မိူဝ်ႈၼႆႉ ဝၼ်းတီႈ 04/07/2024 ၼမ်ႉထူမ်ႈၵၢတ်ႇလႄႈ ၸွမ်းပွၵ်ႉယွမ်ႇ ၼႂ်းဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း ယွၼ်ႉၾူၼ်တူၵ်းႁႅင်း ဝႃႈၼႆ။
ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၼမ်ႉထူမ်ႈ တီႈဝဵင်းတႃႈၶီႈလဵၵ်း ဢၼ်လႆႈႁူႉတႄႉ တီႈၵၢတ်ႇတႃႈလေႃႉ၊ ၵၢတ်ႇသၼ်သၢႆး၊ ၵၢတ်ႇဝၢၼ်ႈၵွင်း၊ ၵၢတ်ႇပယိၼ်ႉၼွင်ႇ ၸိူဝ်းၼႆႉ။ ယွၼ်ႉမိူဝ်ႈၶမ်ႈဝႃးၼႆႉ ၾူၼ်တူၵ်းႁႅင်းတင်းၶိုၼ်းၶႃႈဢေႃႈ”- ဝႃႈၼႆ။
ယွၼ်ႉၼမ်ႉႁူၺ်ႈၼမ်ႉလွႆ လႆႈထူမ်ႈ ယဝ်ႉၵေႃႈ မႄႈၼမ်ႉသၢႆၵေႃႈ ၼွင်းလူၼ်ႉၾင်ႇ ဝႃႈၼႆ။ လိူဝ်သေ ၼမ်ႉထူမ်ႈၵၢတ်ႇယဝ်ႉ မိူၼ်ၼင်ႇ ႁိူၼ်းယေး ၵူၼ်းမိူင်း ၸိူဝ်းၼႂ်းပွၵ်ႉယွမ်ႇ တၢင်းပွတ်းယွမ်ႇ တႃႈလေႃႉ၊ ပွၵ်ႉမၢၵ်ႇၵႃႇႁူဝ်ၶမ်း၊ ပွၵ်ႉမႄႈၶၢဝ်၊ ပွၵ်ႉဝၢၼ်ႈၵွင်း၊ ပွၵ်ႉပုင်းထုၼ်လႄႈ ၸိူဝ်းဢွင်ႈတီႈၶူင်းယၢၼ်း ၸိူဝ်းၼႆႉ ဝႃႈၼႆ။
ဝဵင်းတႃႈၶီႈလဵၵ်းၼႆႉ ပဵၼ်ဝဵင်းတိတ်းၸပ်းလႅၼ်လိၼ်ထႆး ယဝ်ႉၵေႃႈ ပဵၼ်ဝဵင်းၵႃႉၶၢႆပၢႆးမၢၵ်ႇမီးၵေႃႈၸႂ်ႈ လိူဝ်ၼၼ်ႉ ၵူၼ်းတၢင်ႇတီႈသီႇလႅၼ် မႃးယူႇသဝ်းႁႃၵိၼ်လဵင်ႉတွင်ႉၼမ် ယုၵ်းယၢၵ်း ဢၼ်ပႅတ်ႈၸွမ်းႁွင်ႈၼမ်ႉလႆ ၸိူဝ်းၼႆႉၵေႃႈ ၼမ် ထႅင်ႈၾၢႆႇၼိုင်ႈ ယူႇတီႈၾၢႆႇလိူမ်ႈလႆႇၶဝ်ၵေႃႈ ဢမ်ႇလၢင်းႁွင်ႈပၼ် ႁဵတ်းႁႂ်ႈႁွင်ႈၼမ်ႉၵႅပ်ႈ/ တၼ်မႃးသေ ပေႃး ၾူၼ်တူၵ်းမႃးၸိုင် ႁဵတ်းႁႂ်ႈၼမ်ႉဢမ်ႇၸၢင်ႈလႆလွင်ႈလီ ၵွပ်ႈၼႆလႄႈ ပေႃးထိုင်မႃးၶၢဝ်းႁိုဝ်ႉၶၢဝ်းၾူၼ်ၼႆ ၼမ်ႉၵႆႉၼွင်းထူမ်ႈ မႃးၵူႈပီ ၼႆယဝ်ႉ။
