သိုၵ်းမၢၼ်ႈ ၾိုၵ်းပၼ်ၵၢၼ်သိုၵ်း ၸုပ်ႈႁႅၵ်ႈ ဢၼ်တႄႇမႃးမိူဝ်ႈလိူၼ်ဢေႊပရိူဝ်ႊၼၼ်ႉ တေယဝ်ႉတူဝ်ႈ ၼႂ်းလိူၼ် ၵျုၼ်ႊသဵင်ႈၼႆႉ မီးဢဵၼ်ႁႅင်းၵူၼ်းသိုၵ်းမႂ်ႇ မွၵ်ႈ 5,000 ၵေႃႉ ၵူၼ်းလူင်း ပၢင်သွၼ်ၸုပ်ႈႁႅၵ်ႈၼႆႉ တေတႄႇလႆႈၶဝ်ႈႁၢပ်ႇၵၢၼ် ၼႂ်းလၢႆႁွင်ႈၵၢၼ် ၼႂ်းတပ်ႉသိုၵ်းယဝ်ႉ – ၶၢဝ်ႇ AFP ဢွၵ်ႇဝႆႉၼင်ႇၼႆ။

ၵူၼ်းလူင်းပၢင်သွၼ်ၵၢၼ်သိုၵ်းမႂ်ႇ ၸိူဝ်းၼႆႉ တေလႆႈၵႂႃႇႁၢပ်ႇၵၢၼ်တီႈႁွင်ႈၵၢၼ်လၢႆလၢႆဢၼ် ၼႂ်းတပ်ႉသိုၵ်း ဝႃႈၼႆသေတႃႉ တေပဵၼ်ႁွင်ႈၵၢၼ်တီႈလႂ် တေသူင်ႇလၢႆၵေႃႉၸိူဝ်းၼႆႉတႄႉ သိုၵ်းမၢၼ်ႈ ပႆႇပိုၼ်ၽၢဝ်ႇတႅတ်ႈတေႃး – ဝႃႈၼႆ။

လိူဝ်ၼၼ်ႉ ၵူၼ်းမႂ်ႇ ဢၼ်တေမႃးၾိုၵ်းၵၢၼ်သိုၵ်းထႅင်ႈ တႃႇၸုပ်ႈ 3 ၵေႃႈ မီးဝႆႉသဵၼ်ႈၸိုဝ်ႈယဝ်ႉ 5,000 ၵေႃႉ။ ၵမ်ႈ ၽွင်ႈ ထိုင်ဝႆႉတီႈပၢင်သွၼ်ၵၢၼ်သိုၵ်းယဝ်ႉ ဝႃႈၼႆ။

ဝၢႆးလင် သိုၵ်းမၢၼ်ႈပိုၼ်ၽၢဝ်ႇ ႁွင်ႉၵူၼ်း ဢႃယု ၼႂ်းၵႄႈ18 ထိုင် 35 တႃႇႁဵတ်းသိုၵ်းယဝ်ႉၼႆႉ ၵူၼ်းၼုမ်ႇၼႂ်းမိူင်း ပႃး ၸဵမ်ယိင်းၸၢႆး ဢွၼ်ၵၼ်ဢွၵ်ႇပၢႆႈၵႂႃႇယူႇတၢင်ႇၸိုင်ႈမိူင်း မီးၼပ်ႉႁူဝ်မိုၼ်ႇၵေႃႉ။

သင်ၸိူဝ်ႉ ၽႂ်ၵေႃႉလႂ် ဢမ်ႇႁပ်ႉလိၵ်ႈမွၵ်ႇႁွင်ႉ တႃႇၾိုၵ်းၵၢၼ်သိုၵ်းမႃးၸိုင် တေၺႃးတူတ်ႈတၢမ်ႇတူၵ်းၶွၵ်ႈ သိုၵ်းမၢၼ်ႈ ပိုၼ်ၽၢဝ်ႇဝႆႉပႃးၼင်ႇၼႆ။

တီႈဝဵင်းလူင်တႃႈၵုင်ႈလႄႈ တၢင်ႇဝဵင်း တႃႇၾိုၵ်းၵၢၼ်သိုၵ်းၼႆသေ သိုၵ်းမၢၼ်ႈ လိုပ်ႈလမ်းတီႉၺွပ်း ၵူၼ်းၼုမ်ႇၼႂ်းဝဵင်း ယၢမ်းၵၢင်ၶမ်ႈၵၢင်ၶိုၼ်းလူးၵွၼ်ႇ ၵူၼ်းပိုၼ်ႉတီႈၵေႃႈ လၢတ်ႈဝႆႉတီႈသိုဝ်ႇၶၢဝ်ႇမၢၼ်ႈ MPA ၼင်ႇၼႆ။

ယၢမ်းလဵဝ် လွင်ႈၾိုၵ်းၵၢၼ်သိုၵ်း ၸုပ်ႈ 1 ထိုင် ၸုပ်ႈ 3 ၼႆႉ သိုၵ်းမၢၼ်ႈ ၵဵပ်းႁွင်ႉၵႂႃႇလုၵ်ႈဢွၼ်ႇၸၢႆး လၢႆလၢႆၵူၺ်းသေတႃႉၼႂ်းၸုပ်ႈထိ 5 ၼႆႉ တေဢဝ်ပႃးၼၢင်းယိင်းယဝ်ႉ ဝႃႈၼႆလႄႈ ၼၢင်းယိင်းဢွၼ်ႇ ၼႂ်းမိူင်းၵေႃႈ ဢွၼ်ၵၼ်ယုပ်း ၽၢၼ်ႈဝႆႉယူႇ – သိုဝ်ႇၶၢဝ်ႇတီႈ VOA ၵေႃႈ ပိုၼ်ၽၢဝ်ႇဝႆႉၼင်ႇၼႆ။