သိုၵ်းတဢၢင်း TNLA ႁူမ်ႈတင်း DPLA ၊ PDF လေႃႇတိုၵ်း တပ်ႉၵွင်ႈလူင် (ဒုံးတပ်) 606 ၶွင်တပ်ႉသိုၵ်းမၢၼ်ႈသေ ယိုတ်းၵုမ်းလႆႈပႃး ဝဵင်းၼွင်ၶဵဝ်ယဝ်ႉ ဝႃႈၼႆ။

တႄႇဢဝ် ဝၼ်းတီႈ 26 လိူၼ်ၵျုၼ်ႊပူၼ်ႉမႃးၼၼ်ႉသေ တေႃႇထိုင် ဝၼ်းတီႈ 9 လိူၼ်ၵျူႊလၢႆႊ ယၢမ်းၵၢင်ၶိုၼ်းၼႆႉ ယူႇတီႈ တပ်ႉသိုၵ်းတဢၢင်း TNLA ၊ ၸုမ်းၵႅတ်ႇၶႄၵူၼ်းမိူင်း ထၼု DPLA လႄႈ ၸုမ်းၵႅတ်ႇၶႄၵူၼ်းမိူင်း ဝဵင်းလိူဝ်ႇ MDY – PDF လေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်း တီႈၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ မႃးႁၢဝ်ႈႁႅင်းသေ ယိုတ်းလႆႈ တပ်ႉၶမယ 114 တင်း 115 ႁူမ်ႈလူၺ်ႈ တပ်ႉၵွင်ႈလူင် 606 ထႅင်ႈ ၼႆယဝ်ႉ။

ဢိင်ၼိူဝ် လွင်ႈပဵၼ်ပၢင်တိုၵ်းၼႆႉသေ ၾၢႆႇသိုၵ်းမၢၼ်ႈ ၸႂ်ႉပႃးၵွင်ႈလူင်လႄႈ ၶိူင်ႈမိၼ်တိုၵ်း မႃးပွႆႇမၢၵ်ႇယိုဝ်းၸွႆႈထႅင်ႈ။ တင်းသွင်ၾၢႆႇ မီးလွင်ႈမၢတ်ႇၸဵပ်းလူႉတၢႆ ၼင်ႇၵၼ်။ ၾၢႆႇသိုၵ်း TNLA ယိုတ်းလႆႈပႃး ၶိူင်ႈၵွင်ႈၵၢင်ႇ ၸိူဝ်းၼႆႉ လွင်ႈသိုၵ်းမၢၼ်ႈ ဝၢင်းၶိူင်ႈၸူးတႄႉ ပႆႇယိုၼ်ယၼ် ဝႃႈၼႆ။

တပ်ႉၵွင်ႈလူင် သိုၵ်းမၢၼ်ႈ 606 ၼႆႉ မီးဝႆႉၼိူဝ်သဵၼ်ႈတၢင်း ၼွင်ၶဵဝ် – ၵျွၵ်ႉၵူႇ – လွၵ်ႉၸွၵ်ႇ မီးၾၢႆႇၸၢၼ်းဝဵင်းၼွင်ၶဵဝ်၊ ပဵၼ်တပ်ႉလွင်ႈယႂ်ႇ တႃႇႁူမ်ႇလူမ်ႈ တပ်ႉတွင်းၶမ်းလႄႈ ငဝ်ႈငုၼ်းၾၢႆႇၵုမ်းၵမ်တပ်ႉၵွင်ႈလူင် 902 ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 5 – 6  ၼၼ်ႉ သိုၵ်းမၢၼ်ႈတင်း သိုၵ်း TNLA ႁူမ်ႈတင်း PDF ပဵၼ်ပၢင်တိုၵ်းၵၼ် တီႈႁူၺ်ႈၵိုတ်ႈ ၼႂ်းၵႄႈၼွင်ၶဵဝ် – ၵျွၵ်ႉမႄး၊ ၾၢႆႇသိုၵ်း TNLA – PDF ယိုတ်းၵုမ်းလႆႈ တပ်ႉပၢင်သဝ်းဢွၼ်ႇ သိုၵ်းမၢၼ်ႈ ဢၼ်မီးတီႈႁူဝ်ၶူဝ်ႁူၺ်ႈၵိုတ်ႈ ဝႃႈၼႆ။

ပၢင်တိုၵ်း တီႈၸႄႈဝဵင်းၼွင်ၶဵဝ်ၼႆႉ သိုၵ်း TNLA ႁူမ်ႈတင်း PDF ဝဵင်းလိူဝ်ႇ၊ ၸုမ်းၵႅတ်ႇၶႄၵူၼ်းမိူင်း ထၼု DPLA  သေ ယိုဝ်းတိုၵ်းသိုၵ်းမၢၼ်ႈမႃးႁၢဝ်ႈႁႅင်း။ ယွၼ်ႉပၢင်တိုၵ်းသေ ၵူၼ်းမိူင်းလႆႈငိူင်ႉပၢႆႈၽေးသိုၵ်းဝႆႉတင်းၼမ်။ ၸၢၵ်ႇမၢၵ်ႇတိူဝ်ႉသႂ်ႇႁိူၼ်းယေး လူႉၵွႆထႅင်ႈ။

ၼႂ်းဝၼ်းတီႈ 10 ၼႆႉ သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ ဢၼ်ပဵၼ်သိုၵ်းၵဝ်ႈၵၢင်ႉ တိုၵ်ႉသိုပ်ႇပဵၼ်ပၢင်တိုၵ်း ၵၼ်ႁၢဝ်ႈႁႅင်း တီႈလႃႈသဵဝ်ႈထႅင်ႈ ၼႆယဝ်ႉ။