မိူဝ်ႈၼႆႉ ဝၼ်းတီႈ 25/06/2024 ယၢမ်းဝၢႆးဝၼ်း 2 မူင်းၶိုင်ႈ မၢၵ်ႇလူင်တူၵ်းသႂ်ႇ ႁၢၼ်ႉၶၢႆၸိူဝ်ႉၽၼ်းလႄႈ ၶိူင်ႈၸႂ်ႉတိုဝ်း ၼႂ်းသူၼ်ႁႆႈၼႃး တၢင်းၶဝ်ႈၵၢတ်ႇလူင် ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁၢၼ်ႉၼိုင်ႈ ၺႃးလူႉၵွႆလႅဝ်ၽႅဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၸုမ်းလႂ် ယိုဝ်းမႃးသႂ်ႇတႄႉ ဢမ်ႇႁူႉၶႃႈ မႃးတူၵ်းသႂ်ႇ ႁၢၼ်ႉၶၢႆၶူဝ်းၵုၼ်ႇ တၢင်းၶဝ်ႈၵၢတ်ႇလူင် လူႉၵွႆလင်ၼိုင်ႈၶႃႈ။ ပၢင်တိုၵ်းၼႆႉ ပဵၼ်တင်းဝၼ်း ၶႃႈဢေႃႈ။ ႁဝ်းၶႃႈတႄႉ ဢမ်ႇႁတ်းဢွၵ်ႇႁိူၼ်း ၵူဝ်ၶႃႈဢေႃႈ မႆႈၸႂ်ဝႃႈ ဢမ်ႇႁူႉ တေပဵၼ်ႁိုဝ်ထႅင်ႈ”- ဝႃႈၼႆ။

ပၢင်တိုၵ်း တီႈဝဵင်းၵျွၵ်ႉမႄႈၼႆႉ တႄႇဢဝ်ယၢမ်းၵၢင်ၼႂ် 5 မူင်းပၢႆ ႁၢၼ်ႉတေႃႇထိုင် ယၢမ်းဝၢႆးဝၼ်း 4 မူင်းပၢႆ သဵင်ၵွင်ႈၸင်ႇယဵၼ်လူင်း ၵမ်ႈၽွင်ႈ။ ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပိုတ်း ယိုဝ်းၵၼ် ႁၢဝ်ႈႁႅင်းလႄႈ ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင် ပိုတ်းယိုဝ်း ၶိူဝ်းယႂ်း ဝႃႈၼႆ။

“သဵင်ၵွင်ႈၼႆႉ တိုၵ်ႉယဵၼ်လူင်းၵႂႃႇ မိူဝ်ႈၵႆႈ ယၢမ်းဝၢႆးဝၼ်း 4 မူင်းပၢႆၼႆႉၵူၺ်း ၶဝ်ယိုဝ်းၵၼ်တင်းဝၼ်း ၶႃႈယဝ်ႉ။ ၸၢၵ်ႇမၢၵ်ႇ တိူဝ်ႉသႂ်ႇၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်း 3 ၵေႃႉ။ ၼႂ်းပိုၼ်ႉတီႈ ဢၼ်ၵူၼ်းမိူင်း တိူဝ်ႉၺႃးမၢတ်ႇၸဵပ်းဝႆႉထႅင်ႈၵေႃႈ မီးဢေႃႈ။ ၵူၺ်းၵႃႈ ပႆႇႁူႉႁူဝ်ယွႆႈမၼ်းၶႃႈ။ ယၢမ်းႁူဝ်ၶမ်ႈမွၵ်ႈ 5 မူင်းၼႆႉ သိုၵ်းမၢၼ်ႈ ဢဝ်ၶိူင်ႈမိၼ် လမ်းၼိုင်ႈ ပၼ်ႇလဵပ်ႈဝဵင်းဝႆႉၶႃႈဢေႃႈ”– ၵူၼ်းပိုၼ်ႉတီႈ ဝဵင်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ႁွတ်ႈထိုင်ဝႆႉ တီႈဝတ်ႉၼႃးပဵင်း မိူၼ်ၼင်ႇ ဝၢၼ်ႈၵွင်းဢႅတ်ႇ၊ မၢၼ်ႈမႂ်ႇ၊ မၢၼ်ႈၵွင်းမူး ၸိူဝ်းၼႆႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ၸိူဝ်းၼႆႉ။

တပ်ႉသိုၵ်းမၢၼ်ႈ ဢၼ်တူင်ႉၼိုင် ၵပ်းသဝ်းယူႇဝႆႉ တီႈဝဵင်းၵျွၵ်ႉမႄးၼႆႉသမ်ႉ မိူၼ်ၼင်ႇ – ၸၵၶ 1 ၊ ၶလယ 501 – 502 ၊ တပ်ႉၵွင်ႈလူင် (ဢမျွၵ်ႉတပ်ႉ) 352 လႄႈ တပ်ႉယႃ (သေးတပ်ႉ) ၸိူဝ်းၼႆႉ။

ၼႂ်းဝၼ်းမိူဝ်ႈၼႆႉ သဵင်ၵွင်ႈတႅၵ်ႇၼႂ်းၸႄႈဝဵင်းၼွင်ၶဵဝ် – သီႇပေႃႉ – ၵျွၵ်ႈမႄး – ၵူတ်ႉၶၢႆ ၸိူဝ်းၼႆႉ။