မိူဝ်ႈၼႆႉ ဝၼ်းတီႈ 05/07/2024 ယၢမ်းၵၢင်ၼႂ် 10:30 မူင်းပၢႆ သိုၵ်း TNLA တင်း SSPP ပဵၼ်ပၢင်တိုၵ်းၵၼ် ၼႂ်းဢိူင်ႇ ၼွင်ပိင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။

ၽူႈတူင်ႉၼိုင် ၼႃႈလိၼ်သိုၵ်း ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ ၶဝ်ပူၼ်ႉပႅၼ်လူင်းမႃးသေ မႃးယိုဝ်းႁဝ်းဢွၼ်တၢင်းဢေႃႈ ၵွပ်ႈၼႆလႄႈ ၸင်ႇလႆႈပဵၼ်ပၢင်တိုၵ်းၵၼ် ယၢမ်းၵၢင်ၼႂ်မွၵ်ႈ 11 မူင်းၼႆႉ”- ဝႃႈၼႆ။

ဢွင်ႈတီႈပဵၼ်ပၢင်တိုၵ်းၵၼ်ၼၼ်ႉ ပဵၼ်တီႈႁိမ်းႁူင်းပလိၵ်ႈမၢၼ်ႈ ဢိူင်ႇၼွင်ပိင် တီႈႁိမ်းၼၼ်ႉသမ်ႉ မီးတပ်ႉပၢင်သဝ်း သိုၵ်း SSPP ပၵ်းဝႆႉ ဝႃႈၼႆ။

ၼႂ်းၶၢဝ်းတၢင်း လိူၼ်သွင်လိူၼ်ၼႆႉ TNLA လႄႈ SSPP/SSA မီးပၼ်ႁႃၵၼ်လွင်ႈတမ်းဝၢင်းတီႈယူႇတပ်ႉၼႂ်းၵႄႈ ၵျွၵ်ႉမႄးလႄႈ မိူင်းလူင်၊ ၵႄႈလိတ်ႈၵၼ်ဢမ်ႇလႆႈလႄႈ လႆႈၶဵင်ႈၶႅင်ၵၼ်မႃးၼႂ်းထုင်ႉၼႆႉ ႁိုင်ဝႆႉတၢၼ်ႇတၢၼ်ႇယဝ်ႉၼင်ႇၵဝ်ႇ ၵူၼ်းပိုၼ်ႉတီႈလၢတ်ႈၼင်ႇၼႆသေတႃႉ ၵဵဝ်ႇၵပ်းလွင်ႈၼႆႉပႃးၸဵမ်လွင်ႈပၢင်တိုၵ်းၼႆႉသေ ယူႇတီႈၽူႈတွႆႇႁွၵ်ႈတႄႉ ၵပ်းသိုပ်ႇၸူး ၽူႈၶၢၼ်ပၢၵ်ႇတင်းသွင်ၾၢႆႇ ဢမ်ႇလႆႈ။

ၵူၼ်းပိုၼ်ႉတီႈၼႂ်းၸႄႈဝဵင်းၵျွၵ်ႉမႄးလၢတ်ႈတီႈၽူႈတွႆႇႁွၵ်ႈဝႃႈ တေႃႇထိုင်ႁူဝ်ၶမ်ႈၼႆႉသဵင်ၵွင်ႈတိုၵ်ႉတႅၵ်ႇယူႇဝႃႈၼႆ။

”တေႃႇထိုင်ႁူဝ်ၶမ်ႈၼႆႉ ၶဝ်တိုၵ်ႉယိုဝ်းၵၼ်ယူႇတၢင်း ၼႃးၶၢႆး -သူၼ်ဢွႆႈ (လႅၼ်ၶႅၼ်ႈ သီႇပေႃႈ-ၵျွၵ်ႉမႄး) ၼႆႉၶႃႈၼေႈ ။ ၸွမ်းၼင်ႇၶၢဝ်ႇၵူၼ်းၸမ်ၸႂ်ၾၢႆႇသိုၵ်းၶူဝ်းၶဵဝ်တႄႉဝႃႈ – သိုၵ်းလွႆပူၼ်ႉၶဝ်ႉမႃးၼႂ်းပိုၼ်ႉတီႈသေဢမ်ႇၵႃး လူင်းၵႃးမႃးၵေႃႈ ယိုဝ်းသႂ်ႇၵမ်းလဵဝ်လႄႈ ၸင်ႇပဵၼ်ပၢင်တိုၵ်းၼႆဢေႃႈ ”

ပၢင်တိုၵ်းၼႆႉ ၵူၼ်းပိုၼ်ႉတီႈလၢတ်ႈဝႃႈ ၾၢႆႇသိုၵ်းTNLA တၢႆ 11 ၵေႃႉ ၊ ၾၢႆႇတၢင်းၽူႈၼမ်းသိုၵ်း TNLA ၵေႃႈယင်းသင်ႇပၼ်ၶႂၢင်ႉၵူၼ်းသိုၵ်းၶဝ်ဝႆႉဝႃႈ ႁၼ် သိုၵ်းတႆးတီႈလႂ်ၵေႃႈယိုဝ်းလႆႈ ဝႃႈၼႆလူးၵွၼ်ႇ။ ၵဵဝ်ႇၵပ်းလွင်ႈၼႆႉ တႃႇတေထၢမ်တူၺ်းလွင်ႈတၢင်းမၼ်းၼၼ်ႉ ၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ TNLA ယူႇၵေႃႈ ၵပ်းပႆႇလႆႈ။

တီႈဝဵင်းၵျွၵ်ႉမႄးလႄႈ သီႇပေႃႉၼႆႉ သိုၵ်း TNLA တင်း PDF ပိုတ်းယိုဝ်းတိုၵ်းတေႃးၵၼ်တင်းသိုၵ်းမၢၼ်ႈ မႃးႁၢဝ်ႈႁႅင်း တင်ႈတႄႇ ဝၼ်းတီႈ 25 လိူၼ်ၵျုၼ်ႊၼၼ်ႉမႃး တေႃႇထိုင် ယၢမ်းလဵဝ် ပၢင်တိုၵ်းပႆႇယဵၼ်။ ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင်၊ ၶိူင်ႈမိၼ် တိုၵ်းၸွႆႈလႄႈ ၵူၼ်းၵျွၵ်ႉမႄး လႆႈပၢႆႈၽေးသိုၵ်းမွၵ်ႈ 16,000 ။ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 50 ပၢႆလႄႈ ႁိူၼ်းယေး ဝတ်ႉ ဝႃးၽႃသိူဝ်ႇ လူႉၵွႆၸွမ်းထႅင်ႈတင်းၼမ်။

ၸွမ်းၼင်ႇ ၽႅၼ်ၵၢၼ်ယၼ်ႇသိုၵ်း 1027 ၼၼ်ႉသေ တႄႇသိုပ်ႇလၢမ်းမႃး ၼႂ်းႁၢင်လိူၼ်ၵျုၼ်ႊၼႆႉ ယူႇ တီႈ တပ်ႉသိုၵ်း TNLA တင်း PDF လေႃႇတိုၵ်း တပ်ႉသိုၵ်းမၢၼ်ႈမႃးထႅင်ႈ ႁၢဝ်ႈႁႅင်း မိူၼ်ၼင်ႇ – ၼႂ်းၸႄႈ ဝဵင်းၵျွၵ်ႉမႄး၊ သီႇပေႃႉ၊ မိူင်းမိတ်ႈ၊ ၼွင်ၶဵဝ်၊ မိူင်းၵုတ်ႈ ၸိူဝ်းၼႆႉ။

ယၢမ်းလဵဝ် ပၢင်တိုၵ်းလၢမ်းၽႄႈထိုင် တီႈဝဵင်းလႃႈသဵဝ်ႈ ၸိူဝ်းၼႆႉထႅင်ႈ ၼၼ်ႉသမ်ႉ သိုၵ်းမၢၼ်ႈတင်း သိုၵ်း MNDAA ယိုဝ်းၵၼ် ႁၢဝ်ႈႁႅင်း။ လိူဝ်ၼၼ်ႉ တီႈဝဵင်းမိူင်းယႆၵေႃႈ တင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ် သိုၵ်းၵၼ်ဝႆႉထႅင်ႈ ႁဵတ်းႁႂ်ႈ ၵူၼ်းမိူင်းပၢႆႈၽေးသိုၵ်း ဢမ်ႇယွမ်း 200 ၵေႃႉ ယွၼ်ႉသိုၵ်းမၢၼ်ႈ လၢမ်းယိုဝ်း ၵွင်ႈလူင် ၵႂႃႇၵူႈႁူးၵူႈတၢင်း ၼႆယဝ်ႉ။