သိုၵ်းမၢၼ်ႈ တင်ႈၸႂ် ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၼႂ်းၸႄႈဝဵင်းသႅၼ်ဝီ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ ၵေႃႉၼိုင်ႈလႄႈ တိူဝ်ႉၺႃးႁိူၼ်းယေး လူႉၵွႆ (ယွၵ်းယွႆ) ထႅင်ႈ 2 လင်။
ဝၼ်းတီႈ 03/07/2024 ယၢမ်းဝၢႆးဝၼ်း 2 မူင်းပၢႆ မၢၵ်ႇၶိူင်ႈမိၼ် သိုၵ်းမၢၼ်ႈ ယိုတ်းမိူင်း မႃးပွႆႇသႂ်ႇ တီႈၼႂ်းဢိူင်ႇမိူင်းလီ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉၺႃးႁိူၼ်းယေး ၵူၼ်းဝၢၼ်ႈ လင်ၼိုင်ႈသေ ၸၢၵ်ႇမၢၵ်ႇတိူဝ်ႉသႂ်ႇ ၽူႈၸၢႆး ၸၢဝ်းၶၢင် လူႉတၢႆၵိုၵ်းႁိူၼ်း ၵေႃႉၼိုင်ႈ ဝႃႈၼႆ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် ၵျႅၵ်ႉၾၢႆႊတိူဝ်ႊ (Jet Fighter) ၼၼ်ႉသေ မႃးပွႆႇသႂ်ႇ တိူဝ်ႉၺႃးၽူႈၸၢႆး ၸၢဝ်းၶၢင် တီႈဢိူင်ႇမိူင်းလီၼႆႉ လူႉတၢႆၵေႃႉၼိုင်ႈ။ ယၢမ်းၵၢင်ၶိုၼ်းလိုၵ်းသမ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇထႅင်ႈ တီႈႁိမ်းႁူင်းပလိၵ်ႈမၢၼ်ႈ ၼၼ်ႉၵေႃႈ တိူဝ်ႉၺႃးႁိူၼ်းယေး ၵူၼ်းမိူင်းလူႉၵွႆ (ယွၵ်းယွႆ) 2 လင်ဢေႃႈ”- ဝႃႈၼႆ။
ထိုင်မႃး ဝၼ်းတီႈ 04/07/2024 ယၢမ်းၵၢင်ၼႂ် 12:15 မူင်း (တဵင်ႈၶိုၼ်းၸၢႆႉ) သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် ၵျႅၵ်ႉ ၾၢႆႊတိူဝ်ႊ မႃးပွႆႇမၢၵ်ႇသႂ်ႇ 3 လုၵ်ႈ တီႈပွၵ်ႉ 2 ႁိမ်းႁူင်းပလိၵ်ႈမၢၼ်ႈ မၢၵ်ႇလူင် တူၵ်းသႂ်ႇ ႁိူၼ်းယေး ပႃႈၼၢင်းလႃႉ လင် ၼိုင်ႈလႄႈ ႁိမ်းၼၼ်ႉထႅင်ႈလင်ၼိုင်ႈ ထုၵ်ႇယွၵ်းယွႆတင်းသွင်လင်။
“သိုၵ်းၵဝ်ႈၵၢင်ႉၼႆႉ ဝၢႆးလင် ၶဝ်ယိုတ်းလႆႈဝဵင်းသႅၼ်ဝီယဝ်ႉ ၶဝ်သွၼ်ႈယူႇဝႆႉ ၸွမ်းႁူင်းပလိၵ်ႈမၢၼ်ႈ၊ ႁူင်းယႃ၊ လုမ်းၽူႈၵွၼ်းၸႄႈဝဵင်း၊ လုမ်းႁွင်ႈၵၢၼ်လူင်ပွင်ၸိုင်ႈ ၸိူဝ်းၼႆႉသေ ထုၵ်ႇသိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တိူဝ်ႉၺႃးႁိူၼ်းယေး ၵူၼ်းမိူင်းလူႉၵွႆ။ ၵူၼ်းမိူင်းတႄႉ ဢမ်ႇလႆႈမၢတ်ႇၸဵပ်း လူႉတၢႆသင်ၶႃႈ ”- ၵူၼ်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
မိူဝ်ႈၽႅၼ်ၵၢၼ်ယၢၼ်ႇသိုၵ်း 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ – သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်းမႃး ႁၢဝ်ႈႁႅင်း ၼႂ်းၸိုင်ႈတႆးပွတ်း ႁွင်ႇၼၼ်ႉ ႁူမ်ႈပႃး ၼႂ်းၸႄႈဝဵင်းသႅၼ်ဝီ ဝဵင်းၼိုင်ႈ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း ပၢႆႈၽေးသိုၵ်း ၼပ်ႉႁူဝ်မိုၼ်ႇ၊ ႁိူၼ်းယေး ဝတ်ႉဝႃးၽႃသိူဝ်ႇ လူႉၵွႆမွၵ်ႈ 600 လင်လႄႈ တိူဝ်ႉၺႃးၵူၼ်းမိူင်း လူႉတၢႆ မၢတ်ႇၸဵပ်းၸွမ်းထႅင်ႈၼမ်။
ဝၢႆးပၢင်တိုၵ်းယဵၼ်လူင်းယဝ်ႉ ၵူၼ်းမိူင်းသႅၼ်ဝီ ဢၼ်လႆႈပၢႆႈၽေးသိုၵ်း ၵႂႃႇသွၼ်ႈဝႆႉ တၢင်ႇတီႈသီႇလႅၼ်ၼၼ်ႉ ဢွၼ် ၵၼ်ပွၵ်ႈမႃးယူႇသဝ်းၶိုၼ်း ႁိူၼ်းယေးၽႂ်မၼ်း တိုၵ်ႉမီးမွၵ်ႈ 3 လိူၼ်ၵူၺ်း ထုၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇထႅင်ႈ ၸိူင်ႉၼႆၼႆႉ ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်မၢၵ်ႇလူင် တူၵ်းသႂ်ႇထႅင်ႈ မိူၼ်မိူဝ်ႈပူၼ်ႉမႃးၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ