မိူဝ်ႈၼႆႉ ဝၼ်းတီႈ 25/06/2024 ယၢမ်းၵၢင်ၼႂ် 5 မူင်းပၢႆ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၸွမ်းသၢပ်ႇဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈ ပၢင်ပဝ်း၊ ပွၵ်ႉ 8 ၊ ပွၵ်ႉ 9 လႄႈ ဝၢၼ်ႈၼႃးဢၢႆႈၶၢၼ်ႉ ၸိူဝ်းၼႆႉ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်း လူႉတၢႆ 2 ၵေႃႉ မၢတ်ႇၸဵပ်း 3 ၵေႃႉ ဝႃႈၼႆ။
ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “တီႈဝၢၼ်ႈပၢင်ပဝ်းၼႆႉ ၸၢၵ်ႇမၢၵ်ႇတိူဝ်ႉၺႃး ၼၢင်းဢွမ်ငိုၼ်း ဢႃယု 14 ပီ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း။ တီႈပွၵ်ႉ 9 ၸၢၵ်ႇမၢၵ်ႇတိူဝ်ႉၺႃး တီႈၵွၵ်း ႁူဝ်ၼၢင်းယိင်းၵေႃႉၼိုင်ႈ လႆႈလူႉတၢႆထင်တီႈ။ တီႈပွၵ်ႉ 8 သမ်ႉ ၸၢၵ်ႇမၢၵ်ႇတိူဝ်ႉ ၽူးၸၢႆး ၵေႃႉၼိုင်ႈ လႆႈလူႉတၢႆထင်တီႈလႄႈ ထႅင်ႈၵေႃႉၼိုင်ႈသမ်ႉ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်း။ ယဝ်ႉၵေႃႈ တီႈဝၢၼ်ႈၼႃးဢၢႆႈၶၢၼ်ႉ လႆႈတိူဝ်ႉမၢတ်ႇၸဵပ်းထႅင်ႈၵေႃႉၼိုင်ႈ။ ယၢမ်းလဵဝ် ၵူၼ်းမၢတ်ႇၸဵပ်း ၸိူဝ်းၼႆႉ လႆႈသူင်ႇယူတ်းယႃဝႆႉ တီႈႁူင်းယႃၵျွၵ်ႉမႄးမူတ်းယဝ်ႉ”- ဝႃႈၼႆ။
ဢိင်ၼိူဝ် လွင်ႈမၢၵ်ႇလူင် တူၵ်းသႂ်ႇ ၵူၼ်းမိူင်းလႆႈလူႉတၢႆ မၢတ်ႇၸဵပ်းၵႂႃႇ ၸိူင်ႉၼႆၼႆႉ ပဵၼ်မၢၵ်ႇၸုမ်းလႂ် ယိုဝ်းမႃးတူၵ်းသႂ်ႇ ဢၼ်ဝႃႈၼၼ်ႉ ပႆႇႁူႉ။ ၵူၺ်းၵႃႈ တၢင်းၾၢႆႇသိုၵ်းမၢၼ်ႈတႄႉ ၸႂ်ႉမၢၵ်ႇလူင်ယိုဝ်း။ ၾၢႆႇသိုၵ်းတဢၢင်း TNLA သမ်ႉ ဢဝ်ႁိူၼ်းယေး ၵူၼ်းမိူင်း ႁဵတ်းႁူဝ်ႉသေ ပိုတ်းယိုဝ်း – ၵူၼ်းပိုၼ်ႉတီႈလၢတ်ႈ။
“တင်ႈတႄႇ ၶဝ်ပဵၼ်ပၢင်တိုၵ်းၵၼ်မႃး မိူဝ်ႈၵၢင်ၼႂ်ၼၼ်ႉသေ ႁၢၼ်ႉတေႃႇထိုင် ၵၢင်ဝၼ်း 12 မူင်းၼႆႉ သဵင်ၵွင်ႈယင်းပႆႇယဵၼ်။ ဢၼ်မၢတ်ႇၸဵပ်းလူႉတၢႆသမ်ႉ ပဵၼ်ၵူၼ်းမိူင်း။ ပၢင်တိုၵ်း ဢၼ်ၶဝ်ယိုဝ်းၵၼ်သမ်ႉ ၸွမ်းသၢပ်ႇဝဵင်း ၼႂ်းမူႇဝၢၼ်ႈ ၸိူဝ်းၼႆႉ ဢမ်ႇထုၵ်ႇလီပဵၼ်သေဢိတ်းၶႃႈ”- ဝႃႈၼႆ။
ယၢမ်းလဵဝ် ၵူၼ်းဝၢၼ်ႈၵွင်းဢႅတ်ႇ ႁူမ်ႈလူၺ်ႈ သင်ၶၸဝ်ႈ ဢွၼ်ၵၼ်ပၢႆႈမႃးသွၼ်ႈဝႆႉ တီႈဝတ်ႉၼႃးပဵင်း ႁူဝ်ၵူၼ်း ဢမ်ႇယွမ်း 70 ၵေႃႉ။ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ယွၼ်ႉမၢင်ၸိူဝ်းပၢႆႈမႃး ဢမ်ႇတၼ်းလႆႈၵိၼ်ယႅမ်ႉ ၶူဝ်းၶွင်သင်။ ယဝ်ႉၵေႃႈ ၵူၼ်းဝၢၼ်ႈမႂ်ႇ၊ ဝၢၼ်ႈလူင်ဝၢႆလႄႈ မူႇဝၢၼ်ႈ ၸိူဝ်းယူႇ ႁိမ်းႁွမ်းတပ်ႉသိုၵ်းမၢၼ်ႈ ဢွၼ်ၵၼ် ၽူင်ႉပၢႆႈဝႆႉ ၵူႈတီႈလႂ် ယၢမ်းလဵဝ် တင်းမူတ်းႁူဝ်ၼပ်ႉၵူၼ်း မီးၵႃႈႁိုဝ်ပႆႇႁူႉ ယွၼ်ႉငဝ်းလၢႆး တိုၵ်ႉပဵၼ်ၽွင်းသုၵ်ႉႁႅင်း – ၵူၼ်းၵျွၵ်ႉမႄးလၢတ်ႈ။
မိူဝ်ႈဝႃး ဝၼ်းတီႈ 24 ယၢမ်းၵၢင်ၶိုၼ်းလိုၵ်း မွၵ်ႈ 11 မူင်း ၼၼ်ႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် ၵျႅၵ်ႉၾၢႆႊ တႃႊ လမ်းၼိုင်ႈ မႃးပွႆႇမၢၵ်ႇသႂ်ႇ တီႈမိူင်းလူင် ၸႄႈဝဵင်းၵျွၵ်ႉမႄး ၸၢၵ်ႇမၢၵ်ႇတိူဝ်ႉၺႃး ၼၢင်းယိင်း လူႉတၢႆ ၵေႃႉၼိုင်ႈ မၢတ်ႇၸဵပ်း ၵေႃႉၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ