ၽွင်းငဝ်းလၢႆးဝၢၼ်ႈမိူင်းသုၵ်ႉ ပၢင်တိုၵ်းသိုၵ်းသိူဝ် ပဵၼ်ယူႇၸိူင်ႉၼႆ ၼင်ႇႁိုဝ် ၵူၼ်းဝၢၼ်ႈၵူၼ်းသူၼ် ပေႃးတေဢမ်ႇလႆႈယၢပ်ႇၽိုတ်ႇ လူၺ်ႈၶဝ်ႈၼမ်ႉတၢင်းၵိၼ်ၼႆႉ ယူႇတီႈ ၸုမ်းမေႃသွၼ် ဝဵင်းလႃႈသဵဝ်ႈ လႆႈပိုတ်ႇႁၢၼ်ႉၶၢႆ ၶဝ်ႈသၢၼ်ထုၵ်ႇ တႃႇၸွႆႈထႅမ်ၵၼ်ၵႂႃႇ ဝႃႈၼႆ။

ဝၼ်းတီႈ 12/7/2024 ယၢမ်းႁူဝ်ၶမ်ႈ 5 မူင်း ယူႇတီႈ ၸုမ်းမေႃသွၼ် A – ရတၼႃႇ (ပၢင်ႁဵၼ်းလိၵ်ႈတႆး ၶၢဝ်းယၢဝ်း) သေ လႆႈပိုတ်ႇၶၢႆၶဝ်ႈသၢၼ် ၵႃႈၶၼ်ထုၵ်ႇ၊ ၼမ်ႉမၼ်းၵိၼ်၊ ၶႆႇၵႆႇလႄႈ ၽၵ်းမီႇလႅင် ၸိူဝ်းၼႆႉ တီႈဝၢၼ်ႈႁူးမူၼ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

ၽူႈဢွၼ်ႁူဝ် ၸုမ်းမေႃသွၼ် A – ရတၼႃႇ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ဢမ်ႇၸႂ်ႈႁႃငိုၼ်းၵွင်ၵၢင် ႁဝ်းၶႃႈ မႃး ၸွႆႈထႅမ် ပီႈၼွင်ႉၵူၼ်းဝၢၼ်ႈၵူၼ်းသူၼ်ႁဝ်း ၸိူဝ်းဢမ်ႇငိူင်ႉပၢႆႈၽေးၵႂႃႇတၢင်းလႂ် ဢွၼ်ၵၼ် ယူႇဝႆႉ ၼႂ်းမူႇဝၢၼ်ႈၸိူင်ႉ ၼႆဢေႃႈ။ ဢၼ်ႁဝ်းၶႃႈ လႆႈၸတ်းႁၢၼ်ႉၶၢႆၶဝ်ႈသၢၼ် ၵႃႈၶၼ်ထုၵ်ႇၼႆႉ ပေႃးႁဝ်းၸႅၵ်ႇပၼ်လၢႆလၢႆ (ၾရီး) ပၼ်ၵူၼ်းဝၢၼ်ႈၸိုင် မၢင်ၸိူဝ်းသမ်ႉ ဢမ်ႇၶႂ်ႈဢဝ် ၵွပ်ႈၼႆ ႁဝ်းၶႃႈ ႁႃလၢႆးတၢင်း ၼင်ႇႁိုဝ် ၵူႈၵေႃႉ ပေႃးတေလႆႈႁပ်ႉတၢင်းၸွႆႈထႅမ်ၼၼ်ႉ ႁဝ်းၶႃႈ ၸင်ႇလႆႈၸတ်းႁဵတ်း ႁၢၼ်ႉၶၢႆၶဝ်ႈသၢၼ်ထုၵ်ႇ ၼႆႉမႃးၶႃႈဢေႃႈ”- ဝႃႈၼႆ။

မိူၼ်ၼင်ႇ ၶဝ်ႈသၢၼ်သႅၼ်း 456 ၼႆႉ 1 ပေႇလႂ် 1,000 ပျႃး (ၶၼ်တၢင်းၼွၵ်ႈသမ်ႉ 1 ပေႇ 7,000 ပျႃး – 8,000 ပျႃး)၊ ၶႆႇၵႆႇ 1 ၵၢပ်ႈ (30 လုၵ်ႈ) ၶၢႆ 3,000 ပျႃး (ၶၼ်တၢင်းၼွၵ်ႈ 1 ၵၢပ်ႈ 10,000 ပျႃး)၊ ၼမ်ႉမၼ်းၵိၼ် 1 တဝ်ႈ 2,000 ပျႃး (ၶၼ်တၢင်းၼွၵ်ႈ 1 တဝ်ႈ 6,000 ပျႃး ထိုင် 7,000 ပျႃး) လႄႈ ၽၵ်းမီႇလႅင် 1 ၸွႆႉ 1,000 ပျႃး (ၶၼ်တၢင်းၼွၵ်ႈ 1 ၸွႆႉ 5,000 ပျႃး) ၼႆယဝ်ႉ။

“တႃႇတေပဵၼ်မႃးႁၢၼ်ႉၶၢႆၶဝ်ႈသၢၼ် ၵႃႈၶၼ်ထုၵ်ႇၼႆႉ ယူႇတီႈ ၸုမ်းႁဝ်းၶႃႈသေ လႆႈလူင်းတိုၼ်းလၢင်း ငိုၼ်း 30 သႅၼ်ပျႃး။ ႁဝ်းၶႃႈၶၢႆလႆႈမႃး 10 သႅၼ်ပျႃးပၢႆ တႃႇမွၵ်ႈ 20 သႅၼ်ပျႃးၼၼ်ႉ ႁဝ်းၶႃႈ ၸွႆႈထႅမ်ၵူၼ်း ဝၢၼ်ႈၵူၼ်းသူၼ်ႁဝ်းၶႃႈဢေႃႈ”- ၽူႈဢွၼ်ႁူဝ် ၸုမ်းမေႃသွၼ် A – ရတၼႃႇ သိုပ်ႇလၢတ်ႈၼႄၼင်ႇၼႆ။

ဝၢၼ်ႈႁူးမူၼ်ႈၼႆႉ တင်းမူတ်း မီးလင်ႁိူၼ်း 100 ပၢႆ ၵမ်ႈၼမ် ၵူၼ်းဝၢၼ်ႈႁဵတ်းၵိၼ်ၵၢၼ်သူၼ်ႁႆႈၼႃး။ ၽွင်းပၢင်တိုၵ်း တီႈဝဵင်းလႃႈသဵဝ်ႈၼႆႉ တီႈဝၢၼ်ႈႁူးမူၼ်ႈၼႆႉၵေႃႈ မၢၵ်ႇလူင်တူၵ်းသႂ်ႇၼႂ်းဝၢၼ်ႈ တိူဝ်ႉၺႃးႁိူၼ်းယေးလူႉၵွႆၸွမ်း ၵမ်ႈ ၽွင်ႈယူႇ။ ၵူၺ်းၵႃႈ ၵူၼ်းဝၢၼ်ႈတႄႉ ဢမ်ႇဢွၼ်ၵၼ်ပၢႆႈၽေး ဢွၵ်ႇၵႂႃႇတၢင်း လႂ် ဝႃႈၼႆ။

တႄႇဢဝ် ဝၼ်းတီႈ 2/7/2024 ၼႆႉမႃး သိုၵ်းၵဝ်ႈၵၢင်ႉ MNDAA ႁႅၼ်းသိုၵ်း လေႃႇတပ်ႉသိုၵ်းမၢၼ်ႈ ယိုတ်းမိူင်း မႃးႁၢဝ်ႈ ႁႅင်း ၼႂ်းၸႄႈဝဵင်းလႃႈသဵဝ်ႈ သွင်ၾၢႆႇၸႂ်ႉမၢၵ်ႇလူင်၊ တရူၼ်း ၸိူဝ်းၼႆႉ ပွႆႇမၢၵ်ႇၸူးၵၼ် ၶိူဝ်းယႂ်း။ ယဝ်ႉၵေႃႈ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းၸွႆႈထႅင်ႈ။

ယွၼ်ႉပၢင်တိုၵ်းၼႆႉသေ ၵူၼ်းမိူင်းၺႃးၸၢၵ်ႇမၢၵ်ႇလူႉတၢႆၸွမ်း ဢမ်ႇယွမ်း 30 ၵေႃႉ မၢတ်ႇၸဵပ်းၸွမ်း ဢမ်ႇယွမ်း 30 ၵေႃႉယဝ်ႉ။ လိူဝ်ၼၼ်ႉ ႁဵတ်းႁႂ်ႈၵူၼ်းမိူင်း ပၢႆႈၽေးသိုၵ်းထႅင်ႈ ၼပ်ႉႁူဝ်မိုၼ်ႇ ၼႆယဝ်ႉ။