ပလိၵ်ႈဝဵင်းယူႇတီႇၵႃႇ ဝဵင်းလူင်ၼိဝ်ႊယွၵ်ႉ မိူင်းဢမေႊရိၵၼ်ႊ ယိုဝ်းလုၵ်ႈႁဵၼ်း ၸၼ်ႉ 8 ပဵၼ် ၸၢဝ်းယၢင်း ၵူၼ်းမိူင်းမၢၼ်ႈ။

ဝၼ်းတီႈ  28/06/2024 ယၢမ်းၵၢင်ၶမ်ႈ လုၵ်ႈႁဵၼ်း ၸၼ်ႉ 8 ဢၼ်ယူႇတီႈႁူင်းႁဵၼ်း တူဝ်ႊၼူဝ်ႊဝႅၼ်ႊ ဢၼ်မီးၼႂ်းဝဵင်းယူႇတီႇၵႃႇၼၼ်ႉ ၺႃးပလိၵ်ႈပႂ်ႉတၢင်း ႁႄႉသေၵူတ်ႇထတ်း ထဵတ်ႈထၢမ်မၼ်းၸၢႆး ၸွမ်းတၢင်း။ ၽိူဝ်ႇလႆႈငိၼ်းသဵင် ထဵင်မေႃးၵၼ်ယဝ်ႉ ၵူၼ်းယူႇႁိမ်းၼၼ်ႉ ထၢႆႇၶလိပ်ႉဝီႊတီႊဢူဝ်ႊဝႆႉ။ လႆႈႁၼ်ၼႂ်းၶလိပ်ႉၼၼ်ႉ ပလိၵ်ႈလၢႆၵေႃႉ ထုပ်ႉမၼ်းၸၢႆး တႃႇၵေႃႉၼိုင်ႈ ဢဝ်ၵွင်ႈၸမ်ႈသေ ယိုဝ်းမၼ်း ၸၢႆးတၢႆ။ ဝၢႆးၼၼ်ႉ ဢဝ်ၵွင်ႈသႂ်ႇပၼ်ၼႂ်းမိုဝ်းမၼ်း။ တီႈလုမ်းတြႃး ပလိၵ်ႈဝႃႈ – မၼ်းၸၢႆး ယိပ်းၵွင်ႈမႃး ယႃႉ ၵၢၼ်ၸဝ်ႈၼႃႈတီႈ ဝႃႈၼႆဝႆႉ။

ၵႅမ်ႁူဝ်ပဝ်ႈ ၸုမ်းတူင်ႇဝူင်းၵူၼ်းယၢင်း ဢၼ်ယူႇသဝ်းတီႈ ဝဵင်းယူႇတီႇၵႃႇ ၸေႃးတႄႇၼီႇယႄလ် လၢတ်ႈ တီႈသိုဝ်ႇၶၢဝ်ႇမၢၼ်ႈ VOA ဝႃႈ –  ၶႂ်ႈလႆႈလွင်ႈၽဵင်ႇပဵင်း ပဵၼ်ထမ်း လွင်ႈၼႆႉ – ဝႃႈၼႆ။

လုၵ်ႈႁဵၼ်း ဢၼ်ၺႃးယိုဝ်းတၢႆၼႆႉ ၸိုဝ်ႈႁွင်ႉ မွင်ႇၺႃႉမူၺ်း ဢႃယု 13 ပီ။ ပေႃႈမႄႈ ပဵၼ်ၸၢဝ်းယၢင်းမိူင်းမၢၼ်ႈ။ မၼ်းၸၢႆးတႄႉ ၵိူတ်ႇတီႈၼႂ်းပၢင်သဝ်း ၵူၼ်းပၢႆႈၽေးယၢင်း ဢၼ်မီးတီႈလႅၼ်လိၼ်ထႆး – မၢၼ်ႈ။ ႁွတ်ႈထိုင်မိူင်းဢမေႊရိၵၼ်ႊ လႆႈၶၢဝ်းတၢင်း 7-8 ပီယဝ်ႉ။ 

ယၢမ်းလဵဝ်တႄႉ ၸုမ်းတူင်ႉၼိုင်တႃႇသုၼ်ႇလႆႈၵူၼ်းယၢင်း ၼႂ်းမိူင်းဢမေႊရိၵၼ်ႊ တူင်ႉၼိုင်တႃႇလႆႈ လွင်ႈၽဵင်ႇပဵင်း ၼႆဝႆႉ။ တူဝ်တၢႆမၼ်းၸၢႆးတႄႉ တေၽဝ်ၼႂ်းဝၼ်းတီႈ 6 ၵျူႊလၢႆႊၼႆႉ ဝႃႈၼႆ။