ၽွင်းၶၢဝ်းၵူၼ်းမိူင်းထုၵ်ႇပိၵ်ႉႁူပိၵ်ႉတႃ ၊ ဢိၼ်ႊထိူဝ်ႊၼႅတ်ႉ ၊ ၾႆးၾႃႉ ၶၢတ်ႇၵူႈၾၢႆႇၾၢႆႇၼႆႉ သိုၵ်း မၢၼ်ႈ သင်ႇထႅင်ႈဝႃႈ ႁၢမ်ႈၵူၼ်းမိူင်းၸႂ်ႉတိုဝ်း VPN လႄႈ Google ၊ ပိူင်လူင်မၼ်း ၵူဝ်ၵူၼ်းမိူင်းၸႂ်ႉ တိုဝ်းၾဵတ်ႉပုၵ်ႉ၊ ယွၼ်ႉဝႃႈ တႃႇလူတ်ႊဢဝ်ၾဵတ်ႉပုၵ်ႉသမ်ႉ လႆႈၶဝ်ႈၼႂ်း Play Store ဢၼ်ၵွင်ႉၵၼ် တၢင်း Google လႄႈ ၸင်ႇဝႃႈ ၶဝ်ၶႂ်ႈပိၵ်ႉဢိုတ်းပႅတ်ႈတင်းသဵင်ႈ။
ၵူၺ်းၵႃႈ တႃႇပိၵ်ႉလႆႈတင်းပိုၵ်း ၼၼ်ႉဢမ်ႇငၢႆႈလႄႈ ၸင်ႇၸီႉသင်ႇႁႂ်ႈလုၵ်ႈသိုၵ်းပႃႈတႂ်ႈၶဝ် ၵူတ်ႇထတ်း ႁႄႉႁၢမ်ႈ ၵူၼ်းမိူင်း မႃးၶိူဝ်းယႂ်း မိူၼ်ၼင်ႇ တီႈၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ၼႆႉၵေႃႈ သိုၵ်းမၢၼ်ႈပႂ်ႉၵဵတ်ႉ တီႈတၢင်းၶဝ်ႈဢွၵ်ႇဝဵင်း ၵူတ်ႇထတ်းၾူၼ်းၵူၼ်းမိူင်းလႄႈ ႁဵတ်းႁႂ်ႈတူၵ်းၸႂ်သေ ဢမ်ႇထၢင်ႇႁၢင်ႈပႃးၾူၼ်းၵႂႃႇတႂ်ႈမိူဝ်းၼိူဝ် ဝႃႈၼႆ။
ဝၼ်းတီႈ 25/6/2024 ၼႆႉ ၵူၼ်းမိူင်းသၢတ်ႇ ၺႃးသိုၵ်းမၢၼ်ႈ ပႂ်ႉၵဵတ်ႉတၢင်းၶဝ်ႈဢွၵ်ႇဝဵင်း တဵၵ်းၵူတ်ႇထတ်းၾူၼ်းသေ ပၼ်ၾၢင်ႉဝႃႈ ဢမ်ႇႁႂ်ႈၸႂ်ႉ VPN ၼႆလႄႈ ႁဵတ်းႁႂ်ႈၵူၼ်းမိူင်းသုၵ်ႉၸႂ် ၵႂႃႇတၢင်းလႂ်ၵေႃႈ ပေႃးဢမ်ႇႁတ်းယိပ်းၾူၼ်းယဝ်ႉ ဝႃႈၼႆ။
ပေႃးပဵၼ်ၵူၼ်း ဢမ်ႇသူႈၵႂႃႇတၢင်းလႂ် ယူႇႁိူၼ်းၵူၺ်းတႄႉ ဢမ်ႇမီးပၼ်ႁႃသင်။ ၵူၺ်းၵႃႈ ပေႃးပဵၼ် ၵူၼ်းဢွၵ်ႇတႃႈပႆတၢင်းတႄႉ လႆႈမွတ်ႇ VPN လႆႈသႂ်ႇၶိုၼ်း ၸိူင်ႉၼႆလႄႈ ပဵၼ်ၵၢၼ်ယႂ်ႇ ၵၢၼ်သုၵ်ႉ ထႅင်ႈဢၼ်ၼိုင်ႈ။ မိူဝ်ႈလဵဝ်တႄႉ တီႈမိူင်းသၢတ်ႇၼႆႉ ဢမ်ႇပႆႇႁၼ်ၶဝ်ယွၼ်းငိုၼ်း ပၼ်တူတ်ႈတၢမ်ႇ။ တၢင်ႇတီႈ တၢင်ႇဝဵင်း ဝဵင်းယႂ်ႇဝဵင်းလူင်တႄႉ ပေႃးၵူတ်ႇထတ်း ထူပ်းႁၼ်မႅၼ်ႈၸိုင် လႆႈပၼ်ငိုၼ်းၼပ်ႉ ႁူဝ်မိုၼ်ႇပျႃးထိုင် ႁူဝ်သႅၼ်ပျႃး။ တီႈမိူင်းသၢတ်ႇၼႆႉ ၶဝ်ပႂ်ႉထတ်းတီႈၵဵတ်ႉၵႂႃႇမိူင်းတူၼ်လႄႈ တၢင်း ၵႂႃႇမိူင်းတုမ်းၼၼ်ႉၼႆ ၵူၼ်းမိူင်းသၢတ်ႇလၢတ်ႈၼႄဝႆႉၼင်ႇၼႆ –
“ၵူၼ်းဢွၵ်ႇတၢင်းၶဝ်လၢတ်ႈဝႃႈ ၶဝ်ၵူတ်ႇတူၺ်းၼႂ်းၾူၼ်း ဢမ်ႇႁႂ်ႈပၼ်ၸႂ်ႉ VPN ၼႆဢေႃႈ။ ၶဝ်ပႂ်ႉ ၵူတ်ႇတီႈၵဵတ်ႉၶဝ်ႈဢွၵ်ႇဝဵင်းၸိူဝ်းၼၼ်ႉဢေႃႈ။ ဢၼ်တီႉၺွပ်း မႂ်ငိုၼ်းတႄႉ ပႆႇႁဵတ်းၼင်ႇၵဝ်ႇ ၶဝ်လၢတ်ႈဝႃႈ ၸႂ်ႉပိၵ်ႉ VPN ၼႆၵူၺ်း ဢေႃႈ။ တၢင်းၵႂႃႇမိူင်းတူၼ်ၵေႃႈပႂ်ႉ တၢင်းၵႂႃႇမိူင်းတုမ်း ၵေႃႈပႂ်ႉဢေႃႈ ”- ဝႃႈၼႆ။
ဝၢႆးသိုၵ်းမၢၼ်ႈ ပိုၼ်ၽၢဝ်ႇ ႁၢမ်ႈၸႂ်ႉVPN မႃးၼႆႉ ယၢမ်းလဵဝ် ၼႂ်းၸိုင်ႈတႆးပွတ်းဢွၵ်ႇ လၢႆၸႄႈဝဵင်း မိူၼ်ၼင်ႇ တႃႈၶီႈလဵၵ်း၊ မိူင်းၽျၢၵ်ႈ၊ ၵဵင်းတုင် ၸဵမ်ၸိူဝ်းၼႆႉၵေႃႈ ပေႃးဢွၵ်ႇႁိူၼ်း ဢမ်ႇႁတ်းဢဝ်ၾူၼ်း ၵႂႃႇပႃး။ ယူႇႁိူၼ်းသေ ၸႂ်ႉ VPN ၸႂ်ႉဢိၼ်ႊတိူဝ်ႊၼႅတ်ႉၵေႃႈ လႅင်းဢမ်ႇႁႅင်းမိူၼ်မိူဝ်ႈၵူႈပွၵ်ႈလႄႈ ၸင်ႇဝႃႈ ၵၢၼ်ၵပ်းသိုပ်ႇၵပ်းသၢၼ်ၵၼ်ၵေႃႈ ယၢပ်ႇၽိုတ်ႇပႅတ်ႈမူတ်းယဝ်ႉ ဝႃႈၼႆ။
“ပဵၼ်ႁိုဝ်ၵေႃႈ မိူဝ်ႈလဵဝ် ၽႂ်ၵေႃႈဢွၼ်ၵၼ်ၼၵ်းၸႂ်ယူႇၼၼ်ႉယဝ်ႉ။ ပေႃးတေၵႂႃႇတၢင်းၼွၵ်ႈၵေႃႈ လူပ်းပႅတ်ႈထွၼ်ပႅတ်ႈ VPN ၼၼ်ႉ ၵမ်းၼိုင်ႈၼၼ်ႉၼႃႇၼေႃႈ။ ဢမ်ႇၼၼ်ၵေႃႈ ဢဝ်ၾူၼ်းဝႆႉတီႈ ႁိူၼ်းသေ ဢွၵ်ႇၵႂႃႇၸိူင်ႉၼႆၼၼ်ႉ ၼႃႇ။ ၵမ်ႉၼမ်တႄႉၵေႃႈ ၾူၼ်းၼႆႉ မၼ်းလူဝ်ႇၸႂ်ႉယူႇတႃႇသေႇ လူးၼေႃႈ ပေႃးဢွၵ်ႇၵႂႃႇၵေႃႈ လႆႈထွၼ်ဝႆႉ VPN သေ ပေႃးပွၵ်ႈမႃးၶိုၼ်းတီႈႁိူၼ်းၵေႃႈ ၶိုၼ်းလူတ်ႇသႂ်ႇ (Download) ၶိုၼ်းႁဵတ်းၼႆဢေႃႈ”- ၵူၼ်းမိူင်းသၢတ်ႇ သိုပ်ႇလၢတ်ႈၼႄၼင်ႇၼႆ။
ဢၼ်သိုၵ်းမၢၼ်ႈ ၵူတ်ႇထတ်းႁဵတ်းသုၵ်ႉယူႇ ယၢမ်းလဵဝ်ၼႆႉ ပိူင်လူင် တႃႇႁၢမ်ႈၵူၼ်းမိူင်းတူၺ်း ၾဵတ်ႉ ပုၵ်ႉ၊ ယွၼ်ႉပိူဝ်ႈ ၸုမ်းလုၵ်ႉၽိုၼ်ႉသိုၵ်းမၢၼ်ႈ ပိူင်လူင် လႆႈၸႂ်ယႂ်ႇၾဵတ်ႉပုၵ်ႉႁဵတ်းၵၢၼ် သိုၵ်းမၢၼ်ႈ ယၢမ်ႈလၢတ်ႈၼင်ႇၼႆ။ ၵူၺ်းၵႃႈ တႃႇပိၵ်ႈလႆႈ VPN ထႅင်ႈသမ်ႉ ၶဝ်လႆႈတင်ႈ great firewall တီႈငဝ်ႈ ဢိၼ်ႊထိူဝ်ႊၼႅတ်ႉၸိုင်ႈမိူင်း။ ၾၢႆႇၼိုင်ႈ VPN ၼႆႉသမ်ႉ မီးလၢႆသႅၼ်းလႄႈ တႃႇတေပိၵ်ႉႁၢမ်ႈ လႆႈတင်းမူတ်းတႄႉ တေဢမ်ႇငၢႆႈ။ ၸင်ႇဝႃႈ သိုၵ်းမၢၼ်ႈ သူင်ႇၵူၼ်းသိုၵ်းၶဝ် ပႂ်ႉၵူတ်ႇထတ်းၸွမ်းသဵၼ်ႈ တႃႈသၢႆတၢင်း ၸိူဝ်းၼႆႉ ၶႂ်ႈဝႃႈၵူႈဝဵင်းၼႆ ၽူႈႁဵတ်းၵၢၼ်ၾၢႆႇဢၢႆႊထီႊလၢတ်ႈ။
တႃႇတေပူတ်း/ ႁၢမ်ႈလႆႈ ၾဵတ်ႉပုၵ်ႉၼၼ်ႉသမ်ႉ တႄႇဢဝ်လိူၼ်ဢေႊပရိူဝ်ႊမႃး သိုၵ်းမၢၼ်ႈပိုၼ်ၽၢဝ်ႇ ႁႂ်ႈၵူၼ်းမိူင်းလူတ်ႇၸႂ်ႉ ဢႅပ်ႊပလီႊၵေႊသျိၼ် My Space Myanmar တႅၼ်း။ ၵူၺ်းၵႃႈ ၵူၼ်းမိူင်း ပႃးၸဵမ်ၵူၼ်းလုၵ်ႉၽိုၼ်ႉ ဢွၼ် ၵၼ်ဝႃႈ ၵူဝ်သိုၵ်းမၢၼ်ႈလႆႈၶေႃႈမုလ်းၸဝ်ႈၵဝ်ႇၼႆသေ ဢမ်ႇလူတ်ႇၸႂ်ႉသေဢမ်ႇၵႃး ယင်းပၢႆတဵၵ်း Report သၢၼ်ၶတ်းပႅတ်ႈလႄႈ ထိုင်တီႈဢႅပ်ႊပလီႊၵေႊသျိၼ်ႊ My Space Myanmar ပေႃးဢမ်ႇမီးၼႂ်း Play Store ။
ၽူႈလူင်ႉလႅၼ်ႇၾၢႆႇ IT ၶဝ်တႄႉ ဢွၼ်ၵၼ်ၼႄႉၼမ်းဝႃႈ – ၶၢဝ်းတၢင်းသိုၵ်းမၢၼ်ႈၶဝ် မႃးတင်ႈ great firewall ၼႆႉ တႃႇႁႂ်ႈမီးလွင်ႈႁူမ်ႇလူမ်ႈၼၼ်ႉ ယႃႇပေၸႂ်ႉဢႅပ်ႊပလီၶေႊသျိၼ်ႊ တၢင်ႇဢၼ်လႃးလႃး။ ၶတ်းၸႂ် ၸႂ်ႉဢႅပ်ႊ App မိူၼ်ၼင်ႇ Telegram , Signal ၶဝ်ၸိူဝ်းၼႆႉ တႃႇၵပ်းသိုပ်ႇၵပ်းသၢၼ်ၵၼ်။ မၼ်းတေမီးလွင်ႈႁူမ်ႇလူမ်ႈ လီလိူဝ်သေ တၢင်ႇသႅၼ်း – ဝႃႈၼႆ။
VPN ၼႆႉ ပဵၼ်ႁူဝ်ႉႁႄႉၵင်ႈပၼ် ၼင်ႇႁိုဝ် သိုၵ်းမၢၼ်ႈ တေဢမ်ႇၸၢင်ႈႁူႉလႆႈဝႃႈ ႁဝ်းမီးၶေႃႈမုလ်း သင်၊ ႁဝ်းယူႇတီႈလႂ်သေ ႁဵတ်းၵၢၼ်သင်ဝႆႉယူႇ ၸိူဝ်းၼႆႉ။ မိူဝ်ႈၾူၼ်းၵွႆလႄႈ ၵႂႃႇမႄးၾူၼ်းၵေႃႈ ႁႂ်ႈၾၢင်ႉလီလီ ၵူဝ်မီးၵူၼ်းလၵ်ႉဢဝ် မႅင်းဝႆႊရတ်ႊ Virus သႂ်ႇပၼ် ၼႂ်းၾူၼ်းႁဝ်းသေ ၶေႃႈမုလ်းမၼ်း ၸၢင်ႈႁူဝ်ႈ ငိုၼ်းၼႂ်းဢႅပ်ႊ ၼႂ်ႊၾူၼ်းႁဝ်းပိူၼ်ႈၸၢင်ႈလၵ်ႉဢဝ်ငၢႆႈၼႆ – ၽူႈႁဵတ်းၵၢၼ်ၾၢႆႇဢၢႆႊထီႊလၢတ်ႈ။
