သိုၵ်းမၢၼ်ႈ ယိုတ်းမိူင်း ဢၼ်ပၵ်းဝႆႉတီႈဝဵင်းၵၢတ်ႇလေႃႉၼၼ်ႉ ထႅမ်ႁႅင်းသိုၵ်းမႃးတၢင်း ၸိုင်ႈတႆးပွတ်းႁွင်ႇၼႆႉ ၼပ်ႉႁူဝ်ပၢၵ်ႇ ဝႃႈၼႆ။

ဝၼ်းတီႈ 14/7/2024 ၼႆႉ သိုၵ်းမၢၼ်ႈ တပ်ႉမ 55 ဢၼ်ပၵ်းတပ်ႉဝႆႉတီႈဝဵင်းၵၢတ်ႉလေႃႉ ၸိုင်ႈတႆး ပွတ်းၸၢၼ်းၼၼ်ႉ ထႅမ်ႁႅင်းသိုၵ်း ၵႃး 32 လမ်း မႃးၶွၼ်ႈတုမ်ၵၼ် တီႈတပ်ႉပထူး ဝဵင်းလွၵ်ႉၸွၵ်ႇသေ သိုပ်ႇၵႂႃႇၸွမ်းသဵၼ်ႈတၢင်း လွၵ်ႉၸွၵ်ႇ – ၵျွၵ်ႉၵူႇ – ဢၢင်ႇတေႃး ထိုင်ၵႂႃႇတီႈငဝ်ႈငုၼ်း ၾၢႆႇၵုမ်းၵမ် ၶိူင်ႈၵွင်ႈလူင် မၢႆ 902 တီႈထုင်ႉတွင်းၶမ်း ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၼႆယဝ်ႉ။

ယွၼ်ႉဝႃႈ မိူဝ်ႈဝၼ်းတီႈ 10 ပူၼ်ႉမႃးၼႆႉ သိုၵ်းတဢၢင်း TNLA တင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ 606 ဝဵင်းၼွင်ၶဵဝ်ၼႆႉသေ ယိုတ်းၵုမ်းလႆႈဝႆႉတင်းဝဵင်းလႄႈ ထိုင်မႃး ဝၼ်းတီႈ 12 သမ်ႉ သိုပ်ႇလေႃႇတိုၵ်း တပ်ႉသိုၵ်းမၢၼ်ႈ ဢၼ်ပႂ်ႉတီႈႁူၺ်ႈၵိုတ်ႈၼၼ်ႉ ထုၵ်ႇယိုတ်ႈၵုမ်းလႆႈထႅင်ႈ ဝႃႈၼႆ။

ၽွင်းငဝ်းလၢႆးၼင်ႇၼႆ  သိုၵ်းမၢၼ်ႈမႆႈၸႂ် ၵူဝ်သိုၵ်းတဢၢင်း TNLA တင်း PDF ၶဝ်ႈလေႃႇတိုၵ်းငဝ်ႈ ငုၼ်းၾၢႆႇၵုမ်းၵမ်ၶိူင်ႈၵွင်ႈလူင် 902 ဢၼ်မီးၾၢႆႇၸၢၼ်းဝဵင်းၼွင်ၶဵဝ် တီႈထုင်ႉတွင်းၶမ်းၼၼ်ႉလႄႈ ၸင်ႇဢဝ်တပ်ႉမ 55 တီႈၵၢတ်ႇလေႃႉၼၼ်ႉ ထႅမ်ႁႅင်းသိုၵ်းမႃး ၵႃးသိုၵ်း 30 ပၢႆၼႆ ၵူၼ်းၸမ်ၸႂ် တင်းသိုၵ်းမၢၼ်ႈၵေႃႉၼိုင်ႈ လၢတ်ႈ။

တပ်ႉမ 55 ၼႆႉ ဢဝ်တပ်ႉၵွင် 10 တပ်ႉၵွင် ၸိူဝ်းမီးတီႈ ဝဵင်းၵၢတ်ႇလေႃႉ၊ ယွင်ႁူၺ်ႈ၊ ႁၢႆးႁူဝ်း၊ သီႇၵိပ်ႇလႄႈ တပ်ႉပထူး ႁူမ်ႈၵၼ်ဝႆႉ။ မိူဝ်ႈၸုမ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်းသိုၵ်းမၢၼ်ႈ လူၺ်ႈၽႅၼ်ၵၢၼ်ယၼ်ႇသိုၵ်း 1027 ၼႂ်းၸိုင်ႈတႆးပွတ်းႁွင်ႇၼၼ်ႉ။ ၼႂ်းလိူၼ်ၵျႅၼ်ႊၼိဝ်ႊရီႊၼၼ်ႉ ၽူႈမီးၸၼ်ႉၼႂ်းသိုၵ်းမၢၼ်ႈလၢႆလၢႆၵေႃႉ ႁူမ်ႈပႃး တပ်ႉမ 55 ယၢမ်ႈဝၢင်းၶိူင်ႈတီႈ သိုၵ်းၵဝ်ႈၵၢင်ႉ MNDAA မႃး ဝႃႈၼႆ။

မိူၼ်ၼႆ ၼႂ်းဝၼ်းတီႈ 15 ၼႆႉ မီးၶၢဝ်ႇဢွၵ်ႇမႃးဝႃႈ သိုၵ်းမၢၼ်ႈ ဢဵၼ်ႁႅင်းမွၵ်ႈ 300 လုၵ်ႉတၢင်းဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း ထႅမ်ႁႅင်းသိုၵ်းၶဝ်ႈမႃးတၢင်း ထုင်ႉတွင်ႇၶျေႇ ၾၢႆႇၸၢၼ်းဝဵင်းၵျွၵ်ႉမႄးသေ လတ်းၵႂႃႇတၢင်းၼႃးပုင်ႇ – ၼႃးပဵင်းလႄႈ ၼွင်ပိင်ဢွၼ်ႇ ယဝ်ႉၵေႃႈ မုင်ႈၼႃႈၸူးၼႂ်းဝဵင်း ၵျွၵ်ႉမႄးဝႆႉ ဝႃႈၼႆ။