မိူဝ်ႈၼႆႉ ဝၼ်းတီႈ 4/7/2024 ယၢမ်းၵၢင်ဝၼ်း ၾၢႆႇပၢႆးပၺ်ႇၺႃႇတဢၢင်း TLEC ၵိုင်ႉၵၢင်ႉသင်ႇပိၵ်ႉဢိုတ်း ၶိုၼ်းႁူင်း ႁဵၼ်း ဢၼ်ပိုတ်ႇဝႆႉ တီႈဝဵင်ၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဢၼ်ယူႇတီႈ သိုၵ်းတဢၢင်း TNLA ပၼ်ၶႂၢင်ႉပိုတ်ႇဝႆႉ မိူဝ်ႈၵၢင်လိူၼ်ၵျုၼ်ႊၼၼ်ႉ ဝႃႈၼႆ။

ၵူၼ်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉ ဢၼ်မႃးသင်ႇလၢတ်ႈတႄႉ ပဵၼ်ၸုမ်းပၢႆးပၺ်ႇၺႃႇ တဢၢင်း TLEC ၶဝ်ၼၼ်ႉဢေႃႈ။ ႁူင်းႁဵၼ်းဢၼ်ၶဝ်ပိုတ်ႇဝႆႉတႄႉ မီး 3 ဢွင်ႈတီႈ ၼင်ႇဢၼ်ၶႃႈႁူႉတႄႉ။ ၵူၺ်းၵႃႈ ႁူင်းႁဵၼ်း ၶႄႇတႄႉ ဢိုတ်းဢမ်ႇဢိုတ်းတႄႉ ပႆႇႁူႉ”- ဝႃႈၼႆ။

ႁူင်းႁဵၼ်း ဢၼ်ၺႃးသင်ႇပိၵ်ႉဢိုတ်းၼႆႉ ပဵၼ်ႁူင်းႁဵၼ်း ၸၼ်ႉၵၢင် မၢႆ (1) ၊ ၸၼ်ႉသုင် မၢႆ (1) လႄႈ မၢႆ (3) ၸဵမ်ၸိူဝ်း ၼႆႉ။ ၵူၺ်းၵႃႈ ပဵၼ်ႁူင်းႁဵၼ်း ဢၼ်သိုၵ်းတဢၢင်းပၼ်ၶႂၢင်ႉ ပိုတ်ႇယူႇယၢမ်းလဵဝ်။ မိူဝ်ႈငဝ်းလၢႆး ဝၢၼ်ႈမိူင်းၼိမ်တႄႉ ႁူင်းႁဵၼ်းတီႈၼမ်ႉၶမ်းၼႆႉ ပိုတ်ႇဢမ်ႇယွမ်း 6 တီႈ ဝႃႈၼႆ။

ဢၼ်ယူႇတီႈ ႁွင်ႈၵၢၼ်ပၢႆးပၺ်ႇၺႃႇ ၶွင်တဢၢင်း TLEC ပိုတ်ႇဝႆႉၼႆႉ ႁူဝ်ၼပ်ႉလုၵ်ႈႁဵၼ်း ဢမ်ႇၼမ်လႄႈ ၵွပ်ႈၼႆ ၸင်ႇလႆႈပိုတ်ႇမႃး ႁူင်းႁဵၼ်း 3 လင်ၼႆႉ သေတႃႉၵေႃႈ လုၵ်ႈႁဵၼ်းယင်းဢမ်ႇၼမ် – ၵူၼ်းပိုၼ်ႉတီႈ လၢတ်ႈ။

“ၼႂ်းပၢင်ၵုမ်ႁၢႆႊၵႅၼ်ႊ ဢၼ်သိုၵ်းမၢၼ်ႈလႄႈ ၸုမ်းဢူၺ်းလီပွတ်းႁွင်ႇၶဝ် ၵႂႃႇဢုပ်ႇၵၼ်တီႈ မိူင်းၶႄႇ ၵမ်း လိုၼ်းၼႆႉ ၶဝ်တူၵ်းလူင်းသင်ၵၼ်ၽွင်ႈတႄႉ ဢမ်ႇႁူႉ။ သိုၵ်းမၢၼ်ႈ လႅပ်ႈတေမႃးပိုတ်းယိုဝ်း ဢဝ်ၶိုၼ်း ၸႄႈဝဵင်း ဢၼ်သိုၵ်းၸၢဝ်းၶိူဝ်းၶဝ် ၵုမ်းဝႆႉႁိုဝ် ဢမ်ႇႁူႉလႄႈ ဝၢႆးသေၶဝ်ၵႂႃႇဢုပ်ႇၵၼ်မႃး တၢင်းၼွင်ၶဵဝ် ၼမ်ႉတူႈၸိူဝ်းၼႆႉၵေႃႈ ၸင်ႇၵိုင်ႉၵၢင်ႉပဵၼ်ပၢင်တိုၵ်းမႃးယဝ်ႉ။ ၵမ်းၼႆႉ မႃးပဵၼ်တၢင်းလႃႈသဵဝ်ႈထႅင်ႈ” – ၵူၼ်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

လိူၼ်ၵျုၼ်ႊ – ၵျုႊလၢႆႊၼႆႉ ႁွင်ႈၵၢၼ်ၾၢႆႇပၢႆးပၺ်ႇၺႃႇ လူင်ပွင်ၸိုင်ႈမိူင်းမၢၼ်ႈ တႂ်ႈသိုၵ်းမၢၼ်ႈ ၵုမ်းၵမ် တေပိုတ်ႇႁူင်းႁဵၼ်း ပတ်းပိုၼ်ႉတူဝ်ႈမိူင်း တႃႇပီၵၢၼ်ႁဵၼ်း 2024 – 2025 ၼႆသေ တွၼ်ႈတႃႇ ၼႂ်းၸႄႈဝဵင်းၼမ်ႉၶမ်း ၼႆႉတႄႉ သိုၵ်းတဢၢင်း TNLA ပၢၵ်ႈပႅတ်ႈ ၵၢၼ်သွၼ်ၵၢၼ်ႁဵၼ်း လၵ်းသုတ်ႇပၢႆးပၺ်ႇၺႃႇ ၶွင်သိုၵ်းမၢၼ်ႈၼႆႉ ဝႃႈၼႆ။

ၼႂ်းလိူၼ်ၵျုၼ်ႊၼၼ်ႉ သိုၵ်းတဢၢင်း TNLA ပၢၵ်ႈပႅတ်ႈ ႁွင်ႈၵၢၼ်ၾၢႆႇပၢႆးပၺ်ႇၺႃႇ လူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ်သေ ၶိုၼ်းပိုတ်ႇႁူင်းႁဵၼ်း ပႆႇႁိုင်သင် သမ်ႉတေလႆႈပိၵ်ႉဢိုတ်းၸိူင်ႉၼႆ ယွၼ်ႉၵူဝ် သိုၵ်းမၢၼ်ႈၶဝ် မႃးတိုၵ်းဢဝ် ၶိုၼ်းဢွင်ႈတီႈ ဢၼ်သိုၵ်းၸၢဝ်းၶိူဝ်းၵုမ်းဝႆႉ ၸိူဝ်းၼၼ်ႉၵူၺ်း –  ၵူၼ်းပိုၼ်ႉတီႈ လၢမ်းၶၢတ်ႈဝႆႉၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 23/06/2024 ၼၼ်ႉၵေႃႈ သိုၵ်းတဢၢင်း TNLA  ဢဵၼ်ႁႅင်း ဢမ်ႇယွမ်း 40 ၶီႇၵႃး မႃး 3 လမ်းသေ မႃးယိုတ်းဢဝ် ႁူင်းႁဵၼ်း တီႈဝၢၼ်ႈၵႃလႅင် ၸႄႈဝဵင်းၵူတ်ႉၶၢႆ ၼၼ်ႉၵေႃႈ ႁဵတ်းႁႂ်ႈလုၵ်ႈဢွၼ်ႇ 200 ပၢႆ လႆႈၶၢတ်ႇ ၵၢၼ်ႁဵၼ်း။ လွင်ႈၼႆႉ ထိုင်ယၢမ်းလဵဝ် ပႆႇႁၼ်ပိုၼ်ၽၢဝ်ႇသင်။

လိူဝ်ၼၼ်ႉ မိူၼ်ၼင်ႇ – ဝဵင်းၵုၼ်လူင် ၊ ဝဵင်းၼမ်ႉၽႃႈ( ၶျိၼ်းသူၺ်ႇႁေႃႇ) ၊ လၢဝ်ႇၵၢႆး ၸိူဝ်းၼႆႉၵေႃႈ သိုၵ်းၵဝ်ႈၵၢင်ႉ MNDAA သင်ႇပိၵ်ႉဢိုတ်းႁူင်းႁဵၼ်းလႄႈ ႁူင်းယႃ ၸိူဝ်းၼႆႉမႃး မိူဝ်ႈဝႃး ဝၼ်းတီႈ 3/7/2024 ယွၼ်ႉၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ ဢိင်ၼိူဝ် လွင်ႈပိၵ်ႉဢိုတ်း ႁူင်းႁဵၼ်းၼႆႉသေ ဢမ်ႇႁူႉဝႃႈ တေပိုတ်ႇၶိုၼ်းမိူဝ်ႈလႂ်။