ၵူၼ်းဝၢၼ်ႈၵူၼ်းမိူင်း ဝၢၼ်ႈၵျွၵ်ႉမႄးလူင် တေႁူမ်ႈၵၼ်ၵႂႃႇတိူင်ႇလၢတ်ႈ တီႈၼေႇပျီႇတေႃႇ လွင်ႈတပ်ႉသိုၵ်းမၢၼ်ႈ ၶမယ 501 မႃးပၵ်းလၵ်းလွမ်ႉႁူဝ်ႉ ဢဝ်တီႈသူၼ်ၵူၼ်းဝၢၼ်ႈ။
ဝၼ်းတီႈ 05/06/2018 သိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 501 ၸႄႈဝဵင်းၵျွၵ်ႉမႄး ဢဵၼ်ႁႅင်းမွၵ်ႈ 15 ၵေႃႉ မႃးထဵတ်ႈထၢမ်ၵူၼ်းဝၢၼ်ႈသေ လွမ်ႉႁူဝ်ႉဢဝ်တီႈလိၼ် ဢၼ်ၵူၼ်း မိူင်းၽုၵ်ႇသွမ်ႈလဵင်ႉတွင်ႉမႃးၶၢဝ်းတၢင်းႁူဝ်ပၢၵ်ႇပီ ။
ၼၢင်းၼေႃႇ ၸဝ်ႈသူၼ်လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ သိုၵ်းမၢၼ်ႈၶဝ်မႃးထၢမ်ဝႃႈ သူမႃးထႆလိၼ်ၼႆႉ လႆႈလိၵ်ႈၶႂၢင်ႉတီႈလႂ်ၼႆ တီႈတႄႉမၼ်း တီႈလိၼ်ၼႆႉ ႁဝ်းၶႃႈၵူၼ်းဝၢၼ်ႈ ဢွၼ်ၵၼ်ၽုၵ်ႇသွမ်ႈႁႃၵိၼ်လဵင်ႉတွင်ႉမႃးပီယၢဝ်းၶၢဝ်းႁိုင် ပၢၼ်ပူႇမွၼ်ႇႁဝ်း ၼပ်ႉႁူဝ်ပၢၵ်ႇပီယဝ်ႉလူး ။ ပေႃးဝႃႈၶဝ် မႃးယိုတ်းဢဝ်တီႈလိၼ်ႁဝ်းၸိုင် ႁဝ်း ၶႃႈၵူၼ်းဝၢၼ်ႈထူပ်းတၢင်းယၢပ်ႇၶႃႈဢေႃႈ ဢမ်ႇၸၢင်ႈႁဵတ်းသူၼ်ႁႃၵိၼ်လဵင်ႉတွင်ႉယဝ်ႉ ။ ၵွပ်ႈၼၼ်လႄႈ ယွၼ်း ႁႂ်ႈၽူႈယႂ်ႇၵူၼ်းလူင် ၽူႈတႅၼ်းၵူႈၵေႃႉ ဢိၵ်ႇၽူႈမီးပုၼ်ႈၽွၼ်း ၸွႆႈထႅမ်ပၼ်ႁဝ်းၶႃႈယႂ်ႇယႂ်ႇၼမ်ၼမ်သေၵမ်း ” ဝႃႈၼႆ။
ဝၼ်းၼၼ်ႉၵူၼ်းဝၢၼ်ႈၸဝ်ႈသူၼ် ဢွၼ်ၵၼ်တႆႈတဵၼ်း၊ ယွၼ်းသူးတိူင်ႇၵၢဝ်ႇၽီပႂ်ႉသူၼ်ႁႆႈၼႃး ယၢတ်ႇၼမ်ႉၶႂမ်ႈတဝ်ႈသေ ၸုၵ်းယႆၵၼ် ယိပ်းပၢႆႉၼႄၵၢင်ၸႂ် သၢၼ်ၶတ်း သိုၵ်းမၢၼ်ႈ ယိုတ်းႁႆႈၵူၼ်းမိူင်း။
မိူဝ်ႈပီ 2014 ၼၼ်ႉၵေႃႈ ဢၼ်ပဵၼ်လုၵ်ႈမေးသိုၵ်း မႃးႁိမ်တီႈလိၼ်ၵူၼ်းဝၢၼ်ႈယဝ်ႉၵမ်းၼိုင်ႈ ၵူၺ်းၵႃႈ ၵူၼ်းဝၢၼ်ႈဢမ်ႇယွမ်းပၼ်ၶဝ်သေ တၢင်ႇထိုင်ၽူႈမီးပုၼ်ႈၽွၼ်းၶဝ်လၢႆတီႈ ဝၢႆးၼၼ်ႉသိုၵ်းမၢၼ်ႈႁဵတ်းၽႅၼ်တီႈပွမ်သေ ႁႃတၢင်းၽိတ်းၸဝ်ႈႁႆႈမၢပ်ႇမႂ်ငိုၼ်းၼိုင်ႈၵေႃႉလႂ် 30,000 ပျႃး လႆႈၶိုၼ်ႈလုမ်းတြႃးလၢႆပွၵ်ႈ ။ တီႈလိၼ်ၼႆႉတၢင်း ၵႂၢင်ႈမီးမွၵ်ႈ 700 ဢေႊၶိူဝ်ႊ မီးတီႈဝၢၼ်ႈ ၵျွၵ်ႉမႄးလူင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။
ၼင်ႇႁိုဝ်သိုၵ်မၢၼ်ႈ တေဢမ်ႇၸၢင်ႈယိုတ်းတီႈလိၼ်ၵႂႃႇလႆႈၼၼ်ႉ ယူႇတီႈၵူၼ်းဝၢၼ်ႈ ဢုပ်ႇဢူဝ်းၵၼ်သေ တေဢွၼ်ၵၼ်ၵႂႃႇတၢင်ႇတီႈလုမ်းၾၢႆႇတီႈလိၼ်ၼေႇပျီႇတေႃႇၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ