မိူဝ်ႈၼႆႉ ဝၼ်းတီႈ 03/07/2024 ယၢမ်းၵၢင်ၼႂ်မွၵ်ႈ 7 မူင်း မၢၵ်ႇလူင် သိုၵ်းမၢၼ်ႈ ယိုတ်းမိူင်းတူၵ်းသႂ်ႇ ႁိူၼ်း ယေး ၵူၼ်းမိူင်းလင်ၼိုင်ႈ တီႈပွၵ်ႉ 1 သဵၼ်ႈတၢင်းပိဝ်ႇႁႃႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႅၵ်ႇသႂ်ႇၵူၼ်း ႁိူၼ်းလဵဝ်ၵၼ် လူႉတၢႆထင်တီႈ 6 ၵေႃႉ ဝႃႈၼႆ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းၵဝ်ႈၵၢင်ႉသမ်ႉ ပွႆႇတရူၼ်းၶဝ်ႈဝဵင်းမႃး သိုၵ်းမၢၼ်ႈ ယိုဝ်းမၢၵ်ႇလူင်သႂ်ႇတရူၼ်းၼၼ်ႉ ဢမ်ႇတိူဝ်ႉသေ တူၵ်းသႂ်ႇႁိူၼ်းၵူၼ်းဝၢၼ်ႈ လင်ၼိုင်ႈ တီႈပွၵ်ႉ 1 မိူဝ်ႈၽွင်းၵူၼ်းႁိူၼ်း ၼၼ်ႉ တိုၵ်ႉႁၢင်ႈႁႅၼ်းတေၵိၼ်ၶဝ်ႈၼႂ်ၼၼ်ႉ တႅၵ်ႇတိူဝ်ႉသႂ်ႇလူႉတၢႆ 6 ၵေႃႉ ပေႃႈမႄႈလုၵ်ႈ။ ၼႂ်းၼၼ်ႉ ယိင်း 4 ၵေႃႉ ၸၢႆး 2 ၵေႃႉ”- ဝႃႈၼႆ။
လိူဝ်ၼၼ်ႉ မိူဝ်ႈၼႆႉ ယၢမ်းၵၢင်ၼႂ်မွၵ်ႈ 5 မူင်း ၼၼ်ႉၵေႃႈ မၢၵ်ႇၶိူင်ႈမိၼ်တရူၼ်း တူၵ်းသႂ်ႇၵူၼ်းၼႂ်းဢိူင်ႇ ၼမ်ႉပွင်ႈ သွင်ၽူဝ်မေး လူႉတၢႆ 1 ၵေႃႉ မၢတ်ႇၸဵပ်း 1 ၵေႃႉ ဝႃႈၼႆ။
“ၸႂ်ႈၶႃႈဢေႃႈ တီႈႁိမ်းၵၢတ်ႇၼမ်ႉပွင်ႈၼႆႉ မၢၵ်ႇၶိူင်ႈမိၼ်တရူၼ်း မႃးတူၵ်းသႂ်ႇ ႁိူၼ်းယေး ၵူၼ်းဝၢၼ်ႈလင်ၼိုင်ႈ တိူဝ်ႉသႂ်ႇသွင်ၽူဝ်မေး မိူဝ်ႈၵႆႈ ၼႃႈမိူင်းလႅင်း မွၵ်ႈ 5 မူင်းၼႆႉ။ တႅၵ်ႇတိူဝ်ႉသႂ်ႇ ၵေႃႉပဵၼ်မေးၼၢင်း လူႉတၢႆထင်တီႈ၊ ၵေႃႉပဵၼ် ၸဝ်ႈၽူဝ်တႄႉ လႆႈတိူဝ်ႉမၢတ်ႇၸဵပ်းႁႅင်းဢေႃႈ။ တီႈၼမ်ႉပွင်ႈၼႆႉ သဵင်ၵွင်ႈတႅၵ်ႇပၼ်းႁႅင်းဢေႃႈ တိုၵ်ႉႁႃယဵၼ်ၵႂႃႇ ၵူၺ်း”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
မိူဝ်ႈၶမ်ႈဝႃး ဝၼ်းတီႈ 2 ယၢမ်းၵၢင်ၶိုၼ်းလိုၵ်း 10 မူင်းပၢႆ သိုၵ်းမၢၼ်ႈ လုၵ်ႉၼႂ်းဝဵင်းသေ ယိုဝ်းၵွင်ႈလူင် ၵႂႃႇတၢင်းၾၢႆႇတူၵ်းဝဵင်းလႃႈသဵဝ်ႈ ႁၢဝ်ႈႁႅင်း။ ထိုင်မႃး မိူဝ်ႈၼႆႉ ၵၢင်ၼႂ် ၶိုၼ်းယိုဝ်းၵႂႃႇတၢင်းဢီႇၼၢႆး၊ တၢင်းဢွၵ်ႇၵႂႃႇသႅၼ်ဝီ၊ တၢင်းထုင်ႉမိူင်းယေႃ ၊ တၢင်းၼွင်မွၼ်၊ ၼမ်ႉပွင်ႈလႄႈ မိူင်းတဵမ် ၸိူဝ်းၼႆႉ ႁၢဝ်ႈႁႅင်း။
“ပၢင်တိုၵ်း တီႈဝဵင်းလႃႈသဵဝ်ႈၼႆႉ ၶႂ်ႈဝႃႈပၼ်းၵူႈတီႈယဝ်ႉ မၢၵ်ႇတရူၼ်းတူၵ်းသႂ်ႇ ၼႂ်းဝဵင်းၶႂ်ႈဝႃႈ ၵူႈတီႈယဝ်ႉ မိူဝ်ႈၵႆႈ တူၵ်းတီႈၼႂ်းဝၢင်းပေႃႉၵွၵ်ႉ လႃႈသဵဝ်ႈၶႃႈဢေႃႈ။ ပူၼ်ႉမႃးမွၵ်ႈ 4 ဝၼ်းၼႆႉ သိုၵ်းၵဝ်ႈၵၢင်ႉ လုၵ်ႉတၢင်းသႅၼ်ဝီ ထႅမ်ႁႅင်းသိုၵ်း၊ မၢၵ်ႇမိုဝ်ႉၸိုၼ်းယၢမ်း မႃးတင်းၼွင်မွၼ်၊ ဢီႇၼၢႆး ၸိူဝ်းၼႆႉ တင်းၼမ်ၶႃႈ”- ၵူၼ်းၼုမ်ႇ လႃႈသဵဝ်ႈ လၢတ်ႈတီႈ ၽူႈတွႆႇႁွၵ်ႈၼင်ႇၼႆ။
ၵဵဝ်ႇလူၺ်ႈ လွင်ႈပၢင်တိုၵ်း တီႈဝဵင်းလႃႈသဵဝ်ႈၼႆႉသေ လွင်ႈမၢၵ်ႇလူင်၊ မၢၵ်ႇၶိူင်ႈမိၼ်တရူၼ်း တူၵ်းသႂ်ႇႁိူၼ်းယေး ၵူၼ်းမိူင်းလူႉၵွႆ လၢႆလင်တႄႉ ပႆႇႁူႉ။ ၵူၺ်းၵႃႈ ၵူၼ်းမိူင်းတႄႉ ဢွၼ်ၵၼ်မႆႈၸႂ် ၵူဝ်ပဵၼ်ပၢင်တိုၵ်း ႁၢဝ်ႈႁႅင်းထႅင်ႈ မိူၼ်မိူဝ်ႈႁၢင်လိူၼ်ဢွၵ်ႊထိူဝ်ႊပိူဝ်ႊ 2023 ၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ