တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈ ယိုတ်းမိူင်းလႄႈ သိုၵ်း TNLA ႁူမ်းတင်း PDF ပိုတ်းယိုဝ်း တိုၵ်းတေႃးၵၼ် ႁၢဝ်ႈႁႅင်း တႄႇႁၢင်လိူၼ်ၵျုၼ်ႊမႃး တေႃႇထိုင်ဝၼ်းမိူဝ်ႈၼႆႉ သဵင်ၵွင်ႈပႆႇ ယဵၼ်သိုၵ်း TNLA တင်း PDF ဢဝ်ၻရူၼ်ႊမႃးပွႆႇမၢၵ်ႇ။

သိုၵ်းမၢၼ်ႈသမ်ႉ ဢဝ်ၵွင်ႈလူင်လၢမ်းလိမ်းပိုတ်းယိုဝ်း တူၵ်းသႂ်ႇႁိူၼ်းယေး ၵူၼ်းမိူင်း ဝတ်ႉမုၼ်ၸဝ်ႈ လႄႈ သဵၼ်ႈတႃႈသၢႆတၢင်း – ၶူဝ် ၸိူဝ်းၼႆႉလူႉၵွႆ။ ၼႂ်းၶၢဝ်းတၢင်း 3 ဝၼ်းၼႆႉၵူၺ်း ၵူၼ်းမိူင်း ၺႃးၸၢၵ်ႇ မၢၵ်ႇမၢတ်ႇၸဵပ်းၸွမ်း ယွၼ်ႉမၢၵ်ႇလူင် ဢမ်ႇယွမ်း 7 ၵေႃႉ ဝႃႈၼႆ။

ဝၼ်းတီႈ 4/7/2024 ၵၢင်ၶမ်ႈ 7 မူင်း သိုၵ်းတဢၢင်း TNLA လႄႈ သိုၵ်းမၢၼ်ႈ ယိုဝ်းၵၼ်ႁိုင် ၶိုင်ႈၸူဝ်ႈမူင်း မၢၵ်ႇလူင် တူၵ်းသႂ်ႇႁိူၼ်း လင်ၼိုင်ႈ ၼႂ်းဝၢၼ်ႈႁၢတ်ႇလႅင် ပွၵ်ႉၸၢင်ႈၶမ်းၸၢၼ်း ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မီးၵူၼ်းမၢတ်ႇၸဵပ်းႁႅင်း ၵေႃႉၼိုင်ႈ ဝႃႈၼႆ။

ၵူၼ်းၸၢႆး ဢၼ်ၺႃးမၢၵ်ႇလူင်တူၵ်းသႂ်ႇၼႆႉ ဢႃယုမွၵ်ႈ 30 ။ လိူဝ်ၼၼ်ႉ ႁိူၼ်းယူႇႁိမ်းၸမ်ၵၼ်ၵေႃႈ ၺႃးၸၢၵ်ႇမၢၵ်ႇ ၽူင်ႉသႂ်ႇသေ ၾႆးလၢမ်းမႆႈႁိူၼ်းပႃးၼႆ ၵူၼ်းဝဵင်းသီႇပေႃႉ လၢတ်ႈၼႄဝႆႉၼင်ႇၼႆ –

“ပဵၼ်ၸၢႆးၵေႃႉၼိုင်ႈ တိူဝ်ႉၺႃးတီႈငွၵ်းသွၵ်ႈမၼ်း ၼႆဢေႃႈ ဢႃယု တေမီးမွၵ်ႈ 30 ဢၼ်ႁဝ်းငိၼ်း တႄႉ ဢၼ်တူၵ်းသႂ်ႇၼႆႉ တေပဵၼ်မၢၵ်ႇလူင်ဢေႃႈ လႆႈငိၼ်းသိုၵ်းၶဝ် ပိုတ်းယိုဝ်းၵၼ်တင်း 2 ၾၢႆႇ။  မၢင်ၵမ်းငိၼ်းပႃး သဵင်ၵွင်ႈၸၢၵ်ႈ ၸိူဝ်းၼႆႉပႃး ၽႂ်ၵေႃႈ ႁိုဝ်တေႁတ်းၵႂႃႇတူၺ်းၽႂ် လိူဝ်သေၵူဝ် မူၵ်း ယူႇၸွမ်းႁိူၼ်းၽႂ်မၼ်း”- ဝႃႈၼႆ။

ထိုင်မႃး ဝၼ်းတီႈ 5/7/2024 ၼႆႉတႄႉ တီႈဝဵင်းသီႇပေႃႉ သဵင်ၵွင်ႈယဵၼ်ဝႆႉလႄႈ ၵူၼ်းမိူင်းဢွၼ်ၵၼ် ႁိပ်ႈၼႅတ်ႈဢွၵ်ႇ ႁႃသိုဝ်ႉ ၶိူင်ႈၶူဝ်းၸႂ်ႉသွႆၼႂ်းၼႃႈႁိူၼ်းလႄႈ ၶွင်ၵိၼ်ယႅမ်ႉဢၼ်ႁႅင်ႈဢၼ်ႁွင် ဢၼ်ဝႆႉၵိၼ်လႆႈၶၢဝ်းယၢဝ်း။

ၾၢႆႇၼိုင်ႈၵေႃႈ သမ်ႉမီးၶၢဝ်ႇလိုဝ်းၼႂ်းၵူၼ်းဝၢၼ်ႈဝႃႈ ၸုမ်းယိပ်းၵွင်ႈၵၢင်ႇ သင်ႇႁႂ်ႈၵူၼ်းဝၢၼ်ႈႁၢတ်ႇလႅင် ငိူင်ႉပၢႆႈၼႆလႄႈ ယိင်ႈၶႅၼ်းႁဵတ်းႁႂ်ႈၵူၼ်းဝၢၼ်ႈတူၵ်းၸႂ်ၵူဝ်ႁႄ။ ၵူၺ်းၵႃႈ ပဵၼ်သိုၵ်းၸုမ်းလႂ်ၸႂ်ႉ ပၢႆႈၼႆတႄႉ ပႆႇၸၢင်ႈယိုၼ်ယၼ်။

တွၼ်ႈတႃႇ ၸဝ်ႈသူၼ်ႁႆႈၼႃးၵေႃႈ လႆႈပွႆႇပႅတ်ႈ မၢၵ်ႇၶဝ်ႈတဝ်ႈၼမ်ႉဝႆႉၼႂ်းသူၼ်သေပၢႆႈ ယွၼ်ႉမႆႈၸႂ် ၵူဝ်ဢမ်ႇၸၢင်ႈမႃးဢဝ်ၶိုၼ်းသေ ၵူဝ်မၢၵ်ႇၶဝ်ႈတဝ်ႈၼမ်ႉၵႄႇ – ၼဝ်ႈပႅတ်ႈ။ ၵွပ်ႈၼႆ မွၵ်ႇမၢၵ်ႇႁၢၵ်ႈ ႁူဝ်မၢင်ၸိူဝ်းၼႆႉ ပႆႇထိုင်ၶၢဝ်းဢဝ် ၵေႃႈ ၵႃႈလႆႈဢဝ်မႃးၶၢႆၵေႃႈမီး ၵူၼ်းသီႇပေႃႉ သိုပ်ႇလၢတ်ႈၼႄဝႆႉ ၼင်ႇၼႆ –

“ဝၢၼ်ႈမိူင်းယုင်ႈၸိူင်ႉၼႆလႄႈ ၵႂႃႇၸၢႆႇၵၢတ်ႇၵေႃႈ ၸဵမ်ၵူၼ်းၶၢႆၵူၼ်းသိုဝ်ႉ လႆႈႁိပ်ႈမႃးႁိပ်ႈမိူဝ်း။ မိူၼ်ၼင်ႇ ၵူၼ်းၽုၵ်ႇ ၽၵ်းၶၢႆၸိူဝ်းၼႆႉၵေႃႈ ပေႃးတေဢမ်ႇမႃးၶၢႆသမ်ႉ မွၵ်ႇမၢၵ်ႇႁၢၵ်ႈႁူဝ် ၸိူဝ်းၼႆႉ တေၵႄႇတေၼဝ်ႈပႅတ်ႈလၢႆလၢႆ ။ ယွၼ်ႉ ၼၼ် ၵူဝ်ယူႇၵေႃႈ ၵႃႈလႆႈၵႂႃႇၶၢႆၼႂ်းၵၢတ်ႇ” – ဝႃႈၼႆ။

ဝၼ်းတီႈ 01/07/2024 ၼၼ်ႉၵေႃႈ  မၢၵ်ႇလူင်တူၵ်းသႂ်ႇ တီႈၼႂ်းပွၵ်ႉၸၢမ်ၽိူၵ်ႇ ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းမၢတ်ႇၸဵပ်း 5 ၵေႃႉ ပဵၼ်ၸၢႆး 2 ၵေႃႉလႄႈ ယိင်း 3 ၵေႃႉ ဝႃႈၼႆ။

ယၢမ်းလဵဝ် တီႈၸႄႈဝဵင်းသီႇပေႃႉၼႆႉ ၾႆးၾႃႉၵေႃႈၶၢတ်ႇ၊ ၸိူဝ်းမီးၾႆးသူဝ်ႊလႃႊတႄႉ ၶႅၼ်းၸႂ်ဢိတ်း ၼိုင်ႈယူႇ။ ၵမ်ႈၼမ် ဢမ်ႇမီးၾႆးသူဝ်ႊလႃႊလႄႈ တႃႇႁုင်ၵိၼ်ၶဝ်ႈၽၵ်း တႃႇႁဵတ်းၵၢၼ်ငၢၼ်းတႄႉ ဢမ်ႇၸၢင်ႈ။ ထၢၼ်ႇလႄႈ ၽိုၼ်းၵေႃႈ ဢမ်ႇမီးၵူၼ်းဢဝ်မႃးၶၢႆလႄႈ ပဵၼ်ဢၼ်ယၢပ်ႇၽိုတ်ႇၸႂ်ႁႅင်း တႄႉတႄႉ ဝႃႈၼႆ။

ၾၢႆႇၼိုင်ႈ ဢိင်ၼိူဝ် သဵၼ်ႈတၢင်းတေႃႉသူင်ႇၵႃႉၶၢႆၵေႃႈၶၢတ်ႇသေ ၵႅတ်ႉသ် တႃႇႁုင်တူမ်ႈၵေႃႈ ဢမ်ႇမီးၶၢႆ။ ၸိူဝ်းၵိုတ်းဝႆႉၸွမ်းၵၢတ်ႇ ၸွမ်းႁၢၼ်ႉၵေႃႈ ၵႃႈၶၼ်ပုင်ႈၶိုၼ်ႈ လုၵ်ႉတီႈ (သႅၼ်းလဵၵ်ႉ) 2 မိုၼ်ႇပျႃးပၢႆ ၼၼ်ႉ ၶၢႆထိုင် 7 မိုၼ်ပျႃးပၢႆ။

ၼမ်ႉမၼ်းၸၢၵ်ႈ ၸိူဝ်းၼႆႉၵေႃႈ ယူႇတီႈၸဝ်ႈၶွင်ႁၢၼ်ႉ ၸႅၵ်ႇၶၢႆပၼ်ၵေႃႉဢိတ်းၵေႃႉဢွတ်းၵူၺ်း။  ရူတ်ႉၵႃး ၼိုင်ႈလမ်းၶၢႆပၼ်တႃႇ 5 မိုၼ်ႇပျႃး၊ ရူတ်ႉၶိူင်ႈ ၼိုင်ႈလမ်းၶၢႆပၼ် တႃႇ 1 မိုၼ်ႇၵူၺ်း။ ပမ်ႉၼမ်ႉမၼ်း ၼႂ်းဝဵင်းသီႇပေႃႉ ဢမ်ႇပိုတ်ႇယဝ်ႉလႄႈ လႆႈဢွၵ်ႇၵႂႃႇသိုဝ်ႉ တီႈတူဝ်းၵဵတ်ႉ၊ လႆႈပၼ် ၼိုင်ႈ လိတ်ႊလႂ် 3,500 ပျႃး။ ၸိူဝ်းဢၼ်လူဝ်ႇၸႂ်ႉႁႅင်းၼႃႇယဝ်ႉၼၼ်ႉ ၼိုင်ႈလိတ်ႊ 5,000 ပျႃးၵေႃႈ လႆႈသိုဝ်ႉ ဝႃႈၼႆ။

ပၢင်တိုၵ်းၵမ်းၼႆႉ ၼမ်ႉမၼ်းၸၢၵ်ႈ – ၵႅတ်ႉသ်ၸိူဝ်းၼႆႉ ၵူၺ်းဢမ်ႇၵႃး ၶူဝ်းၶွင်ၵိၼ်ယႅမ်ႉ ပႃးၸဵမ် ၶဝ်ႈ သၢၼ်ႁႃသိုဝ်ႉယၢပ်ႇ။ မၢၵ်ႇၶိူဝ်သူမ်ႈ ယၢမ်းလဵဝ် ၼိုင်ႈၸိတ်ႉလႂ်ၶၢႆ 3,000 ပျႃး (တေႃႉတႄႉပႃး 5 လုၵ်ႈၵူၺ်း) ။ ၸိူဝ်းလႆႈပၢႆႈၽေးသိုၵ်းၵေႃႈ ယၢပ်ႇၽိုတ်ႇၵိၼ်းၸႂ် ၊ၸိူဝ်းဢမ်ႇလႆႈပၢႆႈၽေးသိုၵ်းၵေႃႈ လႆႈပႅင်း ၵိၼ်ပႅင်းၸႂ်ႉ ပႃးၵၼ်ယၢပ်ႇၽိုတ်ႇတင်းဝဵင်း ဝႃႈၼႆ။

ယၢမ်းလဵဝ် ၵူၼ်းမိူင်းသီႇပေႃႉ ဢၼ်လႆႈပၢႆႈၽေးသိုၵ်းဝႆႉတႄႉ တင်းမူတ်းဢမ်ႇယွမ်း 10 ပွၵ်ႉ ႁူဝ်ၵူၼ်း ဢမ်ႇယွမ်းႁဵင် ၵမ်ႈၼမ် ပၢႆႈႁွတ်ႈဝႆႉ တၢင်းဝတ်ႉၼွင်ၵၢတ်ႇ၊ ၵၢင်ႉမေႃႇ၊ ၼွင်ဢိုင်ႇ၊ ၼွင်ဢၢင်ႇ၊ သီႇသုင်ႇ၊ ၵျွင်းၵဝ်ႇ၊ ၵုင်းသႃႇ၊ ၵုင်းၵေႃႇ၊ ယေႇႁေႃႇလႄႈ ဝတ်ႉ 2500 ၸိူဝ်းၼႆႉ။