ဝဵင်းတႃႈၶီႈလဵၵ်းၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ်သၢမ်ၸိုင်ႈမိူင်း၊ ပဵၼ်ဝဵင်းၸိုဝ်ႈသဵင်ယႂ်ႇ ၼႂ်းထုင်ႉသၢမ်ၸဵင်ႇၶမ်း ဝဵင်းၼိုင်ႈ၊ ပဵၼ်ဝဵင်းၵိုၼ်းငိုၼ်းၶွၼ်ႈ တီႈဢၼ်ၵူၼ်းၼုမ်ႇ သူင်မိုတ်ႈဢႅဝ်ႇလႄႇ မႃးပၢၼ်သိုပ်ႇပၢၼ်။ လိူဝ် ၼၼ်ႉ ပဵၼ်ဝဵင်းဢၼ်ပေႃႈလဵင်ႉၸဝ်ႈငိုၼ်းသႃး သူင်မိုတ်ႈႁဵတ်းၵၢၼ်ပၢႆးမၢၵ်ႈမီး ၵေႃႈၸႂ်ႈ။

ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း မႃးၼႆႉ ယိင်ႈၶႅၼ်းၵိုၼ်း ပၢႆးမၢၵ်ႈမီးၵေႃႈ ၸေးလၢႆး။ ဢၼ်လုၵ်ႉမိူင်းၶႄႇ မႃးပိုတ်ႇပၢင်တေႃႇလွင်းတၢင်းဢွၼ်ႊလၢႆႊ ၵေႃႈၼမ်။ ၸုမ်းၵျႃးၽႅၼ်ႉ လွၵ်ႇလႅၼ်ၵိၼ်ငိုၼ်းၵေႃႈၼမ်။ ၼႂ်းဝတ်ႉဝႃး ၽႃသိူဝ်ႇၵေႃႈ ဢမ်ႇၵိုတ်း ဢွၼ်ၵၼ်ပိုတ်ႇပၢင်တေႃႇလွင်း ႁဵတ်းႁႂ်ႈၵူၼ်းမိူင်းပိုၼ်ႉတီႈ ပဵၼ်ဢၼ်သုၵ်ႉႁူသုၵ်ႉၸႂ် ၼႆယဝ်ႉ။

တီႈဝတ်ႉၵျွင်းမုၼ်ၸဝ်ႈ တူၼ်ႈၵေႃႉၼွၵ်ႈ (တေႃႇၵေႃႉၼွၵ်ႈ) ဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၼႆႉ တႄႇဢဝ် ဝၼ်းတီႈ 18/6/2024 ၼၼ်ႉမႃး ၸဝ်ႈငိုၼ်းသႃးမႃး ပိုတ်ႇပၢင်တေႃႇလွင်း ၵိုၼ်းၶွၼ်ႈၸမ်လိူၼ် ၸင်ႇႁႃယဵၼ်ၵႂႃႇ မိူဝ်ႈဝၼ်းတီႈ 9/7/2024 ၼႆႉၵူၺ်း ဝႃႈၼႆ။  

ပေႃႈလဵင်ႉ ၸဝ်ႈငိုၼ်းသႃး တီႈဝဵင်းတႃႈၶီႈလဵၵ်းၼႆႉ ႁဵတ်းႁူဝ်ႁဵတ်းတႅင်ႇသေ ႁူမ်ႈၵၼ် ပိုတ်ႇပၢင်တေႃႇလွင်း ၸွမ်းဝတ်ႉ ၸွမ်းဝႃး တီႈၼိုင်ႈယဝ်ႉ တီႈၼိုင်ႈ၊ မၢင်တီႈၵေႃႈ ၸမ်လိူၼ် မၢင်တီႈၵေႃႈ လိူၼ်ပၢႆ။ ဢမ်ႇမီးပွႆးလၢမ်းၵေႃႈ ပိုတ်ႇပၢင်တေႃႇလွင်း ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈၼင်ႇၼႆ။

“မိူဝ်ႈသိုၼ်းပုၼ်ႉတႄႉ တိုၵ်ႉႁၼ်ၶဝ်ပိုတ်ႇယူႇ။ ထိုင်မႃး ဝၼ်းတီႈ 9 ၼႆႉသမ်ႉဝႃႈ ၵူၼ်းလူင်မႃးၼႆသေ ပိၵ်ႉဢိုတ်းဝႆႉ ၼႆဢေႃႈ။ ၵူၺ်းၵႃႈ ၶဝ်တိုၼ်းႁႃလၢႆးပိုတ်ႇမၼ်းယူႇယဝ်ႉ ဢမ်ႇပိုတ်ႇတီႈၼႆႈၵေႃႈ တၢင်ႇတီႈ ၶဝ်တိုၼ်းတေၵႂႃႇပိုတ်ႇထႅင်ႈယူႇ။ တီႈဝတ်ႉၼႆႉ ႁၼ်ၵူႈပီယဝ်ႉၶႃႈၼၼ်ႉ။ ပၢင်တေႃႇလွင်း တီႈတႃႈၶီႈလဵၵ်းၼႆႉ မၼ်းဢမ်ႇၵွမ်ႉၵူၺ်း တီႈဝတ်ႉ ၼႆႉၵူၺ်းၶႃႈလႄႇ တီႈႁဝ်းဢမ်ႇႁၼ်မႅၼ်ႈၼၼ်ႉ မီးတင်းၼမ်ယဝ်ႉ။ မိူၼ်ၼင်ႇ တၢင်းဝၢၼ်ႈမႂ်ႇသၼ်သၢႆးပုၼ်ႉၵေႃႈ ပိုတ်ႇၼႆဢေႃႈ။ တႃႇပဵၼ်မႃးပၢင်လွင်းၼႆႉၵေႃႈ မၼ်းတေမီးပေႃႈလဵင်ႉ ၸဝ်ႈငိုၼ်းသႃး ၸိူဝ်းၶဝ်ႈဢွၵ်ႇႁူႉၸၵ်းၵၼ်တင်း ၵူၼ်းလူင် ၼႂ်းတပ်ႉသိုၵ်းမၢၼ်ႈၶဝ်သေ ၵွင်ႉၵၼ်ႁူမ်ႈၵၼ်သေ ၸင်ႇပဵၼ်မႃးၶႃႈယဝ်ႉ”- ဝႃႈၼႆ။

ၵူၼ်းၼုမ်ႇ တႃႈၶီႈလဵၵ်းလၢတ်ႈဝႃႈ – ဢဝ်ဝတ်ႉဝႃး ဢဝ်ဢွင်ႈတီႈသႃႇသၼႃႇ  ႁဵတ်းပဵၼ်ဢွင်ႈတီႈႁႃ ငိုၼ်းသုၼ်ႇတူဝ်ၶဝ်သေ ပၼ်ႇပုတ်ႈၵၼ် ပိုတ်ႇဝတ်ႉၼိုင်ႈယဝ်ႉ ဝတ်ႉၼိုင်ႈ ၼႂ်းဝဵင်းတႃႈၶီႈလဵၵ်းၼႆႉ။ ပေႃးပိၵ်ႉတီႈၼိုင်ႈ သမ်ႉပိုတ်ႇၶိုၼ်းတီႈၼိုင်ႈ။ မိူၼ်ၼင်ႇ ၼႂ်းဝၢၼ်ႈမႂ်ႇသၼ်သၢႆး၊ တီႈဝတ်ႉႁိမ်းၵၢတ်ႇ ဢႃးၶႃႇ ၸိူဝ်းၼႆႉ – ဝႃႈၼႆ။

ၼႄၶေႃႈဢၢင်ႈဝႃႈ ႁႃငိုၼ်းၵွင်ၵၢင်ပၼ် ဝတ်ႉဝႃးၽႃသိူဝ်ႇၼႆသေ ၸဝ်ႈငိုၼ်းသႃးၶဝ် ႁပ်ႉၸဝ်ႈပၢင်တႃႇလွင်း ဢၼ်ယွႆႈဢၼ်ယႅမ်းမႃး မိူၼ်ၼင်ႇ မၢၵ်ႇၵိင်ႈလွႆ ၊ မၢၵ်ႇတႅမ်ႇသီႇတႅမ်ႇႁႃႈ ၊ လေးၵွင်ႇၵျိၼ်ႇ ၊ ၶူင်ႇၵဵမ်းယိုဝ်းပႃလႄႈ ပၢင်ၽၢႆႉ ၵူႈသႅၼ်းသႅၼ်း၊ ၵဵပ်းငိုၼ်း ၼိုင်ႈသႅၼ်းလႂ် ဢမ်ႇယွမ်း 3,000 ဝၢတ်ႇၵေႃႈ ပၢင်တေႃႇလွင်းတိုၵ်ႉၼမ်ယူႇ။ ယွၼ်ႉပိူဝ်ႈ ၸဝ်ႈငိုၼ်းသႃး ၸိူဝ်းၼႆႉ  ပဵၼ်ၵူၼ်းၶဝ်ႈဢွၵ်ႇမိုတ်ႈ ၵိုဝ်းၸမ်ၸႂ်ၵၼ်တင်း သိုၵ်းမၢၼ်ႈဝႆႉ – ၵူၼ်းတႃႈၶီႈလဵၵ်းလၢတ်ႈ ၼႄထႅင်ႈၼင်ႇၼႆ။

“ယူႇတီႈ ၶႃႈႁၼ်ထိုင် ပေႃးပဵၼ်ဢွင်ႈတီႈ ဢၼ်ၸၢဝ်းပုတ်ႉႁဝ်းၼပ်ႉယမ်တႄႉ ထုၵ်ႇလီမီး ပၢင်သုတ်ႇမုၼ်းလွတ်ႈ ႁေႃးထမ်းတြႃး ၸိူင်ႉၼႆၵူၺ်း မၼ်းၸင်ႇၵိုင်ႇလႅပ်ႈ။ ယၢမ်းလဵဝ်သမ်ႉ မီးၵူၼ်းတေႃးသ မေႃးသၶဝ် ဢူၼ်ဢၢၼ်မေႃးမႄးယူႇဝႆႉၸိူင်ႉၼႆ။ သမ်ႉပၢႆ ၵိၼ်လဝ်ႈမဝ်းယႃႈသေ ႁွင်ႉသႅၼ်ႇၸွမ်း ပၢင်တေႃႇလွင်း ၸိူင်ႉၼႆၼႆႉ ဢမ်ႇထုၵ်ႇလီမီး။ လွင်ႈၸိူဝ်းၼႆႉ ၸုမ်းပၼ်ၶႂၢင်ႉ၊ ၸုမ်းဢွၼ်ႁူဝ်လႄႈ ၵေႃးပၵၶဝ်ၵေႃႈ ထုၵ်ႇလီဝူၼ်ႉသွၼ်ႇယူႇ” – ဝႃႈၼႆ။  

ၵူၼ်းပိုၼ်ႉတီႈၶၢင်းပွင်ႉ သုၵ်ႉသၵ်ႉၸႂ် ဢမ်ႇလႆႈလပ်းဢမ်ႇလႆႈၼွၼ်း။ ပိူင်လူင် ဢမ်ႇမီးလွင်ႈႁူမ်ႇလူမ်ႈ။ ယွၼ်ႉပိူဝ်ႈ ႁဵတ်းပၢင်တေႃႇလွင်း ၼႂ်းဝတ်ႉဝႃးၽႃသိူဝ်ႇသေ ႁဵတ်းႁႂ်ႈႁိမ်းၶၢင်ႈဝတ်ႉဝႃး မီးႁၢၼ်ႉၶၢႆပႃးလဝ်ႈယႃႈ။ လိူဝ်ၼၼ်ႉ ဢၼ်ႁၢင်ႈႁၢႆႉသုတ်းသမ်ႉ မီးပႃးထႅင်ႈထႅဝ် သိုဝ်ႉၶၢႆၵၢၼ်ၵႃႇမ။ ယွမ်ႇၼၼ်ႉ လိုဝ်းလင်ဝႆႉၸွမ်းၸိုဝ်ႈသဵၼ်ႈတၢင်း “ချစ်သူလမ်း ကြား” ၼႆလူးၵွၼ်ႇ –  ႁဵတ်းႁႂ်ႈယႃႉၼႃႈတႃ သႃႇသၼႃႇပုတ်ႉၵူၺ်း – ၵူၼ်းၼုမ်ႇၼၼ်ႉ လၢတ်ႈၼႄၼင်ႇၼႆ။

ၵူၼ်းပိုၼ်ႉတီႈ ဢၼ်ဢမ်ႇၶႂ်ႈဢွၵ်ႇၸိုဝ်ႈတႄႉလၢတ်ႈဝႃႈ – “ၸဝ်ႈငိုၼ်းသႃး ယဵတ်ႈမွၼ်ငိုၼ်းလၢႆတီႈ ပႃးၸဵမ်ၽူႈႁပ်ႉပုၼ်ႈၽွၼ်းတူၺ်းလူ ဝတ်ႉဝႃး၊ လႆႈယိုၼ်ႈတၢင်ႇယွၼ်းၶႂၢင်ႉ တီႈပိဝ်ႇႁႃႇ၊ ပလိၵ်ႈမၢၼ်ႈ (ၼႄႇထဵင်း) လႄႈ ၸယၽ ၶဝ်ၸိူဝ်းၼႆႉ”- ဝႃႈၼႆ။  

ၵဵဝ်ႇၵပ်းလွင်ႈၼႆႉ ယူႇတီႈၸုမ်းႁဝ်းၶႃႈ ႁႃတီႈၵပ်းသိုပ်ႇ ၽူႈမီးပုၼ်ႈၽွၼ်းတၢင်း ၾၢႆႇပၢင်တေႃႇလွင်းလႄႈ တၢင်းၾၢႆႇ ၽူႈၵဵဝ်ႇၶွင်ႈ ယူႇၵေႃႈ ဢမ်ႇလႆႈလႄႈ ဢမ်ႇၸၢင်ႈတွင်ႈထၢမ် ႁူဝ်ယွႆႈယမ်း။

ယွၼ်ႉၵၢၼ်ႁႃငိုၼ်း လၢႆးငၢႆႈလၢႆးဝႆး ဢၼ်ဢမ်ႇထုၵ်ႇၸွမ်းပၵ်းပိူင် ၸိူဝ်းၼႆႉၼမ်မႃးလႄႈ တီႈဝဵင်းတႃႈၶီႈလဵၵ်းၼႆႉ ၵူၼ်းၵေႃႇၵၢၼ်ႁၢႆႉ ၽူႈလၵ်ႉၸၵ်ႉၶုတ်ႈ မီးယူႇၵူႈဝၼ်း – ပလိၵ်ႈမၢၼ်ႈ ဢမ်ႇတွၼ်ႉတီႉလႆႈ သေပွၵ်ႈ။