ၶၢဝ်းတၢင်း 2 ဝၼ်းထပ်းၵၼ်မႃးၼႆႉ ၵူၼ်းၵျွၵ်ႉမႄး လူႉတၢႆၸွမ်း ၼႂ်းၵႄႈပၢင်တိုၵ်း သိုၵ်းတဢၢင်း TNLA တင်း သိုၵ်းမၢၼ်ႈ ယိုတ်းမိူင်း ဢမ်ႇယွမ်း 10 ယဝ်ႉ ဝႃႈၼႆ။
ဝၼ်းတီႈ 26/06/2024 ယၢမ်းဝၢႆးဝၼ်း မၢၵ်ႇလူင် တူၵ်းသႂ်ႇၵူၼ်းမိူင်း ပွၵ်ႉ 2 ယၢၼ်ႇၵျိၼ်း လူႉတၢႆထင်တီႈ 6 ၵေႃႉ ယဝ်ႉၵေႃႈ ပွၵ်ႉ 1 ၵေႃႉၼိုင်ႈ ၼၼ်ႉတႄႉ ၺႃးယိုဝ်းတၢႆ ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။
ၽူႈၸွႆႈထႅမ် ၼႂ်းၸုမ်းပရႁိတ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ -“ၶၢဝ်းတၢင်း 2 ဝၼ်းၼႆႉ ၵူၼ်းမိူင်းႁဝ်း ၺႃး ၸၢၵ်ႇမၢၵ်ႇၼႂ်းၵႄႈ ပၢင်တိုၵ်းၼႆႉ လူႉတၢႆၵႂႃႇ 11 ၵေႃႉယဝ်ႉ။ ၸွမ်းၼင်ႇ ႁဝ်းၶႃႈ လႆႈဝႆႉသဵၼ်ႈမၢႆ။ မိူဝ်ႈဝၼ်းတီႈ 25 ၼၼ်ႉ တီႈပွၵ်ႉ 8 လူႉတၢႆ ၵေႃႉၼိုင်ႈ၊ ပွၵ်ႉ 9 လူႉတၢႆ ၵေႃႉၼိုင်ႈ၊ တီႈဝၢၼ်ႈတွင်ၼဝ်ႈ 2 ၵေႃႉ။ ဝၼ်းတီႈ 26 ၼႆႉသမ်ႉ တီႈပွၵ်ႉ 2 ယၢၼ်ႇၵိၼ်း 6 ၵေႃႉလႄႈ ပွၵ်ႉ 1 ၵေႃႉၼိုင်ႈ ၼၼ်ႉတႄႉ ၺႃးယိုဝ်းတၢႆ ။ ဢၼ်မၢတ်ႇၸဵပ်း ဢမ်ႇယွမ်း 10 ၵေႃႉ” – ဝႃႈၼႆ။
ပၢင်တိုၵ်း ၶၢဝ်းတၢင်း 2 ဝၼ်းထပ်းၵၼ်မႃးၼႆႉ သိုၵ်းတဢၢင်း TNLA ယိုတ်းလႆႈ ဝဵင်းၵျွၵ်ႉမႄး ႁူဝ်ပၢၵ်ႇလႂ် 90% ယဝ်ႉ ယၢမ်းလဵဝ် ၵိုတ်းတီႈတပ်ႉ ၶမယ 501 တင်း 502 ဢၼ်မီးၼႂ်းၵႄႈၵျွၵ်ႉမႄး – မိူင်းငေႃႉၼၼ်ႉ ဝႃႈၼႆ။
ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ဝၼ်းတီႈ 26 ၼႆႉ သိုၵ်းလွႆၶဝ် သိမ်းလႆႈ မူတ်းယဝ်ႉ ၼႂ်းဝဵင်းၵျွၵ်ႉမႄး တီႈတပ်ႉၵွင်ႈလူင်၊ ႁူင်းယႃ ၸိူဝ်းၼႆႉ။ ထိုင်မႃး ယၢမ်းႁူဝ်ၶမ်ႈ 6 မူင်းပၢႆ ၶဝ်သိမ်းလႆႈထႅင်ႈ တီႈႁူင်းပလိၵ်ႈမၢၼ်ႈသေ သိုပ်ႇလေႃႇတိုၵ်း တပ်ႉသိုၵ်းမၢၼ်ႈ 501 – 502 ၼၼ်ႉ တင်းၶိုၼ်း တေႃႇထိုင်မွၵ်ႈ 12 မူင်းလိုၵ်း သဵင်ၵွင်ႈၸင်ႇယဵၼ်ဢေႃႈ။ မိူဝ်ႈၼႆႉ ၵၢင်ၼႂ် တႅၵ်ႇၸဵမ်ၸဝ်ႉၶႃႈ တၢင်းပွတ်း ပုၼ်ႉၵူၺ်း လႅပ်ႈၶဝ် ပႆႇသိမ်းလႆႈတပ်ႉၼၼ်ႉ။ မိူဝ်ႈလဵဝ် တီႈဝဵင်းၵျွၵ်ႉမႄးၼႆႉ သိုၵ်းလွႆၶဝ် သိမ်းလႆႈ 90% ယဝ်ႉ ၵိုတ်းတီႈတပ်ႉ 501-502 ၼၼ်ႉၵူၺ်းလႄႈ ပေႃးၶဝ်သိမ်းလႆႈ သွင်တပ်ႉၼၼ်ႉၵေႃႈ တီႈၵျွၵ်ႉမႄးၼႆႉ မၢႆထိုင်ဝႃႈ ၶဝ်သိမ်းလႆႈမူတ်းယဝ်ႉ”- ဝႃႈၼႆ။
ယၢမ်းလဵဝ် ၵူၼ်းဝဵင်းၵျွၵ်ႉမႄး ဢွၼ်ၵၼ်မႆႈၸႂ်ဝႆႉ သင်ဝႃႈ သိုၵ်းတဢၢင်း ယိုတ်းလႆႈ ဝဵင်းၵျွၵ်ႉမႄး မူတ်းယဝ်ႉၼႆၸိုင် ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ ႁၢဝ်ႈႁႅင်း ၼႆယဝ်ႉ။
“မိူဝ်ႈၼႆႉ ဝၼ်းတီႈ 27 ပၢင်တိုၵ်းတေပဵၼ်ႁၢဝ်ႈႁႅင်း လိူဝ်ၵဝ်ႇၶႃႈဢေႃႈ လႆႈငိၼ်းၵႂၢမ်းသိုပ်ႇၵႂၢမ်းမႃးတႄႉ ႁႂ်ႈၵူၼ်းမိူင်းၶၢႆႉဢွၵ်ႇဝဵင်းၼႆၶႃႈ။ ၶၢဝ်းတၢင်း2 ဝၼ်းမႃးၼႆႉ ႁဝ်းၶႃႈ ႁႃသဵၼ်ႈတၢင်းဢွၵ်ႇဝဵင်းယူႇၶႃႈ။ သင် ဝႃႈ သိုၵ်းလွႆ သိမ်းလႆႈဝဵင်းမူတ်းယဝ်ႉ သိုၵ်းမၢၼ်ႈ တေဢဝ်ၶိူင်ႈမိၼ် မႃးပွႆႇမၢၵ်ႇ ၼႂ်းဝဵင်းဢမ်ႇႁၢၼ်ႉ။ မိူဝ်ႈဝႃး – မိူဝ်ႈသိုၼ်းၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ်မႃးပၼ်ႇ တီႈၵျွၵ်ႉမႄးၼႆႉ 2 ဝၼ်းထပ်းၵၼ်ယဝ်ႉ”- ၵူၼ်း ပိုၼ်ႉတီႈ ဝဵင်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းမိူင်းၵျွၵ်ႉမႄး ဢွၼ်ၵၼ်ၵူဝ်မႆႈၸႂ် ဢမ်ႇမီးတီႈဢုၼ်ႇၸႂ်လႄႈ မၢင်ၸိူဝ်း ဢဝ်တူဝ်လွတ်ႈ ႁင်းၽႂ်မၼ်း ၸိူဝ်းမူၵ်းသွၼ်ႈဝႆႉၼႂ်းႁိူၼ်းယေး၊ ၸိူဝ်းပၢႆႈဢွၵ်ႇၵႂႃႇ ၼွၵ်ႈဝဵင်း၊ ၸိူဝ်းပၢႆႈၵႂႃႇ ႁႃပီႈၼွင်ႉ တၢင်းပူင်ႇပူဝ်း၊ တၢင်းၶၢႆးမွၼ် ၸိူဝ်းၼၼ်ႉၵေႃႈ မီးတင်းၼမ်ယဝ်ႉ။
“ၶၢဝ်းတၢင်း ပၢင်တိုၵ်း 2 ဝၼ်းထပ်းၵၼ်မႃးၼႆႉ ၵူၼ်းဝဵင်းၵျွၵ်ႉမႄး ဢွၼ်ၵၼ်ပၢႆႈၵႂႃႇႁူးၵူႈတၢင်း တီႈပၢင် သဝ်းၵူၼ်းပၢႆႈၽေး ၸွမ်းဝတ်ႉဝႃးသႃသိူဝ်ႇၼႆႉ ႁူဝ်ၵူၼ်း တေဢမ်ႇယွမ်း 500 ၵေႃႉယဝ်ႉ။ ၵူၼ်းမိူင်း ဢၼ် မႆႈၸႂ်သေ ၶၢႆႉဢွၵ်ႇဝဵင်းၼႆႉ ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ မိူၼ်တီႈဝဵင်းသႅၼ်ဝီၼၼ်ႉဢေႃႈ ”- ၽူႈၸွႆႈထႅမ် ၼႂ်းၸုမ်းပရႁိတ ဝဵင်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။
ယွၼ်ႉပၢင်တိုၵ်းၼႆႉသေ မိူဝ်ႈဝႃး ဝၼ်းတီႈ 26 သိုၵ်းမၢၼ်ႈ တီႈတပ်ႉၸၵၶ 1 ၵျွၵ်ႉမႄး ဝၢင်းၶိူင်ႈၸူး သိုၵ်းတဢၢင်း 17 ၵေႃႉ။ ယဝ်ႉၵေႃႈ ပၢင်တိုၵ်း ၶၢဝ်းတၢင်း 2 ဝၼ်းၼႆႉ တီႈၸႄႈဝဵင်းၵျွၵ်ႉမႄး၊ ၼွင်ၶဵဝ်၊ မိူင်းမိတ်ႈ၊ သီႇပေႃႉလႄႈ မိူင်းၵုတ်ႈ သိုၵ်းတဢၢင်း ယိုတ်းလႆႈတပ်ႉပၢင်သဝ်းသိုၵ်းမၢၼ်ႈ 24 ဢွင်ႈတီႈယဝ်ႉ – ၼႂ်းႁွင်ႈၵၢၼ် ပိုၼ်ၽၢဝ်ႇ တပ်ႉသိုၵ်းတဢၢင်း ဢွၵ်ႇဝႆႉၼင်ႇၼႆ။
