ၼႂ်းႁၢင်လိူၼ်ၵျုၼ်ႊၼႆႉ ၽႅၼ်ၵၢၼ်ယၼ်ႇသိုၵ်း 1027 သိုပ်ႇပဵၼ်ၶိုၼ်းၼႂ်းၸႄႈဝဵင်းသီႇပေႃႉ၊ ၵျွၵ်ႉမႄး ၊ ၼွင်ၶဵဝ်၊ မိူင်းမိတ်ႈ၊ မိူင်းၵုတ်ႈလႄႈ လႃႈသဵဝ်ႈ ၸိူဝ်းၼႆႉ သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ ယိုဝ်းၵၼ်ႁၢဝ်ႈႁႅင်းလႄႈ ၵူၼ်းမိူင်းလႆႈပၢႆႈဢွၵ်ႇမိူင်း မီးၵူႈဝၼ်း။

တၢင်းမိူင်းယႆၼႆႉ သိုၵ်းၵဝ်ႈၵၢင်ႉ MNDAA တင်းသိုၵ်းမၢၼ်ႈ ယိုဝ်းၵၼ်ထႅင်ႈသေ ႁဵတ်းႁႂ်ႈမၢၵ်ႇ လူင်တူၵ်းသႂ်ႇ ႁိူၼ်းယေး ၵူၼ်းမိူင်းလူႉၵွႆ 2 လင် တင်းသွင်ၾၢႆႇ တိုၵ်ႉၶဵင်ႈၶႅင် တေႃႇၵၼ်ဝႆႉ။ ယၢမ်းလဵဝ် ၵူၼ်မိူင်းၸိူဝ်းဢွၼ်ၵၼ်ပၢႆႈၵေႃႈမီး ၸိူဝ်းဢမ်ႇပၢႆႈ ဢွၼ်ၵၼ်ၶုတ်းလုၵ်းပဵမ်ႇ (လုၵ်းလိၼ်) ဝႆႉ ၽႂ်မၼ်းၵေႃႈမီးလႄႈ ယွၼ်ႉလွမ်မႆႈၸႂ် ၵူဝ်ၺႃးမၢၵ်ႇလူင်တူၵ်းသႂ်ႇထႅင်ႈ ဝႃႈၼႆ။

ဝၼ်းတီႈ 7/7/2024 သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ်  ႁိုင်မွၵ်ႈ 4 ၸူဝ်ႈမူင်း ထိုင် ၵၢင်ၶမ်ႈ 7 မူင်း ၸင်ႇယဵၼ် တင်းသွင်ၾၢႆႇ ယိုဝ်းၵွင်ႈလူင်သႂ်ႇၵၼ်လႄႈ ႁဵတ်းႁႂ်ႈမၢၵ်ႇ လူင်တူၵ်းသႂ်ႇ ႁိူၼ်းၵူၼ်းဝၢၼ်ႈလူင် ၼႂ်းဢိူင်ႇႁူဝ်ယ ၾႆးမႆႈလူႉၵွႆ 2 လင် ၼႆယဝ်ႉ။

သိုၵ်းမၢၼ်ႈသမ်ႉ ယူႇၼိူဝ်လွႆႁူဝ်တူင်း ဢၼ်ယၢၼ်ၵႆၵၼ်တင်း ဝဵင်းမိူင်းယႆ မွၵ်ႈ 7 လၵ်းၼၼ်ႉသေ ယိုဝ်းၵွင်ႈလူင်သႂ်ႇ၊ သိုၵ်းၵဝ်ႈၵၢင်ႉသမ်ႉ တူင်ႉၼိုင်ႈယူႇဝႆႉၸွမ်းဝၢၼ်ႈလူင်လႄႈ ပၢင်ၺွင်ႇ ၼႂ်းဢိူင်ႇႁူဝ်ယ ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၵူၼ်းမိူင်းယႆ လၢတ်ႈၼႄဝႆႉၼင်ႇၼႆ –

“ၶဝ်ယိုဝ်းၵၼ် ထိုင်ၵၢင်ၶမ်ႈ 7 မူင်း ၸင်ႇယဵၼ်ၵႂႃႇၶႃႈဢေႃႈ။ မၢၼ်ႈၼႆႉ ၶဝ်မီးဝႆႉ ၼိူဝ်လွႆႁူဝ်တူင်းၼၼ်ႉသေ ယိုဝ်းၵွင်ႈလူင်သႂ်ႇ သိုၵ်းၵဝ်ႈၵၢင်ႉ ၶဝ်ဢေႃႈ။ သိုၵ်းၵဝ်ႈၵၢင်ႉၶဝ်သမ်ႉ ဢဝ်တရူၼ်ႊမိၼ် ၵႂႃႇပွႆႇမၢၵ်ႇသႂ်ႇ ပၢင်သဝ်းသိုၵ်းမၢၼ်ႈၶဝ် ဢၼ်မီးၼိူဝ်လွႆႁူဝ်တူင်းၼၼ်ႉ။ ၾၢႆႇသိုၵ်းမၢၼ်ႈ လႅပ်ႈတေတူၵ်းသုမ်းၵႂႃႇလႄႈ သဵင်ၵွင်ႈၸင်ႇယဵၼ်။ မိူဝ်ႈဢွၼ်တၢင်း ၶဝ်တေပႂ်ႉၵဵပ်းၶွၼ်ႇ ၵူၼ်းမိူင်းၸွမ်းတၢင်း ၸိူဝ်းၼႆႉဢေႃႈ။ ငဝ်းလၢႆးဢမ်ႇလီလႄႈ ၸင်ႇၶိုၼ်ႈၵႂႃႇယူႇ ၼိူဝ်လွႆ ၼၼ်ႉ။ ႁႂ်ႈမီးတပ်ႉၶိုၵ်ႉၶမ်ႇဝႆႉတႄႉ ဢမ်ႇၸႂ်ႈ။ ပဵၼ်ပၢင်သဝ်းၶဝ်ၵူၺ်း”- ဝႃႈၼႆ။

သိုၵ်းမၢၼ်ႈ ဢၼ်ယူႇၼိူဝ်လွႆႁူဝ်တူင်းၼႆႉ လုၵ်ႉမႃးတီႈ တပ်ႉၶလယ 67 ဢၼ်ပၵ်းတပ်ႉဝႆႉ တီႈတၢင်းၽႄ ဢိူင်ႇႁူဝ်ယ – တၢင်ႉယၢၼ်းၼၼ်ႉ။ ယွၼ်ႉၶဝ်ၵူဝ် ဢမ်ႇမီးလွင်ႈႁူမ်ႇလူမ်ႈလႄႈ ၸင်ႇပၢႆႈၶိုၼ်ႈၵႂႃႇ ဢဝ်တီႈယူႇဝႆႉ ၼိူဝ်လွႆႁူဝ်တူင်း။ မိူဝ်ႈဢွၼ်တၢင်း ၶဝ်ပႂ်ႉၵဵပ်းၶွၼ်ႇ ၵူၼ်းမိူင်းၸွမ်းတၢင်းလူးၵွၼ်ႇ ဝႃႈၼႆ။

ယၢမ်းလဵဝ် သိုၵ်းမၢၼ်ႈၼႆႉ လုၵ်ႉတၢင်းသီႇပေႃႉလႄႈ ၶူဝ်လမ် ၸိူဝ်းၼႆႉ ထႅမ်ႁႅင်းသိုၵ်း မႃးၼႂ်းမိူင်းယႆထႅင်ႈ တင်းၼမ်။ မိူၼ်ၼင်ႇ သိုၵ်းမၢၼ်ႈ ဢၼ်ပၵ်းတပ်ႉဝႆႉ ၸွမ်းတၢင်ႉယၢၼ်းၼၼ်ႉၵေႃႈ ယိုဝ်းၵွင်ႈလူင်ၵႂႃႇၸူး တၢင်းလႃႈသဵဝ်ႈၵေႃႈမီး ၵူၼ်းမိူင်းယႆလၢတ်ႈ။

ၵူဝ်ပဵၼ်ပၢင်တိုၵ်းၶၢဝ်းယၢဝ်းလႄႈ ၵူၼ်းမိူင်းယႆ ဢွၼ်ၵၼ်ၽူင်ႉပၢႆႈ ၵႂႃႇသွၼ်ႈယူႇၸွမ်း ဝတ်ႉဝၢၼ်ႈၸၢင်ႉ ၵုင်းၸူင် ၊ ဝတ်ႉဝၢၼ်ႈႁူဝ်တိုဝ်ႉ ၸိူဝ်းၼႆႉ ႁူဝ်ၼပ်ႉၸမ်ႁဵင် ၵမ်ႈၽွင်ႈၵေႃႈ ၵႂႃႇသွၼ်ႈယူႇၸွမ်း ႁိူၼ်းယေးပီႈၼွင်ႉ တီႈလွတ်ႈၽေး။ သိုၵ်းမၢၼ်ႈ ၸိူဝ်းတပ်ႉတႅၵ်ႇၼၼ်ႉ ပၢႆႈၵႂႃႇၵေႃႉႁူးၵေႃႉတၢင်း။ မၢင်ၸုမ်းပၢႆႈ ၶဝ်ႈဝၢၼ်ႈ၊ မၢင်ၸုမ်း ပၢႆႈသွၼ်ႈယူႇၸွမ်း ၵူၼ်းပၢႆႈၽေးသိုၵ်းလႄႈ လႆႈဢွၼ်ၵၼ် မႆႈၸႂ်ထႅင်ႈ ၵူဝ်သိုၵ်းၸၢဝ်းၶိူဝ်း ဢမ်ႇဝူၼ်ႉဢမ်ႇဝႄႈ တီႈၵူၼ်းမိူင်းပၢႆႈၽေးသိုၵ်းသွၼ်ႈယူႇသေ ၵူဝ်ဢဝ်မၢၵ်ႇၸွမ်းလိုင်ႈ ၸွမ်းပွႆႇသႂ်ႇထႅင်ႈၵူၺ်းယဝ်ႉ ဝႃႈၼႆ။

ဝၼ်းတီႈ 8/7/2024 ၼႆႉၵေႃႈ ၵူၼ်းမိူင်းယႆ ငိၼ်းသဵင်ၵွင်ႈတႅၵ်ႇၸဵမ်ၸဝ်ႉ မွၵ်ႈႁူဝ်ၼႂ် 3 မူင်းၼႆႉ ႁဵတ်းႁႂ်ႈၵူၼ်းမိူင်းဢမ်ႇႁတ်းၼွၼ်း တေႃႇထိုင်မိူင်းလႅင်း။ မၢၵ်ႇၵွင်ႈလူင် တူၵ်းတီႈလႂ်လၢႆလၢႆ လွင်ႈတုမ်ႉတိူဝ်ႉလူႉသုမ်းတႄႉ ပႆႇႁူႉ ငိၼ်းဝႃႈမီးၵူၼ်းမၢတ်ႇၸဵပ်း ယူႇၽွင်ႈၼႆသေတႃႉ ပႆႇမီးၽႂ်ႁတ်းမိူဝ်းတူၺ်း မိူဝ်းၸွႆႈ။

လိူဝ်ၼၼ်ႉ တၢင်းမိူင်းပၢတ်ႇ ၸႄႈဝဵင်းတၢင်ႉယၢၼ်း ၼၼ်ႉၵေႃႈ သဵင်ၵွင်ႈတႅၵ်ႇလႄႈ ႁဵတ်းႁႂ်ႈၵူၼ်းမိူင်း တူၵ်းၸႂ် လွင်ႈတုမ်ႉတိူဝ်ႉလူႉသုမ်းတႄႉ ပႆႇႁူႉၸွမ်းၼႆ ၼၢင်းယိင်း ၵူၼ်းမိူင်းယႆ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“မိူဝ်ႈၼႃႈမိူင်းၸမ်လႅင်းၼႆႉၵေႃႈ ငိၼ်းမႅၼ်ႈသဵင်ႈမၢၵ်ႇလူင် လင်ဝႃႈလင်ယဝ်ႉၶႃႈ။ ပေႃးတူၵ်းၸႂ် တိုၼ်ႇၵၼ်မူတ်း ဢေႃႈ။ ယဝ်ႉၵေႃႈ တၢင်းမိူင်းပၢတ်ႇၼႆႉၵေႃႈ ငိၼ်းဝႃႈ ၶဝ်တိုၵ်းၵၼ်ထႅင်ႈၼႆဢေႃႈ ပႆႇႁူႉတႅတ်ႈတေႃး ၼင်ႇၵဝ်ႇ။ မိူင်းပၢတ်ႇၼႆႉသမ်ႉ မီးဝႆႉတပ်ႉမၢၼ်ႈၶႃႈၼႃႇၼေႃႈ။ ယၢမ်းလဵဝ် ၵူၼ်းမိူင်းယႆၶဝ် ဢွၼ်ၵၼ်ၵူဝ်ႁႄယူႇႁင်းၽႂ်မၼ်း ဢၼ်ပၢႆႈၵေႃႈပၢႆႈ ၸိူဝ်းပႆႇပၢႆႈၵေႃႈ ၶုတ်းလုၵ်းလိၼ်ဝႆႉ”- ဝႃႈၼႆ။

မိူၼ်ၼင်ႇ ဝတ်ႉဢွင်ႇၸေႇတီႇ (ႁိုဝ်) ဝတ်ႉၵွင်းမူးလွႆ ၼႂ်းပွၵ်ႉ1 ဝဵင်းမိူင်းယႆ ၼႆႉၵေႃႈ မီးသိုၵ်းမၢၼ်ႈ မႃးယူႇဝႆႉ ႁူဝ်ၼပ်ႉ ဢမ်ႇယွမ်း 40 ၵေႃႉ ႁဵတ်းႁႂ်ႈၵူၼ်းပိုၼ်ႉတီႈမႆႈၸႂ် ၵူဝ်သိုၵ်းၸၢဝ်းၶိူဝ်း မႃးပိုတ်းယိုဝ်းၶဝ်သေ ၵူဝ်မီးလွင်ႈတုမ်ႉတိူဝ်ႉလူႉသုမ်းၸွမ်းလႄႈ ၸင်ႇဢွၼ်ၵၼ်ငိူင်ႉဝႄႈၽွင်ႈယဝ်ႉ ဝႃႈၼႆ။

ဝၼ်းတီႈ 4/7/2024 ပူၼ်ႉမႃးၼႆႉၵေႃႈ သိုၵ်းမၢၼ်ႈ တပ်ႉၶလယ 67 ဢၼ်ပၵ်းဝႆႉတီႈ တၢင်းၽႄႁူဝ်ယ – တၢင်ႉယၢၼ်း ၼၼ်ႉ လၢမ်းလိမ်းယိုဝ်းၵွင်ႈလူင်ၵႂႃႇၵူႈၾၢႆႇလႄႈ ႁဵတ်းႁႂ်ႈမၢၵ်ႇလူင်ၵႂႃႇတူၵ်းသႂ်ႇ ထႅဝ်ႁၢၼ်ႉၶဝ်ႈၽၵ်း ၼႂ်းဝၢၼ်ႈလူင်လႄႈ လုမ်းပႃႇတီႇသၢင်ႇသီႈ ၼႂ်းဢိူင်ႇႁူဝ်ယ ၸႄႈဝဵင်းမိူင်းယႆ လူႉၵွႆ။

မိူၼ်ၼင်ႇ ၸႄႈဝဵင်းလႃႈသဵဝ်ႈၵေႃႈ တႄႇဢဝ် ႁူဝ်လိူၼ်ၵျူႊလၢႆႊၼႆႉမႃး သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ႁဵတ်းႁႂ်ႈမၢၵ်ႇလူင် တူၵ်းသႂ်ႇႁိူၼ်းယေး၊ ဝတ်ႉဝႃးၽႃသိူဝ်ႇ လူႉၵွႆၸွမ်းၼမ်။ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ မွၵ်ႈ 20 ယဝ်ႉၵေႃႈ မၢတ်ႇၸဵပ်းၸွမ်းထႅင်ႈၵေႃႈၼမ်။ ႁဵတ်းႁႂ်ႈၵူၼ်းမိူင်း ပၢႆႈဢွၵ်ႇဝဵင်းထႅင်ႈ တင်းၼမ်လၢႆ ထိုင်ဝၼ်းမိူဝ်ႈၼႆႉ။