ယၢမ်းလဵဝ် ၶၼ်ငိုၼ်းမၢၼ်ႈ တူၵ်းႁႅင်း ၸွမ်းလႅၼ်လိၼ်တႆး – ၶႄႇ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 64,500 ပျႃး ၶၼ်ၶမ်းသမ်ႉ 1 ဝၢတ်ႇလႂ် 5,800,000 ပျႃးပၢႆယဝ်ႉ ဝႃႈၼႆ။

ဝၼ်းတီႈ 11/7/2024 ယၢမ်းၵၢင်ၼႂ် ၶၼ်ငိုၼ်းၶႄႇ 100 ယႂၼ်ႊလႆႈငိုၼ်းမၢၼ်ႈ 64,300 ပျႃး ထိုင်မႃး ယၢမ်း ဝၢႆးဝၼ်းသမ်ႉ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 64,500 ပျႃးယဝ်ႉ ၼႂ်းၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ လႅၼ်လိၼ်တႆး – ၶႄႇ ၼႆယဝ်ႉ။

ၵူၼ်းလႅၵ်ႈငိုၼ်းၶႄႇ – မၢၼ်ႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၶၼ်ငိုၼ်းမၢၼ်ႈ တႄႇတူၵ်းႁႅင်းမႃးၼႆႉ တႄႇ ဢဝ် ဝၼ်းတီႈ 14 လိူၼ်ၵျုၼ်ႊၼၼ်ႉမႃး ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 54,500 ပျႃး။ ဝၼ်းတီႈ 16 လိူၼ် ၵျုၼ်ႊသမ်ႉ ငိုၼ်းၶႄႇ 100 ယႂၼ်ႊ လႆႈ 60,000 ပျႃ။ ထိုင်မႃး ဝၼ်းတီႈ 10 လိူၼ်ၼႆႉ ယၢမ်းၵၢင်ၼႂ် ငိုၼ်းၶႄႇ 100 ယႂၼ်ႊ လႆႈ 63,800 ပျႃး ဝၢႆးဝၼ်းသမ်ႉ 64,000 ပျႃး။ ဝၼ်းတီႈ 11 ၼႆႉ ငိုၼ်းၶႄႇ 100 ယႂၼ်ႊ လႆႈ 64,500 ပျႃးယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “ဢိင်ၼိူဝ် ၶၼ်ငိုၼ်းၶႄႇ ၶိုၼ်ႈၸိူင်ႉၼႆၼႆႉ ပႆႇယၢမ်ႈမီးမႃးၸိူင်ႉၼႆသေပွၵ်ႈ ၵမ်ႈၽွင်ႈဝႃႈ တေၶိုၼ်ႈထိုင် 70,000 ပျႃး – 80,000 ပျႃးၵေႃႈ ၸၢင်ႈပဵၼ်လႆႈ”- ဝႃႈၼႆ။

လိူဝ်သေ ၶၼ်ငိုၼ်းၶႄႇ ၶိုၼ်ႈႁႅင်း ၸိူင်ႉၼႆယဝ်ႉ မိူၼ်ၼင်ႇ ၶၼ်ၶမ်း တီႈဝဵင်းမူႇၸေႊၵေႃႈၶိုၼ်ႈ 1 ဝၢတ်ႇ လႂ် 5,830,000 ပျႃးယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ဢိင်ၼိူဝ် လွင်ႈၶၼ်ငိုၼ်းၶႄႇ၊ ၶၼ်ၶမ်းၶိုၼ်ႈ ၸိူင်ႉၼႆၼႆႉ ယူႇတီႈ ႁဝ်းၶႃႈ ထတ်းႁၼ်တႄႉ။ တီႈမူႇၸေႊၼႆႉ ယၢမ်းလဵဝ် တေထုတ်ႈငိုၼ်း တီႈပၢၼ်ႇ (Bank) ၸိုင် ဢမ်ႇထုတ်ႈလႆႈၼမ် မိူၼ်ၵူႈပွၵ်ႈယဝ်ႉ။ တေႃႇဝၼ်းလႂ် ထုတ်ႈလႆႈ 2 သႅၼ်ပျႃးၵူၺ်း ဢၼ်ၼႆႉ ၵေႃႈ လွင်ႈၼိုင်ႈ။ ယဝ်ႉၵေႃႈ တီႈမူႇ ၸေႊၼႆႉ ငိုၼ်းၶႄႇ ဢမ်ႇပေႃးမီးယဝ်ႉ ၼႆႉၵေႃႈ ပိူင်ၼိုင်ႈ။ ယွၼ်ႉပၢင် တိုၵ်း 1027 ၼႆႉသေ ႁဵတ်းႁႂ်ႈသဵၼ်ႈတႃႈသၢႆတၢင်းၶၢတ်ႇ ၶူဝ်းၵုၼ်ႇဢမ်ႇၸၢင်ႈၶဝ်ႈဢွၵ်ႇ တေႃႉသူင်ႇၶၢႆ တၢင်းမိူင်းၶႄႇ ၸိူဝ်းၼႆႉၵေႃႈပႃး၊ ယွၼ်ႉၵၢၼ်မိူင်း ဢမ်ႇၼိမ်ၸိူဝ်းၼႆႉၵေႃႈပႃး”- ဝႃႈၼႆ။

ၼွၵ်ႈလိူဝ်သေ ၶၼ်ငိုၼ်းၶႄႇ ၶိုၼ်ႈႁႅင်းယဝ်ႉ မိူၼ်ၼင်ႇ ငိုၼ်းထႆးၵေႃႈ မိူၼ်ၵၼ် မိူဝ်ႈၼႆႉ ဝၼ်းတီႈ 12 ယၢမ်းဝၢႆးဝၼ်းမွၵ်ႈ 1 မူင်း ငိုၼ်းထႆး 760 ဝၢတ်ႇ လႆႈငိုၼ်းမၢၼ်ႈ 100,000 ပျႃး။ ပေႃးဢဝ်ငိုၼ်းမၢၼ်ႈ လႅၵ်ႈငိုၼ်းထႆးသမ်ႉ ငိုၼ်းမၢၼ်ႈ 100,000 ပျႃး လႆႈငိုၼ်းထႆး 710 ဝၢတ်ႇ ၼႆယဝ်ႉ။