ၼႂ်းလိူၼ်ၵျုၼ်ႊၼႆႉ သဵင်ၵွင်ႈတႅၵ်ႇ တီႈဝဵင်းလွၵ်ႉၸွၵ်ႇ ဢမ်ႇယွမ်း 3-4 ပွၵ်ႈယဝ်ႉ ၵူၼ်းပိုၼ်ႉတီႈဝႃႈ ပဵၼ်သိုၵ်း RCSS တင်း SSPP ယိုဝ်းၵၼ် ဝႃႈၼႆ။

ဝၼ်းတီႈ 19/06/2024 ယၢမ်းၵၢင်ၼႂ် 9 မူင်း သဵင်ၵွင်ႈတႅၵ်ႇ တၢင်းဢိူင်ႇၵဵင်းၶမ်း ၼႂ်းၵႄႈဢၢင်ႇတေႃး – ၵျွၵ်ႉၵူႇ တၢင်း ၸဵင်ႇႁွင်ႇဝၼ်းဢွၵ်ႇ ၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းဝၢၼ်ႈ ၸိူဝ်းၵႂႃႇ ၼွၼ်းပႂ်ႉၽုၵ်ႇၶဝ်ႈၵၢပ်ႇ ၼႂ်းႁႆႈသူၼ်ၼႅတ်ႈဢွၼ်ၵၼ် ပွၵ်ႈၶိုၼ်းႁိူၼ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ဝၼ်းတီႈ 19 ၼႆႉ သဵင်ၵွင်ႈတႅၵ်ႇ လၢႆၵမ်းဢေႃႈ ၵၢင်ၼႂ် 9 မူင်း ၵမ်းၼိုင်ႈ။ ဝၢႆးဝၼ်းတေႃႇထိုင် ႁူဝ်ၶမ်ႈ ထႅင်ႈၵမ်းၼိုင်ႈၶႃႈ။ သဵင်မၢၵ်ႇၶဝ် ယိုဝ်းတေႃႇၵၼ်ၼၼ်ႉ လႆႈငိၼ်းလီၼႃႇ။ ပဵၼ်သိုၵ်းတႆးႁဝ်း သွင်ၸုမ်းယိုဝ်းၵၼ်ဢေႃႈ။ ၵူၼ်းဝၢၼ်ႈႁူၺ်း – ဝၢၼ်ႈၼမ်ႉလိၼ်း ဢၼ်ၵႂႃႇၼွၼ်းၽုၵ်ႇ ၶဝ်ႈၵၢပ်ႇၼႂ်းသူၼ်ၼၼ်ႉ လႆႈငိၼ်းသဵင်ၵွင်ႈတႅၵ်ႇသေ ၼႅတ်ႈလႅၼ်ႈပွၵ်ႈႁိူၼ်းၶႃႈဢေႃႈ”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းလွၵ်ႉၸွၵ်ႇၼႆႉ SSPP သမ်ႉ တူင်ႉၼိုင်ယူႇဝႆႉ ၸွမ်းဢိူင်ႇၵဵင်းၶမ်း၊ ဢိူင်ႇၼွင်လူင်။ RCSS သမ်ႉ တူင်ႉၼိုင်ယူႇဝႆႉ ၸွမ်းၵျွၵ်ႉၵူႇ၊ ဢၢင်ႇတေႃးလႄႈ သၢပ်ႇဝဵင်း ၸိူဝ်းၼႆႉ – ၵူၼ်းပိုၼ်ႉတီႈ လွၵ်ႉၸွၵ်ႇလၢတ်ႈ။

“ဢၼ်ၶဝ် သွင်ၸုမ်းယိုဝ်းၵၼ်ၼႆႉ ဢမ်ႇထုၵ်ႇလီပဵၼ်သေဢိတ်း တေႁဵတ်းႁႂ်ႈ ၵူၼ်းမိူင်းမိူဝ်ႇၸၢၼ်ႈသိုၵ်းတႆးထႅင်ႈၵူၺ်း။ ၶဝ်ၵဵပ်းသိုၵ်းသေ ဢဝ်ႁဝ်းတေႃႇႁဝ်း ယိုဝ်းၵၼ်ၶိုၼ်းၵူၺ်း ဝႃႈသိုဝ်ႈသိုဝ်ႈၵေႃႈ ဢမ်ႇလႆႈလွင်ႈ သေၸုမ်းၼၼ်ႉ ၶႃႈယဝ်ႉ။ ၼႂ်းလိူၼ်ၼႆႉၵူၺ်း ၶဝ်ယိုဝ်းၵၼ် 3-4 ပွၵ်ႈယဝ်ႉ”- ၵူၼ်းပိုၼ်ႉတီႈ ဝဵင်းလွၵ်ႉၸွၵ်ႇ သိုပ်ႇလၢတ်ႈၼႄၼင်ႇ ၼႆ။

ဢိင်ၼိူဝ် လွင်ႈသိုၵ်းတႆး သွင်ၸုမ်း ပိုတ်းယိုဝ်းၵၼ်ၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ်ပၢၵ်ႇ တင်းသွင်ၸုမ်းၵေႃႈ ဢမ်ႇလႆႈ။

မိူဝ်ႈဝၼ်းတီႈ 16 ယၢမ်းၵၢင်ၼႂ် 8 မူင်းပၢႆ သွင်ၾၢႆႇ ပဵၼ်ပၢင်တိုၵ်းၵၼ် တီႈဢိူင်ႇၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ မႃးယဝ်ႉ ၵမ်းၼိုင်ႈ။ ႁူဝ်လိူၼ်ၵျုၼ်ႊၼႆႉၵေႃႈ ၼၢင်းယိင်း ဢႃယု 29 ပီ ၵႂႃႇသူၼ်သေ ၶီႇရူတ်ႉၶိူင်ႈပွၵ်ႈမႃးႁိူၼ်း ယဵပ်ႇၺႃးမၢၵ်ႇမႅင်းတႅၵ်ႇသႂ်ႇ လႆႈတိူဝ်ႉမၢတ်ႇၸဵပ်းႁႅင်း တီႈဢိူင်ႇၵျွၵ်ႉၵူႇ ယၢမ်းလဵဝ် လႆႈသူင်ႇယူတ်းယႃဝႆႉတီႈ ဝဵင်းတူၼ်ႈတီး ပဵၼ်မၢၵ်ႇၽႂ်ႁၢင်ႈၵၢင်ဝႆႉတေႃႇၽႂ်တႄႉဢမ်ႇႁူႉ – ၵူၺ်းၵႃႈဢၼ်ယဵပ်ႇၺႃးမၢၵ်ႇသမ်ႉပဵၼ်ၵူၼ်းမိူင်းၵူၺ်း ၵူၼ်းလွၵ်ႉၸွၵ်ႇလၢတ်ႈထႅင်ႈၼင်ႇၼႆ။  

မိူဝ်ႈဝၼ်းတီႈ 12 ပူၼ်ႉမႃးၼႆႉ သဵင်ၵွင်ႈတႅၵ်ႇၼႂ်းၸႄႈဝဵင်းမိူင်းၵိုင် ၵူၼ်းပိုၼ်ႉတီႈဝႃႈ ပဵၼ်သိုၵ်း SSPP  လႄႈ RCSS  ပိုတ်းယိုဝ်းၵၼ် ၊ တၼ်းယိုဝ်းၵၼ် ႁိုင်မွၵ်ႈ 15 မိၼိတ်ႉသေ ယဵၼ်ၵႂႃႇ ဝႃႈၼႆ။

တွၼ်ႈတႃႇ ပၢင်တိုၵ်း ၼႂ်းၵႄႈသိုၵ်းတႆး သွင်ၸုမ်း တေဢမ်ႇၵိူတ်ႇၶိုၼ်ႈထႅင်ႈၼႆႉ မိူဝ်ႈဝၼ်းတီႈ 29/11/2023 ၼၼ်ႉ ယူႇတီႈ ၸုမ်းတၢင်တူဝ် ငဝ်ႈငုၼ်း/ ငဝ်ႈၸိုင်ႈ တင်းသွင်ၸုမ်း လႆႈႁူပ်ႉထူပ်းဢုပ်ႇဢူဝ်း တူၵ်းလူင်းလႆႈၸႂ်ၵၼ်သေ ပိုၼ်ၽၢဝ်ႇၵိုတ်းတိုၵ်းပဵၼ်တၢင်းၵၢၼ်ဝႆႉယူႇၵေႃႈ သွင်ၾၢႆႇဢမ်ႇႁဵတ်းၸွမ်းၶေႃႈတူၵ်းလူင်းၵၼ်။