မိူဝ်ႈၼႆႉ ဝၼ်းတီႈ 05/07/2024 ယၢမ်းၵၢင်ၼႂ် 9 မူင်း ပလိၵ်ႈမၢၼ်ႈ ပွႆႇပၼ်ၸုမ်းၵျႃးၽႅၼ်ႉ 400 ပၢႆ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပလိၵ်ႈမၢၼ်ႈၶဝ် ပွႆႇပၼ် ၸုမ်းၵျႃးၽႅၼ်ႉ တီႈ ႁူင်းပလိၵ်ႈမၢၼ်ႈ မူႇၸေႊၼႆႉ ႁူဝ်ၵူၼ်း 400 ပၢႆ။ ၵမ်ႈၼမ် ပဵၼ်ၸၢဝ်းၶႄႇ ယဝ်ႉၵေႃႈ ၸၢဝ်းတႆး ၵမ်ႈၽွင်ႈ ပဵၼ်ၵူၼ်း ဢၼ်ယူႇၼႂ်းမိူင်းမၢၼ်ႈ ၸိူဝ်းၼႆႉ။ ၸုမ်းၵျႃးၽႅၼ်ႉၼႆႉ ထုၵ်ႇတီႉၺွပ်း ၸွႆးတြႃးမႃးတဵမ် 3 လိူၼ်ယဝ်ႉသေ ၸင်ႇပွႆႇ ၶိုၼ်းၶႃႈဢေႃႈ”- ဝႃႈၼႆ။

ၸုမ်းၵျႃးၽႅၼ်ႉၼႆႉ မိူဝ်ႈဝၼ်းတီႈ 27/03/2024 ၼၼ်ႉ ၺႃးသိုၵ်းမၢၼ်ႈ ယိုတ်းမိူင်းတင်း ပလိၵ်ႈမၢၼ်ႈ ႁူမ်ႈၵၼ် ၶဝ်ႈတီႉၺွပ်း ႁူဝ်ၵူၼ်းမွၵ်ႈ 600 တီႈဝဵင်းမူႇၸေႊၼႆႉသေ ၸွႆးတြႃးဢဝ်လိူင်ႈ ၸွမ်းၼင်ႇ ပၵ်းပိူင် မၢႆမီႈဝၢၼ်ႈမိူင်းမီးဝႆႉ မတ်ႉတႃ 66 (ဂ) လူၺ်းတၢင်းၽိတ်း ၸႂ်ႉၼႅင်ႈသၢၼ် ၵပ်းသိုပ်ႇတိတ်းတေႃႇ လႅၼ်ၵိၼ်ငိုၼ်းၵၼ်လႄႈ လွင်ႈလၵ်ႉၶူဝ်းၶွင် – ငိုၼ်းတွင်း ၸိူဝ်းၼႆႉ ဝႃႈၼႆ။

ၸုမ်းၵျႃးၽႅၼ်ႉ ဢၼ်ထုၵ်ႇပွႆႇတူဝ် ဢွၵ်ႇမႃး ႁူဝ်ၵူၼ်း 400 ပၢႆၼႆႉ ၵမ်ႈၼမ် ပဵၼ်ၵူၼ်းၼုမ်ႇလႄႈ ၼၢင်းယိင်း။

မိူၼ်ၼင်ႇ တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼၼ်ႉၵေႃႈ မိူဝ်ႈၼႂ်းလိူၼ်ၾႅပ်ႊပိဝ်ႊရီႊ ပူၼ်ႉမႃး ၼၼ်ႉၵေႃႈ ပလိၵ်ႈမၢၼ်ႈ ၶဝ်ႈတီႉၺွပ်းၵူၼ်းၼုမ်ႇ ၸိူဝ်းဢၼ် ႁဵတ်းၵၢၼ်လွၵ်ႇလႅၼ်ငိုၼ်းဢွၼ်ႊလၢႆႊ ၾၢႆႇလင်ႁူင်းႁႅမ်း 1G1 ၼၼ်ႉ ႁူဝ်ၼပ်ႉၵူၼ်း ဢမ်ႇယွမ်း 700 ယိုတ်းပႃးႁိူၼ်းယေးထႅင်ႈ။ ၵူၺ်းၵႃႈ ၵူၼ်း ၸိူဝ်းၺႃးၺွပ်းၼၼ်ႉ ၸၢႆႇငိုၼ်းပၼ်သေ လွတ်ႈဢွၵ်ႇၶိုၼ်း။ ယၢမ်းလဵဝ် လႄႇႁႃၶၢတ်ႈႁိူၼ်းၶၢတ်ႈႁွင်ႈ သေ ပၼ်ႇၵၢၼ်ၶိုၼ်းမိူၼ်ၵဝ်ႇ။ ယႃႇဝႃႈ ၸုမ်း ၵျႃးၽႅၼ်ႉ တေယွမ်းလူင်း ယိင်ႈၶႅၼ်းၼမ်လိူဝ်တိူဝ်းမႃး ထႅင်ႈ ၼႆယဝ်ႉ။

မိူၼ်ၼင်ႇ ႁူင်းႁႅမ်းၸိုဝ်ႈယႂ်ႇ ၸိူဝ်းဢၼ်မီးၼႂ်းပွၵ်ႉသၼ်သၢႆး၊ ပွၵ်ႉႁွင်ႈလိုၵ်ႉ၊ ပွၵ်ႉမႄႈၶၢဝ် ၸိူဝ်းၼႆႉၵေႃႈ ပဵၼ်ၵူၼ်း ၸၢဝ်းၶႄႇလွၼ်ႉလွၼ်ႉ။ ၼႂ်းၼၼ်ႉ ၵမ်ႈၼမ် ပဵၼ်ၵူၼ်းႁဵတ်းၵၢၼ်ဢွၼ်ႊလၢႆႊ။ ၸၢဝ်းၶႄႇ ၸိူဝ်းမႃးသွၼ်ႈတူဝ်ယူႇဝႆႉ ၼႂ်းတႃႈၶီႈလဵၵ်းၼႆႉ မၢင်ၵေႃႉၵေႃႈ ၸၢင်ႈပလိၵ်ႈမၢၼ်ႈၶဝ် ႁဵတ်းပၼ်မၢႆၾၢင် (မၢတ်ႈပူင်ႇတိၼ်ႇ) သေ ယူႇဝႆႉၵေႃႈမီး – ၵူၼ်းပိုၼ်ႉတီႈလၢတ်ႈ။