ) ထႅင်ႈ သွင်လင်။
ထိုင်မႃး ဝၼ်းတီႈ 12 ယၢမ်းၵၢင်ၼႂ် 1 မူင်းၶိုင်ႈ မၢၵ်ႇၶိူင်ႈမိၼ် မႃးတူၵ်းသႂ်ႇထႅင်ႈ တီႈႁူင်းႁဵၼ်းၸၼ်ႉသုင် မၢႆ 1 တင်း မၢႆ 2 ၼၼ်ႉၵေႃႈ ႁူင်းႁဵၼ်း လူႉၵွႆ (ယွၵ်းယွႆ) တင်းသွင်လင် ၼႆယဝ်ႉ။
လိူဝ်ၼၼ်ႉ ယူႇတီႈ တပ်ႉသိုၵ်းၵဝ်ႈၵၢင်ႉ ပိုၼ်ၽၢဝ်ႇဢွၵ်ႇဝႆႉဝႃႈ တႄႇဢဝ် ဝၼ်းတီႈ 14 ယၢမ်းၵၢင်ၶိုၼ်း တေႃႇထိုင် ဝၼ်းတီႈ 18 ယၢမ်းၵၢင်ၶိုၼ်း 12 မူင်း တေၵိုတ်းပၢင်တိုၵ်း ဝႆႉၸူဝ်ႈၶၢဝ်း တႃႇၶၢဝ်းတၢင် 4 ဝၼ်း ဝႃႈၼႆ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁႂ်ႈဝႃႈ ၶဝ်ၵိုတ်းတိုၵ်း 4 ဝၼ်းဝႃႇ တီႈလႃႈသဵဝ်ႈၼႆႉ ၶဝ်တိုၵ်ႉယိုဝ်းၵၼ်ယူႇ မိူဝ်ႈဝႃး ဝၼ်းတီႈ 15 ၼႆႉ မၢၵ်ႇလူင် တိုၵ်ႉမႃးတူၵ်းသႂ်ႇ တီႈၼႂ်းပွၵ်ႉ 8 လႄႈ ပွၵ်ႉ 12 တိူဝ်ႉၺႃး လုၵ်ႈ ဢွၼ်ႇ မၢတ်ႇၸဵပ်း ၵေႃႉၼိုင်ႈ”- ဝႃႈၼႆ။
လိူဝ်ၼၼ်ႉ မိူဝ်ႈဝႃး ဝၼ်းတီႈ 15 ယၢမ်းဝၢႆးဝၼ်း 4 မူင်းပၢႆ ၼၼ်ႉၵေႃႈ သိုၵ်းၵဝ်ႈၵၢင်ႉ ႁႅၼ်းသိုၵ်း လေႃႇတိုၵ်း တပ်ႉသိုၵ်းမၢၼ်ႈ ၶလယ 23 တီႈဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉသေ ယိုတ်းၵုမ်းလႆႈ တပ်ႉပၢင်သဝ်း သိုၵ်းမၢၼ်ႈၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ