မိူဝ်ႈၼႆႉ ဝၼ်းတီႈ 16/07/2024 ၵူၼ်းမိူင်းလႃႈသဵဝ်ႈ လၢတ်ႈဝႃႈ သိုၵ်းမၢၼ်ႈ ထႅမ်ႁႅင်းၵူၼ်းလႄႈ ၶူဝ်းၶွင်ၸႂ်ႉၼႂ်းၵၢၼ်သိုၵ်း လူၺ်ႈတၢင်းၶိူင်ႈမိၼ် တင်းၼမ်တင်းလၢႆ တႄႇၸဵမ်မိူဝ်ႈဝႃးမႃး တေႃႇထိုင်ယၢမ်းလဵဝ် ဝႃႈၼႆ။

ၽွင်းသိုၵ်းၵဝ်ႈၵၢင်ႉ ပိုၼ်ၽၢဝ်ႇၵိုတ်းယိုဝ်း ၶၢဝ်းတၢင်း 4 ဝၼ်းၼႆႉ သိုၵ်းမၢၼ်ႈ ၼႅတ်ႈထႅမ်ႁႅင်းသိုၵ်း၊ ၶိူင်ႈမိၼ်တၢင်ႇ ၵူၼ်းသိုၵ်း ၼပ်ႉႁူဝ်ပၢၵ်ႇၵေႃႉလႄႈ ထူင်ႁိၼ်သၢႆး မႃးလူင်းတီႈဝဵင်းလႃႈသဵဝ်ႈၼပ်ႉႁူဝ်မိုၼ်ႇ ႁူဝ်သႅၼ်ထူင်။

ၵူၼ်းလႃႈသဵဝ်ႈ လၢတ်ႈဝႃႈ – “ပိုၼ်ၽၢဝ်ႇ ၵိုတ်းတိုၵ်းၵေႃႈ မိူၼ်တၢင်းပၼ်ၶၢဝ်းယၢမ်း ႁႂ်ႈၶဝ်ႁၢင်ႈႁႅၼ်း တႃႇႁူမ်ႇလူမ်ႈၶဝ် ၵူၺ်းယဝ်ႉ။ သူင်ႇထူင်ႁိၼ်ထူင်သၢႆးလူင်းတႃႇႁႄႉတႃႇၵင်ႈ တႃႇႁဵတ်းလုၵ်းပဵမ်ႇလုၵ်းထႅၼ်ႉ။ ၶူဝ်းၶွင်ၵိၼ်ယႅမ်ႉလႄႈ မၢၵ်ႇမိုဝ်ႈၸိုၼ်းယၢမ်း ဢၼ်ပဵၼ်တိူၵ်ႈပဵၼ်ထူင်ၵေႃႈ ပွႆႇလူင်းၸွမ်းၸွင်ႈလူမ်းဢေႃႈ” – ဝႃႈၼႆ။

ဝၼ်းတီႈ 15 ဝၢႆးလင် သိုၵ်းၵဝ်ႈၵၢင်ႉ ပိုၼ်ၽၢဝ်ႇဝႃႈ ၵိုတ်းတိုၵ်းဝႆႉၸူဝ်ႈၶၢဝ်း ၼႆယဝ်ႉၼၼ်ႉ သိုၵ်းမၢၼ်ႈ သူင်ႇၶူဝ်းၶွင် ၵိၼ်ယႅမ်ႉလႄႈ ႁႅင်းသိုၵ်း ပၼ်ၼႂ်းတိူင်းသိုၵ်းယမၶၶဝ် တၢင်းၼႃႈလိၼ်သိုၵ်း ၼႂ်းၸႄႈဝဵင်းလႃႈသဵဝ်ႈ ၸိူဝ်းၼႆႉ။

ပၢင်တိုၵ်းၼႆႉ ယဵၼ်ၼႂ်းဝဵင်းလႃႈသဵဝ်ႈၵူၺ်း ၸွမ်းႁိမ်းႁွမ်းလႄႈ သၢပ်ႇဝဵင်း တၢင်းၼွၵ်ႈဝဵင်းၸိူဝ်းၼႆႉတႄႉ တိုၵ်ႉလႆႈငိၼ်းသဵင်ၵွင်ႈသဵင်မၢၵ်ႇယူႇ – ၵူၼ်းလႃႈသဵဝ်ႈ လၢတ်ႈၼင်ႇၼႆ။