တႄႇႁူဝ်လိူၼ်ၵျူႊလၢႆးၼႆႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ် ၼႂ်းၸႄႈဝဵင်းမိူင်းယႆသေ ႁဵတ်းႁႂ်ႈမၢၵ်ႇလူင် တူၵ်းသႂ်ႇႁိူၼ်းယေးၵူၼ်းမိူင်း လူႉၵွႆၸွမ်းလၢႆလင်။

တႄႇဢဝ် ဝၼ်းတီႈ 11/7/2024 မႃးၼႆႉ သိုၵ်းဝႃႉ UWSA တင်း သိုၵ်းတႆး SSPP ၵေႃႈ ႁႅၼ်းသိုၵ်းၶဝ်ႈ မႃးၼႂ်းၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇထႅင်ႈ တင်းၼမ်သေ ႁဵတ်းႁႂ်ႈၵူၼ်းမိူင်းတူၵ်းၸႂ် တိုၼ်ႇသၢၼ်ႈ ၵူဝ်ပဵၼ်ပၢင်တိုၵ်း ၵိူတ်ႇၶိုၼ်ႈထႅင်ႈႁၢဝ်ႈႁႅင်း ၼႆယဝ်ႉ။

ၵူၼ်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် သိုၵ်းၵေႃႈ လေႃးလႄးၵၼ်ဝႆႉမူတ်းယဝ်ႉၶႃႈ။ ၶဝ်ယူႇဢိူမ်ႈၵၼ်ဝႆႉ မွၵ်ႈသီႇႁႃႈဝႃးၼႆႉၵူၺ်း။ ႁႂ်ႈၶဝ်ယူႇၸွမ်းၵၼ်တႄႉၵေႃႈ ဢမ်ႇယူႇၼင်ႇၵဝ်ႇ။ မိူၼ်ၸိူင်ႉၼင်ႇ ၾၢႆႇႁွင်ႇဝဵင်း တီႈႁိမ်းတပ်ႉ 67 ဢၼ်ယၢၼ်ၵႆၵၼ် တင်းမိူင်းယႆ 5 လၵ်းၼၼ်ႉၵေႃႈ တေမီးသိုၵ်းမၢၼ်ႈ၊ သိုၵ်းၵဝ်ႈၵၢင်ႉ၊ သိုၵ်းဝႃႉၶဝ် ယူႇဢိူမ်ႈ ၵၼ်ဝႆႉ။ ၵူႈဝၼ်းတႄႉ ဢမ်ႇႁၼ်သိုၵ်းမၢၼ်ႈၶဝ်ပႃးၵွင်ႈ၊ မိူဝ်ႈၼႆႉ ႁဝ်းၶႃႈ လတ်းၵႂႃႇမႃး တီႈၼႃႈတပ်ႉၶဝ် 67 ၼၼ်ႉ ႁၼ်ၶဝ်ယိပ်းၵွင်ႈဝႆႉဢေႃႈ ၵူႈပွၵ်ႈ ဢမ်ႇႁၼ်ၶဝ် ယိပ်းၶႃႈ။ ပဵၼ်ဢၼ်လၢၵ်ႇလၢႆးဝႆႉလႄႈ ၵူဝ်ပဵၼ်ပၢင်တိုၵ်း ၵူၺ်းယဝ်ႉၶႃႈ”- ဝႃႈၼႆ။

ယၢမ်းလဵဝ် တီႈဝဵင်းမိူင်းယႆၼႆႉ သဵင်ၵွင်ႈယဵၼ်ဝႆႉ 4 ဝၼ်းယဝ်ႉသေတႃႉ ယွၼ်ႉသိုၵ်းလၢႆမူႇလၢႆၸုမ်း ထႅမ်ႁႅင်းသိုၵ်း ယူႇလေႃးၵၼ်ဝႆႉလႄႈ သင်ဝႃႈ ၸုမ်းလုၵ်ႈၽိုၼ်ႉၶဝ် ပေႉသိုၵ်းသေ ၵုမ်းလႆႈဝဵင်းဝႆႉၼႆၸိုင် ၵူဝ်ၾၢႆႇသိုၵ်းမၢၼ်ႈ တေၸၢင်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇ သႂ်ႇၼႂ်းဝၢၼ်ႈၼႂ်းဝဵင်းလႄႈ ႁဵတ်းႁႂ်ႈၵူၼ်း မိူင်းမႆႈၸႂ်ဝႆႉပႃး လွင်ႈၼႆႉထႅင်ႈ ဝႃႈၼႆ။

“ပိူင်လူင်တႄႉ ၶၢဝ်းၼႆႉ ပဵၼ်ၶၢဝ်းသွမ်ႈၼႃး ၊ ၵမ်ႈၽွင်ႈၵေႃႈ တၼ်းသွမ်ႈယဝ်ႉ ၵမ်ႈၽွင်ႈၵေႃႈ ပႆႇတၼ်းသွမ်ႈ ၊ ၵမ်ႈၽွင်ႈ ၽုၵ်ႈၵႃႈဝႆႉသေ ယွၼ်ႉၵုမ်ႇၵူဝ်ၽေးသိုၵ်းၵူၺ်းလႄႈ တူၼ်ႈၶဝ်ႈဢၼ်ၵႃႈဝႆႉၼၼ်ႉ ပေႃးယႂ်ႇပူၼ်ႉပႅတ်ႈလၢႆလၢႆၵေႃႈမီး။ တႃႇပီတေမႃးၼႆႉ လွင်ႈၵိၼ်ယႅမ်ႉ တေၵုမ်ႇထူၼ်ႈ ဢမ်ႇ ၵုမ်ႇထူၼ်ႈတႄႉ ဢမ်ႇႁူႉယဝ်ႉၶႃႈ”- ၵူၼ်းမိူင်းယႆ သိုပ်ႇလၢတ်ႈၼႄၼင်ႇၼႆ။

မိူဝ်ႈဝၼ်းတီႈ 12/7/2024 ယၢမ်းၵၢင်ၼႂ် သိုၵ်းမၢၼ်ႈ ၸႂ်ႉၵူၼ်းဝၢၼ်ႈၸၢင်ႉ ဢၼ်ယၢၼ်ဝဵင်းမိူင်းယႆ မွၵ်ႈ 8 လၵ်း ၶၢႆႉ ဢွၵ်ႇဝၢၼ်ႈ ဝႃႈၼႆသေတႃႉ ထိုင်မႃးယၢမ်းဝၢႆးဝၼ်း ယွၼ်ႉၼႂ်းပိုၼ်ႉတီႈ မီးလွင်ႈလႅၵ်ႈလၢႆႈလႄႈ ဢမ်ႇထိုင်တီႈလႆႈၶၢႆႉ ဢွၵ်ႇဝၢၼ်ႈ၊ ၵူၼ်းဝၢၼ်ႈတႄႉ တိုၵ်ႉလႆႈပႂ်ႉတူၺ်းငဝ်းလၢႆးဝႆႉယူႇ ႁၢၼ်ႉတေႃႇထိုင် ဝၼ်းမိူဝ်ႈၼႆႉ။

ယၢမ်းလဵဝ် တီႈဝဵင်းမိူင်းယႆၼႆႉ သိုၵ်းမၢၼ်ႈ၊ သိုၵ်းၵဝ်ႈၵၢင်ႉ၊ သိုၵ်းဝႃႉ ၶဝ်ၸိူဝ်းၼႆႉ ဢဝ်တီႈယူႇဝႆႉၸွမ်းသၢပ်ႇဝဵင်းသေ သိုၵ်းတႆး SSPP ဢဵၼ်ႁႅင်းၼပ်ႉႁူဝ်ႁဵင်သမ်ႉ ၶဝ်ႈဢဝ်တီႈယူႇ ၸွမ်းဢွင်ႈတီႈလမ်ႇလွင်ႈ ၼႂ်းဝဵင်းမိူင်းယႆဝႆႉ – ၵူၼ်းမိူင်းယႆလၢတ်ႈ။