မၢၵ်ႇလူင် တူၵ်းသႂ်ႇ ၵူၼ်းမိူင်းသီႇပေႃႉ လႆႈတိူဝ်ႉမၢတ်ႇၸဵပ်း 5 ၵေႃႉ ၼႂ်းၼၼ်ႉ တႃႇ 2 ၵေႃႉ လႆႈမၢတ်ႇၸဵပ်းႁႅင်း။
ဝၼ်းတီႈ 01/07/2024 ယၢမ်းႁူဝ်ၶမ်ႈမွၵ်ႈ 6 မူင်း မၢၵ်ႇလူင်တူၵ်းသႂ်ႇ တီႈၼႂ်းပွၵ်ႉၸၢမ်ၽိူၵ်ႇ ဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းမၢတ်ႇၸဵပ်း 5 ၵေႃႉ ၼႂ်းၼၼ်ႉ ၸၢႆး 2 ၵေႃႉလႄႈ ယိင်း 3 ၵေႃႉ ဝႃႈၼႆ။
ၵူၼ်းမိူင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၼႆႉ လုၵ်ႉတၢင်းၼမ်ႉတူၵ်းၽႃၽိူၵ်ႇၼၼ်ႉသေ ယိုဝ်းမႃးတူၵ်းၸွမ်းတၢင်း ၸွမ်းၼႂ်းဝၢင်းႁၢၼ်ႉ KTV (သူၺ်ႇၺွင်ႇလၼ်း) ၼၼ်ႉသေ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈမၢတ်ႇၸဵပ်း 5 ၵေႃႉ။ ၼႂ်းၼၼ်ႉ တႃႇၽူႈယိင်း 2 ၵေႃႉ လႆႈတိူဝ်ႉမၢတ်ႇၸဵပ်းႁႅင်းၶႃႈ။ ၸၢၵ်ႇမၢၵ်ႇတိူဝ်ႉ သႂ်ႇၵူၼ်းဝၢၼ်ႈၸွမ်းၶႃ ၊ ၸွမ်းမိုဝ်း ၊ ၸွမ်းဢႅဝ် ၊ ၸွမ်းတူဝ် ၸိူဝ်းၼႆႉ”- ဝႃႈၼႆ။
ဢိင်ၼိူဝ် လွင်ႈၼႆႉသေ ယူႇတီႈ ၸုမ်းၸွႆႈထႅမ်ပရႁိတ ဝဵင်းသီႇပေႃႉ လႆႈမႃးတေႃႉဢဝ် ၵႂႃႇယူတ်းယႃ ဝႆႉတီႈလွတ်ႈ ၽေးယဝ်ႉ တႃႇ 2 ၵေႃႉ ဢၼ်လႆႈမၢတ်ႇၸဵပ်းႁႅင်းၼၼ်ႉတႄႉ လႆႈသိုပ်ႇသူင်ႇယူတ်းယႃ တီႈဝဵင်းလႃႈသဵဝ်ႈ ဝႃႈၼႆ။
တႄႇဢဝ် ဝၼ်းတီႈ 25/06/2024 ၼၼ်ႉမႃး တေႃႇထိုင်ယၢမ်းလဵဝ် တီႈဝဵင်းသီႇပေႃႉၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်သေ သွင်ၾၢႆႇမီးလွင်ႈပွႆႇမၢၵ်ႇလူင် ၸူးၵၼ်ၵူႈဝၼ်း ဝႃႈၼႆ။
မိူဝ်ႈဝၼ်းတီႈ 29/06/2024 ယၢမ်းၵၢင်ဝၼ်း 12 မူင်း မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈၸၢမ်ႇလႅင် လူႉၵွႆလင် ၼိုင်ႈ ဝႃႈၼႆ။
ဝၼ်းတီႈ 28/06/2024 ယၢမ်းၵၢင်ဝၼ်း ၸၢၵ်ႇမၢၵ်ႇတိူဝ်ႉၺႃး ၸၢႆးၼေႃႇၶမ်းႁၢၼ် ဢႃယု 12 ၶူပ်ႇ တီႈၼႂ်းထဵင် သူၼ်ၶဝ်ႈၵၢပ်ႇ (ၶဝ်ႈၶႄႇ) ႁိမ်းဝၢၼ်ႈၵုင်းသႃႇ လႆႈတိူဝ်ႉမၢတ်ႇၸဵပ်းႁႅင်း ထိုင်တီႈသူင်ႇယူတ်း ယႃလႃႈသဵဝ်ႈ။ ယဝ်ႉၵေႃႈ မိူဝ်ႈဝၼ်းတီႈ 26 ၼၼ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၸဝ်ႈၸၢင်းတူၼ်ၼိုင်ႈ တီႈဝတ်ႉၼၵႃးတွင်ႇ ဝဵင်းသီႇပေႃႉ ၼၼ်ႉၵေႃႈ တိူဝ်ႉၺႃး တီႈမိုဝ်းမၼ်းၸဝ်ႈ လႆႈမၢတ်ႇၸဵပ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ