မိူဝ်ႈၼႆႉ ဝၼ်းတီႈ 25/06/2024 ယၢမ်းၵၢင်ၼႂ် 5 မူင်းပၢႆ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၸွမ်းသၢပ်ႇဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင်ယိုဝ်းဢမ်ႇထၢတ်ႇ ဝႃႈၼႆ။

ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈတင်း သိုၵ်းလွႆ ယိုဝ်းၵၼ် ၸွမ်းသၢပ်ႇဝဵင်းၼႆႉ ႁၢဝ်ႈႁႅင်းတႄႉၶႃႈ ၵူၼ်းဝၢၼ်ႈ ၸိူဝ်းယူႇၸွမ်းႁိမ်းတပ်ႉသိုၵ်းမၢၼ်ႈၼၼ်ႉ ဢွၼ်ၵၼ်ပၢႆႈၶဝ်ႈဝဵင်းမူတ်းယဝ်ႉ။ မိူဝ်ႈယၢမ်းၸဝ်ႉၼႆႉ မၢၵ်ႇလူင် တူၵ်းသႂ်ႇ ၼႂ်းဝၢၼ်ႈလူင်ဝၢႆ ႁိမ်းဝဵင်းၼႆႉသေ ၸၢၵ်ႇမၢၵ်ႇ တိူဝ်ႉၺႃးၵူၼ်းဝၢၼ်ႈ ၵေႃႉၼိုင်ႈ ၼႆၶႃႈဢေႃႈ။ တီႈဝၢၼ်ႈၼၼ်ႉၵေႃႈ ၵူၼ်းဝၢၼ်ႈပၢႆႈဢွၵ်ႇမႃး မူတ်းယဝ်ႉၶႃႈ။ ယဝ်ႉၵေႃႈ မၢၵ်ႇလူင်တူၵ်းသႂ်ႇ တီႈၼႂ်းဝၢၼ်ႈၸေႃးတိၵုင်း 1 လုၵ်ႈ၊ တူၵ်းသႂ်ႇ တီႈပွၵ်ႉ 9 ထႅင်ႈ 1 လုၵ်ႈၶႃႈ”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်းၼႆႉသေ ယၢမ်းလဵဝ် ၵၢတ်ႇလူင်ဝဵင်းၵျွၵ်ႉမႄးၵေႃႈ လႆႈပိၵ်ႉဢိုတ်းဝႆႉ ယဝ်ႉၵေႃႈ ၸွမ်းၵၢင်ဝဵင်း ၼႂ်းၵိဝ်ႇ ၸိူဝ်းၼႆႉ ယဵၼ်သီႇမူတ်း ဢမ်ႇမီးၽႂ်ႁတ်းဢွၵ်ႇႁိူၼ်းယေးၵၼ် ၼႆယဝ်ႉ။

“တေႃႈလဵဝ် တီႈၼႂ်းဝဵင်းၵျွၵ်ႉမႄးၼႆႉ ယဵၼ်သီႇမူတ်းၶႃႈ။ ၵူၼ်းမိူင်းဢမ်ႇႁတ်းဢွၵ်ႇႁိူၼ်းယေး ၵႂႃႇတၢင်းလႂ် ဢွၼ်ၵၼ်ပိၵ်ႉဢိုတ်းၽၵ်းတူႁိူၼ်း မူၵ်းယူႇၼႂ်းႁိူၼ်းယေးၵၼ်ဝႆႉ ၸိူင်ႉၼၼ်ၶႃႈဢေႃႈ။ ၵၢတ်ႇလူင် ၵျွၵ်ႉမႄးၵေႃႈ လႆႈပိၵ်ႉဢိုတ်းဝႆႉဢေႃႈ”- ၵူၼ်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ မိူၼ်ၼင်ႇ ၽူႈႁၢပ်ႇၵၢၼ် လူင်ပွင်ၸိုင်ႈလႄႈ ၸိူဝ်းႁဵတ်း Non – CDM ဝႆႉ တီႈၼႂ်းၸႄႈဝဵင်း ၵျွၵ်ႉမႄး ၸိူဝ်းၼၼ်ႉၵေႃႈ ဢွၼ်ၵၼ်ငိူင်ႈပၢႆႈ ဢွၵ်ႇဝဵင်းဝႆႉၵေႃႈမီး ၵမ်ႈၽွင်ႈ – ၵူၼ်းပိုၼ်ႉတီႈလၢတ်ႈ။