ပလိၵ်ႈထႆး တီႉၺွပ်းၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်း တင်းဢွၼ်ႊလၢႆႊ 13 ၵေႃႉ ဢၼ်မီးၼႂ်း ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႂ်ႇ ၸိုင်ႈထႆး ၼႂ်းၼၼ်ႉ ပႃးတင်းၵူၼ်းမိူင်းမၢၼ်ႈလႄႈ ၵူၼ်းမိူင်းၶႄႇ ယိုတ်းလႆႈပႃး ၶွမ်ႊပိဝ်ႊတိူဝ်ႊ 9 လုၵ်ႈ မၢႆၾူၼ်းသိမ်ႊၵတ်ႉ 90 ဢၼ်လႄႈ မိုဝ်းထိုဝ် 94 လုၵ်ႈ။ 

ၽူႈၵွၼ်းပလိၵ်ႈ ၽၢၵ်ႈ 5 ပၼ်ႊၶျႃႊ လၢတ်ႈဝႃႈ ၸိူဝ်းၶဝ် 13 ၵေႃႉ ႁဵတ်းၵၢၼ် Call Center ၊ ၵမ်ႈ ၼမ် ႁဵတ်းၵၢၼ်လွၵ်ႇလႅၼ်ၵိၼ်ငိုၼ်း ၵူၼ်းၼႂ်းမိူင်းၶႄႇၶိုၼ်း။ ႁူၺ်းသူၼ်းဝႃႈ – တႃႇႁွမ်ငိုၼ်းၶၢဝ်း ယၢဝ်းၼႆသေ ႁႂ်ႈသႂ်ႇငိုၼ်းပၼ်ၵူႈလိူၼ် လွၵ်ႇလႅၼ်ၵိၼ်ငိုၼ်းလၢႆ – ဝႃႈၼႆ။

ၼႂ်းပီၼႆႉ ၵူတ်ႇထတ်းတီႉၺွပ်း လွင်ႈလွၵ်ႇလႅၼ်ၵိၼ်ငိုၼ်းလႄႈ လွင်ႈတေႃႉၶူဝ်းၽိတ်းမၢႆမီႈ ၸွမ်း လႅၼ်လိၼ်ထႆးမႃး ႁၢဝ်ႈႁႅင်း။ မိူဝ်ႈဝၼ်းတီႈ 28 လိူၼ်ၵျုၼ်ႊၼႆႉ ပ လိၵ်ႈထႆးတီႉလႆႈ သၢႆၵေႊပိူဝ်ႊ ဢိၼ်ႊတႃႊၼႅတ်ႉ တင်းၼမ်တင်းလၢႆ တီႈလႅၼ်လိၼ်ထႆး။ တေဢဝ် ၶူဝ်းဢမ်ႇသႂ်ႇၶွၼ်ႇ ၸိူဝ်းၼႆႉ လုၵ်ႉမႄႈသွတ်ႇ ဢၢၼ်းဢဝ်ၵႂႃႇတီႈသူၺ်ႇၵူၵ်ႉၵူဝ်ႇ မျႃႉဝတီႇ တေလၵ်ႉဢဝ်ၵႂႃႇသဵၼ်ႈတၢင်းထိူၼ်ႇ ပလိၵ်ႈထႆးလၢတ်ႈ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။