သဵင်ၵွင်ႈတႅၵ်ႇ ၼႂ်းဝဵင်းလွၵ်ႉၸွၵ်ႇထႅင်ႈ လိူၼ်ၵျုၼ်ႊၼႆႉၵူၺ်း သိုၵ်း SSPP တင်း RCSS ယိုဝ်းၵၼ် ဢမ်ႇယွမ်း 5 ပွၵ်ႈယဝ်ႉ – ၵူၼ်းပိုၼ်ႉတီႈလၢတ်ႈ။
ဝၼ်းတီႈ 24/06/2024 ယၢမ်းၵၢင်ၶိုၼ်း 10:20 မူင်း သဵင်ၵွင်ႈတႅၵ်ႇ တၢင်းၾၢႆႇဢွၵ်ႇဝဵင်းလွၵ်ႉၸွၵ်ႇ ၸိုင်ႈတႆး ပွတ်း ၸၢၼ်း ၶၢဝ်းတၢင်းႁိုင် 30 မိၼိတ်ႉ ၊ ၵူၼ်းမိူင်းတုၵ်း ယွၼ်းဝႃႈ ယွၼ်ႉပဵၼ်သိုၵ်းတႆးၼင်ႇၵၼ်လႄႈ ယႃႇႁႂ်ႈပိုတ်းယိုဝ်းၵၼ် ၊ ၶၢဝ်းၼႆႉသမ်ႉ ပဵၼ်ၶၢဝ်းၵူၼ်းမိူင်း ၽုၵ်ႇသွမ်ႈ လူဝ်ႇႁႃၵိၼ်လဵင်ႉတွင်ႉ- ဝႃႈၼႆ။
ၵူၼ်းပိုၼ်ႉတီႈ ဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်သိုၵ်းတႆးႁဝ်းၼင်ႇၵၼ် ယိုဝ်းၵၼ်ထႅင်ႈ ၶႃႈယဝ်ႉ။ မိူဝ်ႈၶမ်ႈဝႃးၼႆႉ လႆႈငိၼ်းသဵင်ၵွင်ႈသဵင်မၢၵ်ႇႁႅင်းၼႃႇ တၢင်းၾၢႆႇဢွၵ်ႇဝဵင်း ၸွမ်းသၼ်လွႆ ၸိူဝ်းၼၼ်ႉၶႃႈ ဢေႃႈ။ လႆႈငိၼ်းသဵင်ၵွင်ႈတႅၵ်ႇ တၢင်းႁိုင်မွၵ်ႈ 30 မိၼိတ်ႉၼႆႉ။ ယၢမ်းလဵဝ် ပဵၼ်ၶၢဝ်းၽုၵ်ႇသွမ်ႈလႄႈ ႁဵတ်းႁႂ်ႈၵူၼ်းမိူင်း ဢမ်ႇၸၢင်ႈၽုၵ်ႇၶဝ်ႈၵၢပ်ႇၵၼ်။ ယဝ်ႉၵေႃႈ တၢင်းဢိူင်ႇ ၵဵင်းၶမ်းၼၼ်ႉ ၵူၼ်းဝၢၼ်ႈ ပၢႆၺႃးႁၢမ်ႈဢွၵ်ႇဝၢၼ်ႈထႅင်ႈလူးၵွၼ်ႇ”- ဝႃႈၼႆ။
ဢိင်ၼိူဝ် လွင်ႈပၢင်တိုၵ်း တၢင်းၸႄႈဝဵင်းလွၵ်ႉၸွၵ်ႇၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူး ၽူႈၶၢၼ်ပၢၵ်ႇ တင်းသွင်ၾၢႆႇၵေႃႈ ဢမ်ႇလႆႈ။
“ၸူးၸႂ်ႁဝ်းၵူၼ်းမိူင်းတႄႉ ဢမ်ႇၶႂ်ႈႁႂ်ႈၶဝ်ယိုဝ်းၵၼ် ယွၼ်ႉပဵၼ်သိုၵ်းတႆးႁဝ်းၼင်ႇၵၼ်လႄႈ သင်ႁဝ်းႁူမ်ႈ ၵၼ်သေ ယိုဝ်းၽူႈၶဵၼ် သိုၵ်းမၢၼ်ႈတႄႉ တေၶႅမ်ႉၵႃႈႁိုဝ်ၼေႃ။ ပေႃးတူၺ်းလၢႆးႁဵတ်းၶဝ် သွင်ၸုမ်းဢၼ် ပဵၼ်ယူႇ တီႈဝဵင်းလွၵ်ႉ ၸွၵ်ႇၼႆႉ မၼ်းပဵၼ်ဝႆႉ ၵဝ်ၼႄးမႂ်း – မႂ်းၼႄးၵဝ် ၸိူင်ႉၼၼ်ဢေႃႈ။ ၶူဝ်းၶဵဝ်ဝႃႈ ၶူဝ်းလၢႆး ႁၢင်ႈၵၢင်မၢၵ်ႇသႂ်ႇၶဝ်။ ၶူဝ်းလၢႆးသမ်ႉဝႃႈ ၶူဝ်းၶဵဝ် ထူဝ်းသိုၵ်းၸူးၶဝ်လႄႈ လႆႈၵၢင်မၢၵ်ႇ။ ဢၼ်တုမ်ႉတိူဝ်ႉတႄႉ ၵူၼ်းမိူင်းဢေႃႈ ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉ”- ၵူၼ်းပိုၼ်ႉတီႈ ဝဵင်းလွၵ်ႉၸွၵ်ႇ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 19/06/2024 ယၢမ်းၵၢင်ၼႂ် 9 မူင်း သဵင်ၵွင်ႈတႅၵ်ႇ တၢင်းဢိူင်ႇၵဵင်းၶမ်း ၼႂ်းၵႄႈ ဢၢင်ႇတေႃး – ၵျွၵ်ႉၵူႇ ၸဵင်ႇႁွင်ႇဝၼ်းဢွၵ်ႇ ၸႄႈဝဵင်းလွၵ်ႉၸွၵ်ႇ ၼၼ်ႉၵေႃႈ ႁဵတ်းႁႂ်ႈၵူၼ်းဝၢၼ်ႈ ၸိူဝ်းၵႂႃႇၼွၼ်းပႂ်ႉၽုၵ်ႇၶဝ်ႈၵၢပ်ႇ ၼႂ်းႁႆႈသူၼ်ၸိူဝ်းၼၼ်ႉ ၼႅတ်ႈဢွၼ်ၵၼ် ပွၵ်ႈၶိုၼ်းႁိူၼ်းယေး ၽႂ်းမၼ်း ယွၼ်ႉ RCSS တင်း SSPP ယိုဝ်းၵၼ်။
ပူၼ်ႉမႃး မိူဝ်ႈဝၼ်းတီႈ 29/11/2023 ၼၼ်ႉ သိုၵ်း SSPP တင်း RCSS ႁူမ်ႈၵၼ် ပိုၼ်ၽၢဝ်ႇၵိုတ်းတိုၵ်း ၵၼ် ပဵၼ်တၢင်းၵၢၼ်မႃး ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉဝႃႈ – ၸွမ်းၼင်ႇ ၵၢင်ၸႂ်သင်ၶၸဝ်ႈလႄႈ ပေႃႈ မႄႈၵူၼ်းမိူင်း မုင်ႈမွင်း ႁႂ်ႈတပ်ႉသိုၵ်း (2) ၸုမ်း ၽွမ်ႉႁူမ်ႈၵၼ်မႃးပီယၢဝ်းၶၢဝ်းႁိုင်ၼၼ်ႉ ႁူဝ်ပဝ်ႈလူင် (2) ၸုမ်း မီးၶေႃႈၸီႉသင်ႇ မိူဝ်ႈပီ 2023 လိူၼ်ဢေႃႊၵတ်ႊသ် ဝၼ်းတီႈ 09 – 10 ၼၼ်ႉသေ လႆႈၵိုတ်းတိုၵ်း တေႃႇၵၼ်၊ လႆႈႁၢမ်ႈၵၢၼ်ဢဝ် (Media) သႄႉသွမ်း ႁဵတ်းႁႂ်ႈမီးလွင်ႈတုမ်ႉတိူဝ်ႉ ၵၢၼ်ၽွမ်ႉႁူမ်ႈ ၸိူဝ်ႉ ၸၢတ်ႈမိူဝ်းၼႃႈၼၼ်ႉ (2) ၸုမ်း လႆႈႁဵတ်းသၢင်ႈၸွမ်းၼင်ႇ ၶေႃႈၸီႉသင်ႇမႃး တေႃႇထိုင်ဝၼ်းမိူဝ်းၼႆႉ ဝႃႈၼႆ။
ၵွပ်ႈၼႆလႄႈ ထိုင်မႃး ဝၼ်းတီႈ 29/11/2023 ၸုမ်းတၢင်တူဝ်ငဝ်ႈငုၼ်း/ ငဝ်ႈၸိုင်ႈ ၾၢႆႇပႃႇတီႇမႂ်ႇသုင် ၸိုင်ႈ တႆး (3) ၵေႃႉ၊ ၾၢႆႇၶွင်ႇသီႇဢဝ်ၶိုၼ်း ၸိုင်ႈတႆး (4) ၵေႃႉ လႆႈႁူပ်ႉထူပ်းဢုပ်ႇဢူဝ်းၵၼ်သေ တူၵ်းလူင်းလႆး ၸႂ်ၵိုတ်းတိုၵ်းပဵၼ်တၢင်းၵၢၼ်ၵႂႃႇ ဝႃႈၼႆ။
ၼင်ႇႁိုဝ် သင်ၶၸဝ်ႈ ပေႃႈမႄႈၵူၼ်းမိူင်း ၽူႈၵွၼ်းတပ်ႉလႄႈ လုၵ်ႈတပ်ႉတင်းသဵင်ႈ တေလႆႈႁပ်ႉႁူႉၸွမ်း ၵၢၼ်ၵိုတ်းတိုၵ်း (2) ၸုမ်း SSPP လႄႈ RCSS ၼၼ်ႉ ၸင်ႇလႆႈႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ ၵိုတ်း တိုၵ်းမႃးၼင်ႇၼႆ။
ဢိင်ၼိူဝ်လွင်ႈၼႆႉ ၵူၼ်းမိူင်းၵမ်ႈၼမ် ထတ်းသၢင်ဝႃႈ ႁူမ်ႈၵၼ် ပိုၼ်ၽၢဝ်ႇ ၵိုတ်းတိုၵ်း လၢႆပွၵ်ႈၵေႃႈ မၼ်းဢမ်ႇမီးတီႈပွင်ႇသင် သင်ဝႃႈ ဢမ်ႇႁဵတ်းၸွမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ