သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဝဵင်းၵျွၵ်ႉမႄး ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆထင်တီႈ 2 ၵေႃႉ မၢတ်ႇၸဵပ်း 10 ပၢႆ ႁဵတ်းႁႂ်ႈၵူၼ်းမိူင်းပၢႆႈၽေးသိုၵ်းထႅင်ႈ ၼပ်ႉႁူဝ်ပၢၵ်ႇ။
ဝၼ်းတီႈ 25/06/2024 တႄႇဢဝ်ယၢမ်းၵၢင်ၼႂ် 5 မူင်းပၢႆ တေႃႇထိုင်ႁူဝ်ၶမ်ႈ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၸွမ်းသၢပ်ႇဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းပွၵ်ႉ 8 ၽူႈ ၸၢႆးၵေႃႉၼိုင်ႈ လူႉတၢႆ ယဝ်ႉၵေႃႈ ပွၵ်ႉ 9 ၽူႈယိင်းၼိုင်ႈၵေႃႉ လိူဝ်ၼၼ်ႉ မၢတ်ႇၸဵပ်း 10 ပၢႆ ၼႆယဝ်ႉ။
ၽူႈၶဝ်ႈၸုမ်း ၸွႆႈထႅမ်ပရႁိတ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး တႄႇဢဝ်ယၢမ်းၵၢင်ၼႂ် ထိုင်ၵၢင်ဝၼ်း 12 မူင်းၼႆႉ ၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်း 4 ၵေႃႉ။ တႄႇဝၢႆးဝၼ်း ထိုင်ႁူဝ်ၶမ်ႈသမ်ႉ မၢတ်ႇၸဵပ်းထႅင်ႈ ႁူမ်ႈၵၼ် တေမီးမွၵ်ႈ 14 ၵေႃႉၼႆႉ။ ဢၼ်ၵူၼ်းမိူင်းလူႉတၢႆ မၢတ်ႇၸဵပ်း ၸိူဝ်းၼၼ်ႉသမ်ႉ တေပဵၼ်ၵူၼ်းပွၵ်ႉ 4 ပွၵ်ႉ 7 ပွၵ်ႉ 8 ပွၵ်ႉ 9 ၊ ဝၢၼ်ႈပၢင်ပဝ်း၊ ဝၢၼ်ႈၼႃးဢၢႆႈၶၢၼ်ႉ ယဝ်ႉၵေႃႈ ထႅင်ႈလၢႆတီႈ ယွၼ်ႉဝႃႈ တီႈၵျွၵ်ႉမႄးၼႆႉ မီးဝႆႉၸုမ်း ၸွႆႈထႅမ်လၢႆၸုမ်းလႄႈ ၽႄၵၼ်သေၵႂႃႇႁပ်ႉၶႃႈဢေႃႈ”- ဝႃႈၼႆ။
ၸၢၵ်ႇမၢၵ်ႇ ဢၼ်တိူဝ်ႉသႂ်ႇၵူၼ်းမိူင်း မိူဝ်ႈဝႃး ယၢမ်းႁူဝ်ၶမ်ႈၼႆႉသမ်ႉ ပဵၼ်လုၵ်ႈဢွၼ်ႇ ၵေႃႉၼိုင်ႈလႄႈ ၵူၼ်းလူင် 2 ၵေႃႉ။ ၼႂ်းၼၼ်ႉ လုၵ်ႈဢွၼ်ႇ ထုၵ်ႇၶႃႁၵ်းၶွၼ်ၼိုင်ႈ၊ ၵူၼ်းလူင်ၵေႃႉၼိုင်ႈ ထုၵ်ႇၶႃႁၵ်း သွင်ၶွၼ်လႄႈ ထႅင်ႈၵေႃႉၼိုင်ႈသမ်ႉ မၢတ်ႇၸဵပ်းႁႅင်း ၼႆယဝ်ႉ။
ယွၼ်ႉပၢင်တိုၵ်းၼႆႉသေ ႁဵတ်းႁႂ်ႈၵူၼ်းဝၢၼ်ႈမႂ်ႇၵွင်းမူး၊ ဝၢၼ်ႈပဵင်းၼိမ်၊ ဝၢၼ်ႈၵွင်းဢႅတ်ႇ၊ ဝၢၼ်ႈလူင်ဝၢႆ၊ ဝၢၼ်ႈလွႆၶေႃ၊ ဝၢၼ်ႈတွင်ၼဝ်ႈ၊ ဝၢၼ်ႈၼမ်ႉသေႃႉ ဢိၵ်ႇထႅင်ႈလၢႆဝၢၼ်ႈ လႆႈဢွၼ်ၵၼ်ပၢႆႈသွၼ်ႈဝႆႉ တီႈ ဝတ်ႉၼႃးပဵင်း 140 ပၢႆ ၊ ဝတ်ႉ ၶူဝ်ဢုင် 40 ပၢႆ ၊ ဝတ်ႉၸၶၢၼ်းသႃႇ မွၵ်ႈ 60 ၵေႃႉ၊ ဝတ်ႉၼွင်ပိင်ဢွၼ်ႇလႄႈ ဝတ်ႉႁူဝ်ဝဵင်း ၸိူဝ်းၼႆႉ ႁူဝ်ၵူၼ်းတင်းမူတ်း ဢမ်ႇယွမ်း 300 ၵေႃႉ ။ ယဝ်ႉၵေႃႈ ၸၢၵ်ႇမၢၵ်ႇ တိူဝ်ႉၺႃးႁိူၼ်း ယေး လူႉၵွႆၸွမ်းထႅင်ႈ။ လိူဝ်ၼၼ်ႉ တိူဝ်ႉၺႃးဝတ်ႉဝႃးၽႃသိူဝ်ႇ လူႉၵွႆၸွမ်းထႅင်ႈ တင်းၼမ် ၼႆယဝ်ႉ။
မိူဝ်ႈၼႆႉ ဝၼ်းတီႈ 26/06/2024 ယၢမ်းၵၢင်ၼႂ်မွၵ်ႈ 6 မူင်း သိုၵ်းတဢၢင်း TNLA ႁႅၼ်းသိုၵ်းလေႃႇတိုၵ်း တီႈႁူင်းပလိၵ်ႈမၢၼ်ႈလႄႈ တပ်ႉၵွင်ႈလူင် 352 သိုၵ်းမၢၼ်ႈထႅင်ႈ ႁၢဝ်ႈႁႅင်း တီႈဝဵင်းၵျွၵ်ႉမႄး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ