ဢွၼ်ႇၸၢႆးဝဵင်းသီႇပေႃႉ ၵေႃႉၼိုင်ႈ ၺႃးၸၢၵ်ႇမၢၵ်ႇတိူဝ်ႉသႂ်ႇ မၢတ်ႇၸဵပ်းႁႅင်း

မိူဝ်ႈၼႆႉ ဝၼ်းတီႈ 28/06/2024 ယၢမ်းၵၢင်ဝၼ်း ၸၢၵ်ႇမၢၵ်ႇတိူဝ်ႉၺႃး ၸၢႆးၼေႃႇၶမ်းႁၢၼ် ဢႃယု 12 ၶူပ်ႇ တီႈၼႂ်းထဵင် သူၼ်ၶဝ်ႈၵၢပ်ႇ (ၶဝ်ႈၶႄႇ) ႁိမ်းဝၢၼ်ႈၵုင်းသႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ လႆႈတိူဝ်ႉမၢတ်ႇၸဵပ်းႁႅင်း ထိုင်တီႈသူင်ႇယူတ်းယႃလႃႈသဵဝ်ႈ ဝႃႈၼႆ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ မၢၵ်ႇလူင်မႃးတူၵ်းသႂ်ႇ တီႈၼႂ်းသူၼ်ၶဝ်ႈၵၢပ်ႇၶဝ်ၼၼ်ႉသေ ၸၢၵ်ႇမၢၵ်ႇတိူဝ်ႉသႂ်ႇမၼ်းၸၢႆး တီႈၼႃႈဢူၵ်း လႄႈ တိၼ်မၼ်းၸၢႆး လႆႈတိူဝ်ႉမၢတ်ႇၸဵပ်းႁႅင်းသေ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃ လူင်လႃႈသဵဝ်ႈယဝ်ႉ”- ဝႃႈၼႆ။

ၸၢၵ်ႇမၢၵ်ႇ ဢၼ်မႃးတိူဝ်ႉသႂ်ႇ ၸၢႆးၼေႃႇၶမ်းႁၢၼ်ၼႆႉ ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉ။ ၸၢႆးၼေႃႇၶမ်းႁၢၼ် ၼႆႉ ပဵၼ်ဝၢၼ်ႈၵုင်းသႃႇ ယဝ်ႉၵေႃႈ ပဵၼ်လုၵ်ႈႁဵၼ်းၸၼ်ႉ 5 ဝႃႈၼႆ။

ပူၼ်ႉမႃး သွင်ဝၼ်းၼႆႉ ၸၢၵ်ႇမၢၵ်ႇ တိူဝ်ႉသႂ်ႇ ၸဝ်ႈၸၢင်း တူၼ်ၼိုင်ႈ တီႈဝတ်ႉၼၵႃးတွင်ႇ ဝဵင်းသီႇပေႃႉ ၼၼ်ႉၵေႃႈ တိူဝ်ႉၺႃး တီႈမိုဝ်းမၼ်းၸဝ်ႈ လႆႈမၢတ်ႇၸဵပ်း ဝႃႈၼႆ။

တႄႇဢဝ် ဝၼ်းတီႈ 25 ၼႆႉမႃး သိုၵ်းတဢၢင်း TNLA တင်း PDF ႁူမ်ႈၵၼ်သေ လေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်း တီႈဝဵင်းသီႇပေႃႉမႃး ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ် ဝႃႈၼႆ။

“မိူဝ်ႈဝႃး ဝၼ်းတီႈ 27 ၼႆႉ ၵူၼ်းမိူင်းဢွၼ်ၵၼ်ၶီႇႁိူဝ်းၼႂ်းၼမ်ႉတူႈသေ ပၢႆႈဢွၵ်ႇဝဵင်းၼမ်ဢေႃႈ။ ယၢမ်း ၵၢင်ဝၼ်းသမ်ႉ သိုၵ်းမၢၼ်ႈ ဢွၵ်ႇပိူင်မႃႇသျႄႇလေႃး ႁၢမ်ႈၵူၼ်းမိူင်းဢွၵ်ႇႁိူၼ်းယေး သင်ႁၼ်မႅၼ်ႈၸိုင် တေယိုဝ်းၼႆၶႃႈဢေႃႈ။ မိူဝ်ႈၼႆႉ သိုၵ်းမၢၼ်ႈၶဝ် ပိၵ်ႉပႅတ်ႈတၢင်းၶဝ်ႈဢွၵ်ႇဝဵင်းသီႇပေႃႉ မူတ်းယဝ်ႉၶႃႈ။ မိူဝ်းၽွင်း ပဵၼ်ပၢင်တိုၵ်းၼႆႉ ၵူၼ်းမိူင်းၶၢတ်ႈႁိူဝ်းပၢႆႈ ၼိုင်ႈလမ်းလႆႈပၼ် 5 သႅၼ်ပျႃးဢေႃႈ”- ဝႃႈၼႆ။

ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်း TNLA, PDF ၼႆႉသေ ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်း သီႇပေႃႉ လႆႈပၢႆႈၽေးသိုၵ်း ၵႂႃႇသွၼ်ႈဝႆႉ တီႈဝတ်ႉသီႇသုင်ႇ 74 ၵေႃႉ၊ ဝတ်ႉၼွင်ဢၢင်ႇ 99 ၵေႃႉ၊ ဝတ်ႉလူင်ယူမ်း မွၵ်ႈ 30 ၵေႃႉ၊ ဝတ်ႉၼွၵ်ႈၵၢတ်ႇ 292 ၵေႃႉလႄႈ ဝတ်ႉၼွင်ဢိုင်ႇ 40 ပၢႆ ၸိူဝ်းၼႆႉ။ ၵမ်ႈၼမ် ပဵၼ် ၵူၼ်းဝၢၼ်ႈသူပ်းလင်း၊ ၶူဝ်လူင်၊ ပၢင်သဝ်ႈလႄႈ ဝၢၼ်ႈၵုင်းသႃႇ ၵမ်ႈၽွင်း ယွၼ်ႉမၢၵ်ႇလူင် တူၵ်းႁႅင်း ဝႃႈ ၼႆ။

“တင်ႈတႄႇ ၶဝ်ပဵၼ်ပၢင်တိုၵ်းၵၼ်မႃး ၼႂ်းၶၢဝ်းတၢင်း 2-3 ဝၼ်းၼႆႉ တီႈဝဵင်းသီႇပေႃႉႁဝ်းၶႃႈၼႆႉ ယဵၼ်သီႇမူတ်း ၵၢတ်ႇလူင်၊ ႁၢၼ်ႉၶၢႆၶူဝ်း၊ ႁူင်းႁဵၼ်း ၸိူဝ်းၼႆႉ ပိၵ်ႉဢိုတ်းမူတ်းၶႃႈ။ ၵူၼ်းမိူင်းတႄႉ တုၵ်ႉၶႁႅင်းဢေႃႈ ၶႆႇၵႆႇ တေႃႈလဵဝ် ၼိုင်ႈလုၵ်ႈ 500 ပျႃးယဝ်ႉ။ ၵူႈပွၵ်ႈ ၼိုင်ႈလုၵ်ႈ 250 ပျႃးၵူၺ်း”- ၵူၼ်းမိူင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ တုမ်ႉတိူဝ်ႉပႃးထႅင်ႈ တိူၵ်ႈသွၼ်လိၵ်ႈသင်ၶၸဝ်ႈ ၸိူဝ်းၼႆႉ ယူႇတီႈ ၸဝ်ႈတူၼ်ၶူးလူင် ၽူႈၵွၼ်းဝတ်ႉၶဝ် လႆႈသူင်ႇ ၸဝ်ႈသၢင်ႇပွၵ်ႈၶိုၼ်းႁိူၼ်းယေးၽႂ်မၼ်း ယွၼ်ႉဢမ်ႇၸၢင်ႈဢွၵ်ႇတုင်းသွမ်း၊ ၾႆးၾႃႉဢမ်ႇမႃးလႆႈ 3-4 ဝၼ်းလႄႈ လိူဝ်ၼၼ်ႉ ဢမ်ႇမီးၼမ်ႉၵိၼ်ၼမ်ႉၸႂ်ႉ ၸိူဝ်းၼႆႉသေ ယၢပ်ႇၽိုတ်ႇႁႅင်း ၼႆယဝ်ႉ။