ၸွမ်းၼင်ႇ ႁွင်ႈၵၢၼ်ၾၢႆႇၸတ်းၵၢၼ် ႁႅင်းၵၢၼ်မိူင်းထႆး – မၢၼ်ႈ ဢုပ်ႇဢူဝ်းငူပ်ႉငီႉၵၼ်ဝႃႈ တေပိုတ်ႇသုၼ် CI တီႈ ၼႃႈလုမ်းၽွင်းတၢင်မၢၼ်ႈ ဝဵင်းလူင်ၵုင်းထဵပ်ႈ (မိူင်းၵွၵ်ႇ) ၸိုင်ႈထႆး တီႈလဵဝ်ၵူၺ်းဝႃႈၼႆဝႆႉ ယွၼ်ႉမီးလွင်ႈလႅၵ်ႈလၢႆႈသေ ၼႂ်းသုၼ် CI (8) ဢွင်ႈတီႈၼၼ်ႈ ၶိုၼ်းပိုတ်ႇပၼ် 6 ဢွင်ႈတီႈ ၼႆယဝ်ႉ။

ဝၼ်းတီႈ 19/06/2024 ယူႇတီႈ လူင်ပွင်ၸိုင်ႈတင်းသွင်ၾၢႆႇသွင်ပႃႈ လႆႈၶိုၼ်းဢုပ်ႇဢူဝ်းၵၼ်ၵႂႃႇ ထႅင်ႈၵမ်ႉၼိုင်ႈသေ ၶိုၼ်းၸီႉသင်ႇ ပိုၼ်ၽၢဝ်ႇပိုတ်ႇသုၼ် CI ပၼ်ၶိုၼ်း 6 ဢွင်ႈတီႈ မိူၼ်ၼင်ႇ – ၸႄႈတွၼ်ႈသမုတ်ႇသႃၶွၼ်း၊ သမုတ်ႇပရႃးၵၢၼ်း၊ ၶျူၼ်းပူႊရီႊ၊ ပထုမ်းထၼီး၊ သူႇရၢတ်ႉထႃးၼီးလႄႈ ၵဵင်းမႂ်ႇ ၸိူဝ်းၼႆႉ တွၼ်ႈတႃႇ ၸႄႈတွၼ်ႈၼၶွၼ်းသဝၼ်လႄႈ သူင်ၶလႃ ၼၼ်ႉတႄႉ ယွၼ်ႉဝႃႈဢမ်ႇပေႃး မီးႁႅင်းၵၢၼ်လႄႈ လႆႈပိၵ်ႉဢိုတ်းၵႂႃႇယဝ်ႉ – သုၼ်ၶေႃႈမုလ်း ႁႅင်းၵၢၼ်ယၢၼ်မိူင်း (MIC) ဢၼ်ယူႇတီႈ မုလ်ၼိထိမႅပ်ႇ (MAP) ဢွၵ်ႇဝႆႉၼင်ႇၼႆ။

“တွၼ်ႈတႃႇႁႅင်းၵၢၼ် ၸိူဝ်းပႆႇလႆႈ ထတ်းထွင် (ၽိသုတ်ႇသၢၼ်သျၢတ်ႉ) ၼၼ်ႉ ႁႂ်ႈႁိပ်ႈၼႅတ်ႈၵႂႃႇ ၽႂ်းၽႂ်းသေၵမ်း။ ယွၼ်ႉဝႃႈသုၼ် CI တင်း 6 တီႈၼၼ်ႉၵေႃႈ ဢမ်ႇႁူႉဝႃႈ မိူဝ်ႈလႂ် တေသင်ႇဢိုတ်းၶိုၼ်းထႅင်ႈ ဢၼ်ဝႃႈၼၼ်ႉ ဢမ်ႇၸၢင်ႈလၢမ်းလႆႈ ဢမ်ႇၵုမ်းၵမ်လႆႈလႄႈ ႁိပ်ႈႁဵတ်းႁႂ်ႈယဝ်ႉၵၼ်သေၵမ်း”– သုၼ်ၶေႃႈမုလ်း ႁႅင်းၵၢၼ်ယၢၼ်မိူင်း (MIC) တိုၵ်းသူၼ်းၼင်ႇၼႆ။

ဢိင်ၼိူဝ် လွင်ႈပိုတ်ႇသုၼ် CI ၼႆႉ မိူဝ်ႈတႄႇမၼ်း ဢၼ်လႆႈပိုတ်ႇမႃး 8 ဢွင်ႈတီႈၼၼ်ႉ ၶိုၼ်းတေမႃးႁုပ်ႈၵၼ်သေ ပိုတ်ႇၶိုၼ်းဢွင်ႈတီႈလဵဝ် တီႈၼႃႈလုမ်းၽွင်းတၢင်မၢၼ်ႈ ဝဵင်းလူင်ၵုင်းထဵပ်ႈ တႄႇဢဝ် ဝၼ်းတီႈ 16/06/2024 ၼႆႉၵႂႃႇ ဢၢၼ်းဝႆႉၸိူင်ႉၼႆသေ ယွၼ်ႉမီးလွင်ႈလႅၵ်ႈလၢႆႈၶိုၼ်းလႄႈ ၸင်ႇၶိုၼ်းပိုတ်ႇပၼ် 6 ဢွင်ႈတီႈၼၼ်ႉၶိုၼ်း ၼႆယဝ်ႉ။  

ၸွမ်းၼင်ႇ ၶေႃႈတူၵ်းလူင်းၵၼ် သွင်ၸိုင်ႈမိူင်း ၵဵဝ်ႇၵပ်းသုၼ် CI မိူဝ်ႈဝၼ်းတီႈ 03/10/2023 ၼၼ်ႉသေ တီႈၼႂ်းမိူင်းထႆးၼၼ်ႉ လႆႈပိုတ်ႇသုၼ် CI တႃႇႁႅင်းၵၢၼ်မိူင်းႁူမ်ႈတုမ်မၢၼ်ႈမႃး တင်းမူတ်း 8 ဢွင်ႈတီႈ ၼႆယဝ်ႉ။  

ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ၶၢဝ်းတၢင်း 3 ပီပၢႆၼႆႉ ႁဵတ်းႁႂ်ႈဝၢၼ်ႈမိူင်းဢမ်ႇၼိမ်သဝ်း၊ ၵၢၼ်ပၢႆႈမၢၵ်ႈမီး တူၵ်းႁႅင်းသေ ၸဵမ်ၵူၼ်းမိူင်း/ ၵူၼ်းၼုမ်ႇ ၵမ်ႈၼမ် ဢွၼ်ၵၼ်ပၢႆႈၵႂႃႇႁဵတ်းၵၢၼ် မိူင်းထႆးၼမ်။ လိူဝ်ၼၼ်ႉ ဢၼ်ႁၢႆႉ ၸႃႉထႅင်ႈသမ်ႉ မိူဝ်ႈလိူၼ်မၢတ်ႊၶျ် 2024 ပူၼ်ႉမႃးၼႆႉ သိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇပိူင်ၵဵပ်းသိုၵ်းသေ ယိင်ႈၶႅၼ်း ႁဵတ်းႁႂ်ႈၵူၼ်းၼုမ်ႇ ပၢႆႈၵႂႃႇမိူင်းထႆး တိူဝ်းၼမ်မႃးထႅင်ႈ ၼႆယဝ်ႉ။