မိူဝ်ႈၼႆႉ ဝၼ်းတီႈ 06/07/2024 မၢၵ်ႇလူင်တူၵ်းသႂ်ႇ ႁိူၼ်းယေးၵူၼ်းမိူင်း တီႈၼႂ်းပွၵ်ႉ 5 လႄႈ ပွၵ်ႉ 10 ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း လူႉတၢႆ 4 ၵေႃႉ မၢတ်ႇၸဵပ်း 4 ၵေႃႉ ၼႂ်းၼၼ်ႉ ပႃးၸဝ်ႈသၢင်ႇ လူႉလွၼ်ႇၸွမ်းထႅင်ႈ ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈ ၵၢင်ႉ MNDAA ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ တီႈလႃႈသဵဝ်ႈ မၢၵ်ႇလူင်တူၵ်းသႂ်ႇ တီႈ ပွၵ်ႉ 5 ႁိမ်းသႅင်ႇတၢင်းၵိၼ် (ၸဵင်းၽေႃးတူႇ) တိူဝ်ႉၺႃး ၵူၼ်းမိူင်းတၢႆ 1 မၢတ်ႇ 3 ။ ပွၵ်ႉ 10 သမ်ႉ ၺႃးႁိူၼ်း ၽူႈၵွၼ်းပွၵ်ႉ လင်ၼိုင်ႈ။ တူၵ်းသႂ်ႇထႅင်ႈ တီႈဝတ်ႉၸိတ်ႉတႃႉသုၶ တိူဝ်ႉၺႃး ၸဝ်ႈသၢင်ႇ မၢတ်ႇၸဵပ်း 1 တူၼ်။ ယဝ်ႉၵေႃႈ တူၵ်းသႂ်ႇထႅင်ႈ တီႈဝတ်ႉသွၼ်းလုၼ်း တိူဝ်ႉၺႃး ၸဝ်ႈသၢင်ႇ လူႉလွၼ်ႇ 3 တူၼ် လႆႈဝႃႈ ပၢင်တိုၵ်းမိူဝ်ႈၼႆႉ ပဵၼ်ႁႅင်းဢေႃႈ”- ဝႃႈၼႆ။
မိူဝ်ႈၼႆႉ တႄႇဢဝ်ယၢမ်းၵၢင်ၼႂ် တေႃႇထိုင်တမ်းၶမ်ႈၼႆႉ သဵင်ၵွင်ႈပႆႇယဵၼ် ဢၼ်သိုၵ်းမၢၼ်ႈတင်း သိုၵ်း ၵဝ်ႈၵၢင်ႉ ယိုဝ်းၵၼ်သမ်ႉ ပဵၼ်တၢင်းတပ်ႉ 507 ဝၢၼ်ႈဢၢႆႇၼိူဝ်၊ ၸွမ်းႁိမ်းလွႆပေႇလႄႈ တၢင်းၵွင်းၵေႃႇ၊ ၼမ်ႉၼူမ်း ၸိူဝ်းၼၼ်ႉ ႁၢဝ်ႈႁႅင်း ဝႃႈၼႆ။
တႄႇဢဝ် ႁူဝ်လိူၼ်ၵျူႊလၢႆႊၼႆႉမႃး သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းၸႄႈဝဵင်းလႃႈသဵဝ်ႈ ႁဵတ်းႁႂ်ႈမၢၵ်ႇလူင် တူၵ်းသႂ်ႇႁိူၼ်းယေး၊ ဝတ်ႉဝႃးၽႃသိူဝ်ႇ လူႉၵွႆၸွမ်းၼမ်။ ၸၢၵ်ႇမၢၵ်ႇ တိူဝ်ႉသႂ်ႇ ၵူၼ်းမိူင်းလူႉတၢႆမွၵ်ႈ 20 ယဝ်ႉၵေႃႈ မၢတ်ႇၸဵပ်းၸွမ်းထႅင်ႈၵေႃႈၼမ်။ ႁဵတ်းႁႂ်ႈၵူၼ်းမိူင်းပၢႆႈဢွၵ်ႇဝဵင်းထႅင်ႈ တင်းၼမ်လၢႆ။
ယၢမ်းလဵဝ် တီႈဝဵင်းလႃႈသဵဝ်ႈၼႆႉ မိူၼ်ၼင်ႇ လႅင်းၾူၼ်းလႄႈ ဢိၼ်ႊထိူဝ်ႊၼႅတ်ႊ ၸိူဝ်းၼႆႉ ထုၵ်ႇတတ်း ၶၢတ်ႇပႅတ်ႈမူတ်းယဝ်ႉ တင်ႈတႄႇ ဝၼ်းတီႈ 5 ၼႆႉမႃး ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇထႅင်ႈ တႃႇၵပ်းသိုပ်ႇတိတ်းတေႃႇ ၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ