မိူဝ်ႈၼႆႉ ဝၼ်းတီႈ 8/7/2024 ယၢမ်းၵၢင်ၼႂ် ၵႃးတၢင်ႇႁိၼ်ႁႄႈ လမ်းၼိုင်ႈ ၽႃႇသႂ်ႇဢွၼ်ႇယိင်း လူႉတၢႆထင် တီႈၵေႃႉၼိုင်ႈ ႁိမ်းဝၢၼ်ႈၼွင်တိူၼ်း ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵႃးတၢင်ႇႁိၼ်ႁႄႈ ၽႃႇသႂ်ႇဢွၼ်ႇယိင်း ဢႃယု 12 ၶူပ်ႇ လူႉတၢႆၵေႃႉၼိုင်ႈ ၽွင်းတိုၵ်ႉပွၵ်ႈႁူင်းႁဵၼ်းၶႄႇမႃးသေ မႃးၺႃးၵႃးတၢင်ႇႁိၼ်ႁႄႈ ၽႃႇသႂ်ႇ တီႈႁိမ်းဝၢၼ်ႈ ၼွင်တိူၼ်းၼႆႉ။ ၵႃးတၢင်ႇႁိၼ်ႁႄႈၼၼ်ႉ ႁေႃႈမႃးဝႆး ယၢမ်းလဵဝ် ၵူၼ်းႁေႃႈၵႃးၼၼ်ႉ ယူႇတီႈ သိုၵ်းလွႆၶဝ် ၵုမ်းတူဝ်ဝႆႉယဝ်ႉၶႃႈ”- ဝႃႈၼႆ။
ဢွၼ်ႇယိင်း ဢႃယု 12 ၶူပ်ႇ ၵေႃႉထုၵ်ႇၵႃးတၢင်ႇႁိၼ်ႁႄႈ ၽႃႇသႂ်ႇလူႉတၢႆၼႆႉ ၸိုဝ်ႈႁွင်ႈၼၢင်းဢေၼွင်ႉ ဢႃယု 12 ၶူပ်ႇ ပဵၼ်လုၵ်ႈယိင်း ၸၢႆးလိူၼ်လႄႈ ၼၢင်းၸၢမ်ၶမ်း ၵူၼ်းဝၢၼ်ႈၼွင်ၶမ်း ၸႄႈဝဵင်းၼမ်ႉၶမ်း ၼႆယဝ်ႉ။
တႄႇဢဝ် သိုၵ်းတဢၢင်း TNLA ယိုတ်းၵုမ်းမႃး ၸႄႈဝဵင်းၼမ်ႉၶမ်း မိူဝ်ႈၵၢင်လိူၼ်ၻီႊသႅမ်ႊပိူဝ်ႊ 2023 ၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်းၸမ် 7 လိူၼ်ယဝ်ႉ ႁဵတ်းႁႂ်ႈရူတ်ႉၵႃး တၢင်ႇႁိၼ်ႁႄႈ လုၵ်ႉတၢင်းၼမ်ႉတူႈ လတ်းၽၢၼ်ႇမႃးတၢင်းၼမ်ႉၶမ်း သူင်ႇၸူးတၢင်းမိူင်းၶႄႇ ၵူႈဝၼ်းၶိုၼ်း ၼႆယဝ်ႉ။
“ၸူဝ်ႈသိုၵ်းလွႆ ၵုမ်းဝဵင်းၼမ်ႉၶမ်းသေ ပၼ်ႇၵၢၼ်ယူႇၼႆႉ ရူတ်ႉၵႃးတၢင်ႇႁိၼ်ႁႄႈ(တတ်းတု) ဢၼ်လုၵ်ႉ တၢင်းၼမ်ႉတူႈၼၼ်ႉသေ မႃးတၢင်းၼမ်ႉၶမ်းၼႆႉ မီးၵူႈဝၼ်းၶိုၼ်းယဝ်ႉ။ ယဝ်ႉၵေႃႈ ႁေႃႈဝႆး၊ တၢင်ႇၼၵ်း ႁဵတ်းႁႂ်ႈသဵၼ်ႈတၢင်းလူႉ ၵွႆၼမ်၊ ၽႃႇသႂ်ႇသၢႆၾႆးၶၢတ်ႇ၊ ႁူဝ်ႉႁိူၼ်းယေး ၵူၼ်းမိူင်း ၵုၼ်ႇပင်း ၸိူဝ်းၼႆႉၵေႃႈ မီးမႃးတင်းၼမ်ယဝ်ႉ။ လိူဝ်ၼၼ်ႉ ၶွမ်ႊပၼီႊၶႄႇ ဢၼ်မႃးတင်ႈ ၼႂ်းဝဵင်းၼမ်ႉၶမ်းၼႆႉၵေႃႈၼမ်”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇ ၼႆ။
ထႅင်ႈလွင်ႈၼိုင်ႈ ဢၼ်ၵႃးတၢင်ႇႁိၼ်ႁႄႈမႃး ၸိူဝ်းၼႆႉသမ်ႉ ပဵၼ်ၵႃးလူင် ယဝ်ႉၵေႃႈ တၢင်ႇၼၵ်း ၼိုင်ႈလမ်းလႂ် ဢမ်ႇယွမ်း 30-40 တၼ်ႊ လိူဝ်ၼၼ်ႉ ဢမ်ႇႁူမ်ႇတူမ်းၽႃႈယၢင်(မူဝ်းၵႃႇ) သင်ထႅင်ႈ ဝႃႈၼႆ။
ဢိင်ၼိူဝ် လွင်ႈၼႆႉ ယူႇတီႈ ၵူၼ်းဝဵင်းၼမ်ႉၶမ်းတႄႉ ဢွၼ်ၵၼ် တုၵ်းယွၼ်းဝႃႈ ႁႂ်ႈၽူႈမီးပုၼ်ႈၽွၼ်း ၼႂ်းပိုၼ်ႉတီႈၶဝ် ႁဵတ်းပၵ်းပိူင်ဢွၵ်ႇ မိူၼ်ၼင်ႇ တေဢမ်ႇႁေႃႈၵႃးဝႆး၊ ၵႃးတၢင်ႇႁိၼ်ႁႄႈၼႆႉ တေဢမ်ႇလႆႈတၢင်ႇၼၵ်း၊ ႁႂ်ႈမီးၽႃႈယၢင် (မူဝ်းၵႃႇ) ႁူမ်ႈတူမ်းပၼ် တီႈၼိူဝ်ၵႃးၼၼ်ႉ မိူဝ်ႈတၢင်ႇႁိၼ်ႁႄႈမႃး။ ယဝ်ႉၵေႃႈ ႁႂ်ႈမီးၶၢဝ်းယၢမ်း လတ်းၽၢၼ်ႇၶဝ်ႈ ဢွၵ်ႇဝဵင်း ယၢမ်းလႂ်ထိုင်ယၢမ်းလႂ် ၸဵမ်ၸိူဝ်းၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ