သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ယိုဝ်းၵၼ်သေ မၢၵ်ႇလူင်တူၵ်းသႂ်ႇ ၵူၼ်းလႃႈသဵဝ်ႈ လူႉတၢႆထႅင်ႈ ၵေႃႉၼိုင်ႈ။
ဝၼ်းတီႈ 07/07/2024 တႄႇဢဝ်ယၢမ်းၵၢင်ၼႂ် 5 မူင်းထိုင် ၵၢင်ၶမ်ႈ မၢၵ်ႇလူင်တူၵ်းသႂ်ႇ တီႈႁၢၼ်ႉၶၢႆၶိူင်ႈ ၶူဝ်းႁိူၼ်းယေး ပွၵ်ႉ 10 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၽူႈၸၢႆး လူႉတၢႆၵေႃႉၼိုင်ႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇလူင်တူၵ်းသႂ်ႇ တီႈပွၵ်ႉ 12 ဝၢၼ်ႈၼွင်ႁူင်း တိူဝ်ႉၺႃးၵူၼ်းမၢတ်ႇၸဵပ်း လႆႈၶိုၼ်ႈႁူင်းယႃ ၵေႃႉၼိုင်ႈ။ ယဝ်ႉၵေႃႈ တူၵ်းသႂ်ႇ တီႈပွၵ်ႉ 10 တီႈႁၢၼ်ႉၶၢႆၶိူင်ႈၶူဝ်း ႁိူၼ်းယေး (ရတာနာတိုး) တိူဝ်ႉၺႃးၽူႈၸၢႆး လူႉတၢႆၵေႃႉၼိုင်ႈ။ ၼႂ်းဝၼ်းၼၼ်ႉ ပၢင်တိုၵ်း တႄႇၵၢင်ၼႂ် 5 မူင်းထိုင်ၵၢင်ၶမ်ႈၶႃႈဢေႃႈ”- ဝႃႈၼႆ။
ၼႂ်းဝၼ်းတီႈ 7 ၼႆႉ သွင်ၾၢႆႇ ပဵၼ်ပၢင်တိုၵ်းၵၼ်ႁႅင်းသေ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်ၵျႅၵ်ႊၾၢႆႊတိူဝ်ႊ (Jet Fighter) မႃးယိုဝ်းၸွႆႈထႅင်ႈ ယဝ်ႉၵေႃႈ ၵႂႃႇပွႆႇမၢၵ်ႇတၢင်းလွႆပေႇ ၼၼ်ႉထႅင်ႈ ဝႃႈၼႆ။
ဝၼ်းတီႈ 08/07/2024 ယၢမ်းၵၢင်ၶမ်ႈ တင်းသွင်ၾၢႆႇ သိုပ်ႇပဵၼ်ပၢင်တိုၵ်းၵၼ်ထႅင်ႈ တီႈလွႆပေႇ ပွၵ်ႉ 5 ၼၼ်ႉၵေႃႈ ႁဵတ်းႁႂ်ႈၵူၼ်းဝၢၼ်ႈၵွင်း ဢွၼ်ၵၼ်ၶၢႆႉပၢႆႈထႅင်ႈ ၼႆယဝ်ႉ။
ၼႂ်းဝၼ်းတီႈ 8 ၼႆႉၵူၺ်း သိုၵ်းၵဝ်ႈၵၢင်ႉ လုၵ်ႉတၢင်းၼွင်မွၼ် မႃးတၢင်းၶိူဝ်းၼိမ်း ၵမ်ႈၽွင်ႈ ပႆတိၼ်၊ ၵမ်ႈ ၽွင်ႈ ၶီႇၵႃးမႃးသေ ၽႃႇၺႃးသိုၵ်းမၢၼ်ႈ သွင်ၾၢႆႇပဵၼ်ပၢင်တိုၵ်းၵၼ် ၸွမ်းသဵၼ်ႈတၢင်းလူင် လႃႈသဵဝ်ႈ – ဝဵင်းလိူဝ်ႇ။ ယဝ်ႉၵေႃႈ မၢၵ်ႇလူင် တူၵ်းသႂ်ႇထႅင်ႈ ၼႂ်းဝၢင်းႁိူၼ်းယေး ၵူၼ်းမိူင်းပွၵ်ႉ 12 ဝၢၼ်ႈသူႈ ၼၼ်ႉ တႄႉ တိူဝ်ႉၺႃးၵႃးလူႉၵွႆလမ်းၼိုင်ႈ၊ လွင်ႈတုမ်ႉတိူဝ်ႉၺႃးၵူၼ်းမိူင်းတႄႉ ဢမ်ႇမီး ဝႃႈၼႆ။
“ယၢမ်းလဵဝ် တီႈဝဵင်းလႃႈသဵဝ်ႈၼႆႉ ယဵၼ်သီႇမူတ်း မိူၼ်မိူင်းႁၢမ်းၼၼ်ႉယဝ်ႉ။ ၵူၼ်းမိူင်းဢွၼ်ၵၼ်ပၢႆႈ ဢွၵ်ႇဝဵင်း ၼပ်ႉႁူဝ်မိုၼ်ႇမၼ်းၶႃႈဢေႃႈ။ ၼႂ်းဝၼ်းတီႈ 7-8 ၼႆႉသမ်ႉ သိုၵ်းမၢၼ်ႈ ပိၵ်ႉတၢင်းၶဝ်ႈဢွၵ်ႇဝဵင်းထႅင်ႈသေ ႁဵတ်းႁႂ်ႈၵူၼ်းမိူင်းပၢႆႈဢွၵ်ႇဝဵင်း ၵိုတ်းၶမ်ၸွမ်းတၢင်းထႅင်ႈ ရူတ်ႉၵႃးၼပ်ႉႁူဝ်ႁဵင်”- ၵူၼ်းဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
တႄႇဢဝ် ဝၼ်းတီႈ 2 ၼၼ်ႉမႃးႁၢၼ်ႉတေႃႇထိုင်ယၢမ်းလဵဝ် မၢၵ်ႇလူင် တူၵ်းသႂ်ႇ ၵူၼ်းမိူင်းလႃႈသဵဝ်ႈ လူႉတၢႆ ဢမ်ႇယွမ်း 20 ၵေႃႉ ယဝ်ႉၵေႃႈ မၢတ်ႇၸဵပ်းထႅင်ႈၼမ်။ လိူဝ်ၼၼ်ႉ လႅင်းၾူၼ်း ထုၵ်ႇတတ်းၶၢတ်ႇ ဢမ်ႇယွမ်း 5 ဝၼ်းယဝ်ႉ။ ၾႆးၾႃႉၵေႃႈ ထုၵ်ႇတတ်းၶၢတ်ႇထႅင်ႈ ဢမ်ႇမႃး 10 ဝၼ်းပၢႆယဝ်ႉ တင်ႈတႄႇ ပဵၼ်ပၢင်တိုၵ်း တၢင်းၸႄႈဝဵင်းၵျွၵ်ႉမႄး ၼၼ်ႉမႃး – ၵူၼ်းပိုၼ်ႉတီႈ ဝဵင်းလႃႈသဵဝ်ႈလၢတ်ႈ။
