ၶၢဝ်းတၢင်းပၢင်တိုၵ်း သိုၵ်းမၢၼ်ႈတင်း သိုၵ်း TNLA တီႈဝဵင်းၵျွၵ်ႉမႄးၼႆႉ ႁဵတ်းႁႂ်ႈၵူၼ်းမိူင်း ၺႃးၸၢၵ်ႇမၢၵ်ႇလူႉတၢႆၸွမ်းမွၵ်ႈ 60 ၵေႃႉ ႁိူၼ်းယေးလူႉၵွႆ ဢမ်ႇယွမ်း 30 လင်။
တႄႇဢဝ် ဝၼ်းတီႈ 25/06/2024 ၼၼ်ႉမႃး တေႃႇထိုင် ဝၼ်းတီႈ 02/07/2024 ၼႆႉ ၵူၼ်းမိူင်း ၺႃးၸၢၵ်ႇမၢၵ်ႇၵွင်ႈလူင်၊ မၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇ လူႉတၢႆၸွမ်းၼႂ်းၵႄႈပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA တီႈၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ မွၵ်ႈ 60 ၵေႃႉ မၢတ်ႇၸဵပ်းၸွမ်း ထႅင်ႈၼမ်။
ၽူႈၸွႆႈထႅမ် ၸုမ်းတူင်ႇဝူင်းၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸူဝ်ႈပၢင်တိုၵ်း ၶၢဝ်းတၢင်း 6-7 ဝၼ်းမႃးၼႆႉ မၢၵ်ႇလူင်တူၵ်းသႂ်ႇ ၵူၼ်းမိူင်းလူႉတၢႆ မွၵ်ႈ 60 ၵေႃႉယဝ်ႉ။ ၵမ်ႈၼမ် ၵူၼ်းမိူင်းဢၼ်ပၢႆႈၽေး ၵႂႃႇသေ ပွၵ်ႈမႃးၸႂ်းႁိူၼ်း၊ ယဝ်ႉၵေႃႈ ၵူၼ်းပႂ်ႉႁိူၼ်းယေး ၸိူဝ်းၼႆႉၶႃႈဢေႃႈ။ မၢင်ၸိူဝ်း လူႉတၢႆ မႅင်းမူၼ်း ပေႃးတွမ်ယဝ်ႉၶႃႈ”- ဝႃႈၼႆ။
![ႁူင်းႁႅမ်း One Love တီႈၵျွၵ်ႉမႄး](https://shannews.org/wp-content/uploads/2024/07/449445966_2670166669824823_3951013967541211025_n-1024x768.jpg)
မိူဝ်ႈဝႃး ဝၼ်းတီႈ 01/07/2024 မၢၵ်ႇလူင်တူၵ်းသႂ်ႇ ၵူၼ်းမိူင်းၵျွၵ်ႉမႄး လူႉတၢႆထႅင်ႈ 4 ၵေႃႉ ၼႂ်းၼၼ်ႉ ၸၢႆး 2 ၵေႃႉလႄႈ ယိင်း 2 ၵေႃႉ ပဵၼ်ၵူၼ်းပွၵ်ႉ 8 သၢမ်ၵေႃႉလႄႈ ပွၵ်ႉ 1 ၵေႃႉၼိုင်ႈ ဝႃႈၼႆ။
“ႁိူၼ်းယေး ၵူၼ်းဝၢၼ်ႈ ဢၼ်လႆႈလူႉသုမ်း ယွၼ်ႉပၢင်တိုၵ်းၼႆႉသမ်ႉ ပေႃးၼပ်ႉတူၺ်းၸိုင် ဢမ်ႇယွမ်း 30 လင်ယဝ်ႉ။ ၵမ်ႈၼမ် ပဵၼ်တီႈပွၵ်ႉ 8 ယွၼ်ႉမၢၵ်ႇလူင်လႄႈ မၢၵ်ႇၶိူင်ႈမိၼ် တူၵ်းသႂ်ႇၶႃႈဢေႃႈ”- ၽူႈၸွႆႈထႅမ် ၸုမ်းတူင်ႇဝူင်း ၵူၼ်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် တီႈၼိူဝ်ဝဵင်းၵျွၵ်ႉမႄးၼႆႉ ၵူၼ်းမိူင်းယဵၼ်သီႇမူတ်း ၵမ်ႈၼမ် ဢွၼ်ၵၼ်ငိူင်ႉပၢႆႈဢွၵ်ႇဝဵင်း ၵႂႃႇသွၼ်ႈဝႆႉ ၸွမ်းဝတ်ႉဝႃးၽႃသိူဝ်ႇ ၸွမ်းမူႇဝၢၼ်ႈဝႆႉ ႁူဝ်ၵူၼ်း ဢမ်ႇယွမ်း 12,000 ။ ယၢမ်းလဵဝ် လူဝ်ႇတၢင်းၸွႆႈထႅမ်ႁႅင်း ၶဝ်ႈၼမ်ႉတၢင်းၵိၼ်၊ ယႃႈယႃ၊ ၶူဝ်းၸႂ်ႉတိုဝ်းၼၢင်းယိင်းလႄႈ ၽႃႈႁူမ်ႇၶူဝ်းၼွၼ်း/ ၶူဝ်းၼုင်ႈဝႂ် ၸိူဝ်းၼႆႉ။ ၵူၼ်းပၢႆႈၽေးသိုၵ်း ၵမ်ႈ ၼမ်သမ်ႉ ပဵၼ်ၵူၼ်းထဝ်ႈ၊ လုၵ်ႈဢွၼ်ႇလႄႈ ၼၢင်းယိင်း ၼႆယဝ်ႉ။