သိုၵ်းမၢၼ်ႈ ယိုဝ်းၵွင်ႈလူင် တီႈဝဵင်းလႃႈသဵဝ်ႈ ႁဵတ်းႁႂ်ႈၵူၼ်းမိူင်း တိုၼ်ႇသၢၼ်ႈ

သိုၵ်းမၢၼ်ႈ ယိုဝ်းၵွင်ႈလူင်ၾၢႆႇလဵဝ် တီႈဝဵင်းလႃႈသဵဝ်ႈ ၶိူဝ်းယႂ်း ႁဵတ်းႁႂ်ႈၵူၼ်းမိူင်းတူၵ်းၸႂ် တိုၼ်ႇသၢၼ်ႇ ထၢင်ႇဝႃႈ ပဵၼ်ပၢင်တိုၵ်း ဝႃႈၼႆ။

ဝၼ်းတီႈ 29/06/2024 ယၢမ်းၵၢင်ဝၼ်းမွၵ်ႈ 11 မူင်း သိုၵ်းမၢၼ်ႈ ယိုတ်းမိူင်း ယူႇတီႈၼႂ်းတပ်ႉၶဝ်သေ ယိုဝ်းၵွင်ႈလူင် ၵႂႃႇတၢင်းတူၵ်းဝဵင်းလႄႈ ၸဵင်ႇႁွင်ႇဝၼ်းဢွၵ်ႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁၢဝ်ႈႁႅင်း ယွၼ်ႉမီးၶၢဝ်ႇဢွၵ်ႇမႃးဝႃႈ သိုၵ်းၵဝ်ႈၵၢင်ႉ ဢိူမ်ႈၸမ်ၸူးဝဵင်းလႃႈသဵဝ်ႈၼမ် ဝႃႈၼႆ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶႃႈလႆႈငိၼ်းလီလီတႄႉ သိုၵ်းမၢၼ်ႈၶဝ် ယိုဝ်းမိူဝ်ႈဝႃး မၢၵ်ႇလူင်ဢမ်ႇယွမ်း 4 ၵမ်းၶႃႈ။ ယိုဝ်းၵႂႃႇတၢင်းၼႂ်းၵႄႈသႅၼ်ဝီ – လႃႈသဵဝ်ႈၼၼ်ႉၶႃႈဢေႃႈ။ ယဝ်ႉၵေႃႈ လႆႈငိၼ်းယိုဝ်းထႅင်ႈယူႇ ၵူၺ်းၵႃႈ ဢမ်ႇတွင်းလႆႈယဝ်ႉၶႃႈ။ ၵမ်ႈၼမ် ၶဝ်တေလုၵ်ႉတီႈ ၼႂ်းတပ်ႉၶဝ် ဢၼ်ပၵ်းဝႆႉ ႁိမ်းဝဵင်းၼႆႉ ယိုဝ်း ၵႂႃႇၶႃႈဢေႃႈ။ ၵူၼ်းမိူင်းတႄႉ မႆႈၸႂ်ဢေႃႈ ၵူဝ်ပဵၼ်ပၢင်တိုၵ်းထႅင်ႈ”- ဝႃႈၼႆ။

ဢိင်ၼိူဝ် လွင်ႈၼႆႉ ယွၼ်ႉမီးၶၢဝ်ႇဢွၵ်ႇမႃးဝႃႈ သိုၵ်းၵဝ်ႈၵၢင်ႉ လုၵ်ႉတၢင်းသႅၼ်ဝီ မုင်ႈၸူးတၢင်းဝဵင်းလႃႈသဵဝ်ႈ ႁႅင်း ၵူၼ်း ဢမ်ႇယွမ်း 400 ၵေႃႉ ၼႆသေ ၵွပ်ႈၼႆလႄႈ သိုၵ်းမၢၼ်ႈ ၸင်ႇယိုဝ်းၵွင်ႈလူင်ၸူး ဝႃႈၼႆ။

ၽူႈတူင်ႉၼိုင် သၢႆသိုၵ်း တၢင်းပွတ်းထုင်ႉလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 28 ၼႆႉ သိုၵ်းၵဝ်ႈၵၢင်ႉ ဢၼ်မီးဝႆႉတီႈဢီႇၼၢႆးၼၼ်ႉ ၶၢမ်ႈၼမ်ႉယၢဝ်သေ ၵႂႃႇတၢင်းဢွၵ်ႇဝၢႆႇၸူးဝဵင်းလႃႈသဵဝ်ႈ။ သိုၵ်းၵဝ်ႈၵၢင်ႉ ထႅင်ႈၸုမ်းၼိုင်ႈ ဢဵၼ်ႁႅင်း 405 ၵေႃႉ ဢၼ်လုၵ်ႉတၢင်းမိူင်းပႃးၼၼ်ႉသေ မႃးႁၢႆဝႆႉၵႄႈ ၵၢင်မိူင်းပႃးလႄႈဢီႇၼၢႆးၼၼ်ႉ ၼႂ်းဝၼ်းတီႈ 28 ၼႆႉ ၶိုၼ်းမႃးဢွၵ်ႇတၢင်းၼမ်ႉမဝ်ႈ၊ ဝၢၼ်ႈၵွင်းသေ မုင်ႈ ၼႃႈၸူးတင်းၼမ်ႉၼူမ်းလႄႈ မျူၵ်ႉသွင်ႇလၢၼ်း”- ဝႃႈၼႆ။

သိုပ်ႇလၢတ်ႈဝႃႈ – “ၼႂ်းဝၼ်းတီႈ 28 ၼႆႉၵူၺ်း သိုၵ်းၵဝ်ႈၵၢင်ႉ ဢၼ်ၵိုတ်းဝႆႉတီႈဢီႇၼၢႆးၼၼ်ႉ ၵမ်ႈၽွင်ႈ ၶဝ်ယွၼ်း ၵူၼ်းမိူင်းႁႂ်ႈၵႂႃႇၼႄၶဝ် လၢႆးႁုင်ၶဝ်ႈၽၵ်းတႃႇၵူၼ်းၼမ် ၼိုင်ႈတႃႇလႂ် ၶဝ်ႈၽၵ်းၸွၵ်းၼိုင်ႈႁဵင်ႁေႃႇ ၶၢဝ်းတၢင်းသၢမ်ဝၼ်း ဝၢႆးသေၼၼ်ႉ ၶဝ်တေႁုင်မိုဝ်ႉဢဝ်ႁင်းၵူၺ်း”- ဝႃႈၼႆ။

ၵဵဝ်ႇလူၺ်ႈ သိုၵ်းမၢၼ်ႈ ယိုတ်းမိူင်း တီႈဝဵင်းလႃႈသဵဝ်ႈ ဢၼ်ယိုဝ်းၵွင်ႈလူင် ၵႂႃႇတၢင်းတူၵ်းလႄႈ ၸဵင်ႇႁွင်ႇဝၼ်းဢွၵ်ႇ ဝဵင်းလႃႈသဵဝ်ႈ ႁၢဝ်ႈႁႅင်းၼၼ်ႉ ယွၼ်ႉမီးဝႆႉ ၸုမ်းဢူၺ်းလီ တူင်ႉၼိုင်ယူႇဝႆႉၼမ် ဝႃႈၼႆ။

မိူဝ်ႈဝၼ်းတီႈ 27 ၼႆႉ ယူႇတီႈ သိုၵ်းမၢၼ်ႈ ယိုတ်းမိူင်း ယႃႉပႅတ်ႈၶူဝ်တႆႇ သွင်တီႈ ၼႂ်းၵႄႈမၢၼ်ႈပွႆး – လႃႈသဵဝ်ႈ ပဵၼ်ၶူဝ်မၢၼ်ႈၸၢမ်လႄႈ ၶူဝ်လဵၵ်းရူတ်ႉၾႆး ဝႃႈၼႆ။

ယွၼ်ႉၽႅၼ်ၵၢၼ်ယၼ်ႇသိုၵ်း 1027 တွၼ်ႈသွင်ၼႆႉသေ တႄႇဢဝ်ဝၼ်းတီႈ 25 မႃးတေႃႇထိုင်ယၢမ်းလဵဝ် ၶၢဝ်းတၢင်း 5 ဝၼ်းၼႆႉ သိုၵ်းတဢၢင်း ႁႅၼ်းသိုၵ်းလေႃႇတပ်ႉသိုၵ်းမၢၼ်ႈ မႃးႁၢဝ်ႈႁႅင်း မိူၼ်ၼင်ႇ – ၸႄႈဝဵင်းၵျွၵ်ႉမႄး၊ ၼွင်ၶဵဝ်၊ မိူင်းၵုတ်ႈ၊ မိူင်းမိတ်ႈလႄႈ သီႇပေႃႉ ၸိူဝ်းၼႆႉ ယိုတ်းလႆႈတပ်ႉပၢင်သဝ်းလႄႈ ႁူင်းပလိၵ်ႈမၢၼ်ႈ မွၵ်ႈ 30 တီႈယဝ်ႉ ဝႃႈၼႆ။