မိူဝ်ႈၼႆႉ ဝၼ်းတီႈ 09/07/2024 ယၢမ်းၵၢင်ဝၼ်း မၢၵ်ႇလူင် တူၵ်းသႂ်ႇႁၢၼ်ႉၶၢႆၶူဝ်းၵုၼ်ႇ တီႈပွၵ်ႉ 2 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၽူႈၸၢႆး ၵေႃႉၼိုင်ႈ လႆႈတိူဝ်ႉမၢတ်ႇၸဵပ်းႁႅင်း ယၢမ်းလဵဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃယဝ်ႉ ဝႃႈၼႆ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ ယိုဝ်းမႃးတူၵ်းသႂ်ႇ တီႈႁၢၼ်ႉၶၢႆၶူဝ်းၵုၼ်ႇ ဢၼ်ပိုတ်ႇဝႆႉတီႈပွၵ်ႉ 2 ၼႂ်းၵႄႈလႃႈသဵဝ်ႈ – လွႆယဵဝ်ႈ ၼၼ်ႉၶႃႈ။ ၸၢၵ်ႇမၢၵ်ႇ တိူဝ်ႉၺႃး ၽူႈၸၢႆး ၵေႃႉၼိုင်ႈ လႆႈမၢတ်ႇၸဵပ်း မိူဝ်ႈၽွင်းၼၼ်ႉ မၼ်းၸၢႆးသမ်ႉ ယူႇဝႆႉၼႂ်းႁၢၼ်ႉၶၢႆၶူဝ်း။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉယဝ်ႉ ၶႃႈ”- ဝႃႈၼႆ။
လိူဝ်ၼၼ်ႉ သိုၵ်းၵဝ်ႈၵၢင်ႉ MNDAA ၵေႃႈ ၶီႇရူတ်ႉၶိူင်ႈၼပ်ႉႁူဝ်ပၢၵ်ႇလမ်း လုၵ်ႉတၢင်းသႅၼ်ဝီ ထႅမ်ႁႅင်း သိုၵ်းမႃးထႅင်ႈ ဝႃႈၼႆ။
“သိုၵ်းၵဝ်ႈၵၢင်ႇၶဝ် ၶီႇရူတ်ႉၶိူင်ႈသႅၼ်း 125 လုၵ်ႉသႅၼ်ဝီ ထႅမ်မႃးတၢင်းလႃႈသဵဝ်ႈၼႆႉ ၼပ်ႉႁူဝ်ပၢၵ်ႇလမ်း မၼ်းၶႃႈ ဢေႃႈ။ ပၢင်တိုၵ်းၼႆႉ လႅပ်ႈတေပႆႇယဵၼ် တေသိုပ်ႇပဵၼ်ၶၢဝ်းယၢဝ်းထႅင်ႈယူႇ ပေႃးတူၺ်းငဝ်းလၢႆး ၸိူင်ႉၼႆတႄႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ယဝ်ႉၵေႃႈ မိူၼ်ၼင်ႇ တၢင်းဝၢၼ်ႈၶႃးသီႇ ဢိူင်ႇၼမ်ႉပွင်ႈ ၼၼ်ႉၵေႃႈ သိုၵ်းၵဝ်ႈၵၢင်ႉ မႃးမူၵ်းသွၼ်ႈ ဢဝ်တီႈယူႇဝႆႉမူတ်းယဝ်ႉ။ ၸွမ်းၼင်ႇ သဵၼ်ႈတၢင်းၼွင်မွၼ် – ၶိူဝ်းၼိမ်းလႄႈ တူဝ်းၵဵၵ်ႉ ၸိူဝ်းၼႆႉၵေႃႈ ၶဝ်ဢဝ်တီႈယူႇဝႆႉ မိူၼ်ၵၼ်မူတ်းယဝ်ႉ ဝႃႈၼႆ။
ဝၼ်းတီႈ 7 ပူၼ်ႉမႃးၼႆႉ မၢၵ်ႇလူင် တူၵ်းသႂ်ႇ ၼႂ်းပွၵ်ႉ 10 ဝဵင်းလႃႈသဵဝ်ႈ ၸၢၵ်ႇမၢၵ်ႇတိူဝ်ႉသႂ်ႇ ၽူႈၸၢႆး လူႉ တၢႆ ၵေႃႉၼိုင်ႈ။ ၸူဝ်ႈပၢင်တိုၵ်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ယိုဝ်းၵၼ်မႃး တီႈဝဵင်းလႃႈသဵဝ်ႈၼႆႉ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလူႉတၢႆယဝ်ႉ မွၵ်ႈ 20 ၵေႃႉ မၢတ်ႇၸဵပ်းၸွမ်းထႅင်ႈၼမ်။ ယဝ်ႉၵေႃႈ ႁဵတ်းႁႂ်ႈၵူၼ်းမိူင်း ပၢႆႈဢွၵ်ႇဝဵင်း ၼပ်ႉႁူဝ်မိုၼ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ