မိူဝ်ႈၼႆႉ ဝၼ်းတီႈ 28/06/2024 ယၢမ်းၵၢင်ၼႂ် မၢၵ်ႇၶိူင်ႈမိၼ် သိုၵ်းမၢၼ်ႈ ယိုတ်းမိူင်း တူၵ်းသႂ်ႇ ၵူၼ်းပွၵ်ႉ 8 လူႉတၢႆ 4 ၵေႃႉ ၊ ပွၵ်ႉ 2 လူႉတၢႆ 2 ၵေႃႉလႄႈ ပွၵ်ႉ 1 လူႉတၢႆ ၼိုင်ႈၵေႃႉ ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

ၽူႈၶဝ်ႈၸုမ်း ၸွႆႈထႅမ်ပရႁိတ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ -“ပဵၼ်မၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇ ဢေႃႈ။ တႄႇဢဝ်ၵၢင်ၼႂ်မႃး တေႃႇထိုင်ယၢမ်းလဵဝ်ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇၼႂ်း ဝဵင်းၼႆႉ ဢမ်ႇယွမ်း 40-50 လုၵ်ႈယဝ်ႉ။ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း လူႉတၢႆ 7 ၵေႃႉ။ ၼႂ်းၼၼ်ႉ တႃႇ 2 ၵေႃႉတႄႉ ယွၼ်ႉမီးတၢင်းပဵၼ်ဝႆႉ တေတူၵ်းၸႂ်သဵင်မၢၵ်ႇႁိုဝ် ဢမ်ႇႁူႉ လႆႈလူႉတၢႆၼႂ်းႁိူၼ်း ၸိူင်ႉၼၼ်ဢေႃႈ။ တႃႇ 5 ၵေႃႉတႄႉ ၺႃးၸၢၵ်ႇမၢၵ်ႇတိူဝ်ႉသႂ်ႇၵမ်းလဵဝ်ဢေႃႈ။ ၵူၼ်းမၢတ်ႇၸဵပ်းၵေႃႈ မီးဢေႃႈ ၼၼ်ႉတႄႉ ပႆႇႁူႉႁူဝ်ယွႆႈမၼ်းၶႃႈ”- ဝႃႈၼႆ။

မိူဝ်ႈဝႃး ဝၼ်းတီႈ 27/06/2024 တႄႇဢဝ်ယၢမ်းၵၢင်ၶမ်ႈ 7 မူင်းၶိုင်ႈမႃး သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇၼႂ်းဝဵင်းၵျွၵ်ႉမႄး ဢမ်ႇယွမ်း 25 လုၵ်ႈ။ ယဝ်ႉၵေႃႈ ႁိူၼ်းယေးၵူၼ်းမိူင်း ၺႃးၸၢၵ်ႇမၢၵ်ႇလူႉၵွႆ ၸွမ်းထႅင်ႈတင်းၼမ်။

တႄႇဢဝ် ဝၼ်းတီႈ 25-27/06/2024 ၼႆႉ ၵူၼ်းမိူင်းၵျွၵ်ႉမႄး ဢိၵ်ႇလူၺ်ႈ ၵူၼ်းသိုၵ်းမၢၼ်ႈတင်း သိုၵ်းတဢၢင်း TNLA လူႉတၢႆ 21 ၵေႃႉ ၊ မၢတ်ႇၸဵပ်းဢမ်ႇယွမ်း 15 ၵေႃႉ။ ယၢမ်းလဵဝ် သိုၵ်းတဢၢင်း တိုၵ်ႉႁႅၼ်း သိုၵ်းလေႃႇတိုၵ်း တပ်ႉသိုၵ်းမၢၼ်ႈ တီႈ 501 – 502 ဢၼ်မီးဝႆႉၼႂ်းၵႄႈၵျွၵ်ႉမႄး – မိူင်းငေႃႉၼၼ်ႉ ႁၢဝ်ႈႁႅင်း ဝႃႈၼႆ။

ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ ပွတ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “တီႈၵျွၵ်ႉမႄးၼႆႉ ၵိုတ်းထႅင်ႈ 2 တပ်ႉၵွင် 501 တင်း 502 ၼၼ်ႉၵူၺ်းယဝ်ႉ ဢၼ်သိုၵ်းလွႆၶဝ် ပႆႇသိမ်းလႆႈ တေႃႈလဵဝ် ၶဝ်လေႃႇ တိုၵ်းတီႈၼၼ်ႈယူႇ။ ၼႂ်း ၶၢဝ်းတၢင်း 2-3 ဝၼ်းၼႆႉ ၾၢႆႇသိုၵ်းလွႆ လူႉတၢႆမၢတ်ႇၸဵပ်းမွၵ်ႈ 200 ၵမ်ႈၼမ် ပဵၼ်ၼႂ်းၸႄႈဝဵင်းၵျွၵ်ႉမႄး၊ မိူင်းမိတ်ႈ၊ သီႇပေႃႉ ၸိူဝ်းၼႆႉ တၢင်းၼွင်ၶဵဝ်ၼၼ်ႉတႄႉ ပႆႇပႃး ယွၼ်ႉသိုၵ်း မၢၼ်ႈ ၸႂ်ႉတရူၼ်း၊ ၶိူင်ႈမိၼ် ၸိူဝ်းၼၼ်ႉ ပွႆႇမၢၵ်ႇ ၸွႆႈ။ တၢင်းၾၢႆႇသိုၵ်းမၢၼ်ႈၵေႃႈ လူႉတၢႆ မၢတ်ႇၸဵပ်း ၼပ်ႉႁူဝ်ပၢၵ်ႇမိူၼ်ၵၼ်”- ဝႃႈၼႆ။

တႄႇဢဝ် ဝၼ်းတီႈ 25 ၼႆႉမႃး သိုၵ်းတဢၢင်း TNLA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ ၸႄႈဝဵင်းၵျွၵ်ႉမႄး၊ ၼွင်ၶဵဝ်၊ မိူင်းၵုတ်ႈ၊ မိူင်းမိတ်လႄႈ သီႇပေႃႉ ၸိူဝ်းၼႆႉ။