မိူဝ်ႈၼႆႉ ဝၼ်းတီႈ 20/6/2024 ယၢမ်းၵၢင်ဝၼ်း 12 မူင်းပၢႆ မၢၵ်ႇတႅၵ်ႇသႂ်ႇ လုၵ်ႈဢွၼ်ႇ မၢတ်ႇၸဵပ်းႁၢဝ်ႈႁႅင်း 3 ၵေႃႉ တီႈပွၵ်ႉ 7 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “လုၵ်ႈဢွၼ်ႇ 3 ၵေႃႉၼၼ်ႉ ၼႂ်းလုၵ်ႈဢွၼ်ႇၸၢႆး ဢႃယု 14 ပီ ၵေႃႉၼိုင်ႈ ၵႂႃႇဢဝ်မၢၵ်ႇတီႈလႂ်မႃးလဵၼ်ႈတႄႉ ဢမ်ႇႁူႉလဵၼ်ႈၵႂႃႇလဵၼ်ႈမႃးသေ တႅၵ်ႇသႂ်ႇၶဝ်ဢေႃႈ။ ၵေႃႉဢၼ်ယိပ်းမၢၵ်ႇၼၼ်ႉတႄႉ မိုဝ်းလႅပ်ႈပုတ်းၵႂႃႇၶႃႈဢေႃႈ။ ထႅင်ႈ 2 ၵေႃႉၼၼ်ႉတႄႉ မၢတ်ႇၸဵပ်းၸွမ်း”- ဝႃႈၼႆ။
လုၵ်ႈဢွၼ်ႇ 3 ၵေႃႉ ဢၼ်မၢၵ်ႇတႅၵ်ႇသႂ်ႇၼႆႉ လုၵ်ႈဢွၼ်ႇၸၢႆး ဢႃယု 9 ၶူပ်ႇ ၵေႃႉၼိုင်ႈ ၊ ဢွၼ်ႇၸၢႆး ဢႃယု 14 ပီ ၵေႃႉ ၼိုင်ႈလႄႈ ဢွၼ်ႇယိင်း 5 ၶူပ်ႇ ၵေႃႉၼိုင်ႈ။ မၢၵ်ႇဢၼ်တႅၵ်ႇသႂ်ႇ လုၵ်ႈဢွၼ်ႇၼႆႉ ပဵၼ်မၢၵ်ႇၸုမ်းလႂ်တႄႉ ဢမ်ႇႁူႉဝႃႈ ၼႆ။
တင်ႈတႄႇ ၽႅၼ်ၵၢၼ်ယၼ်ႇသိုၵ်း 1027 ၼၼ်ႉမႃး ပၢင်တိုၵ်း ၼႂ်းမိူင်းတႆးပွတ်းႁွင်ႇ ပဵၼ်မႃးဢမ်ႇထၢတ်ႇ သဵင်ၵွင်ႈယဵၼ်တီႈၼိုင်ႈ တႅၵ်ႇတီႈၼိုင်ႈ ႁဵတ်းၼၼ်သေ မိူၼ်ၼင်ႇ တၢင်းဝဵင်းၵူတ်ႉၶၢႆ ၊ ၼမ်ႉတူႈ ၊ ၼွင်ၶဵဝ်၊ မိူင်းၵုတ်ႈ ၸိူဝ်းၼႆႉ သိုၵ်းမၢၼ်ႈ ယိုတ်းမိူင်းတင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တိုၵ်ႉ သိုပ်ႇပဵၼ်ပၢင်တိုၵ်းၵၼ်ယူႇ ဝႃႈၼႆ။
ဝၢႆးၽႅၼ်ၵၢၼ်ယၼ်ႇသိုၵ်း 1027 မႃးၼႆႉ ၵူၼ်းမိူင်းတႆး ပွတ်းႁွင်ႇ ထူပ်းၽေးလွင်ႈယဵပ်ႇၺႃးမၢၵ်ႇမႅင်းၾင်လိၼ် ထိုင်တီႈလူႉတၢႆမၢတ်ႇၸဵပ်း တိၼ်ပုတ်း ၸိူဝ်းၼႆႉမႃး ၶႂ်ႈဝႃႈမီးၵူႈလိူၼ်ယဝ်ႉ ဝႃႈၼႆ။
မိူဝ်ႈဝၼ်းတီႈ 15/06/2024 ယၢမ်းဝၢႆးဝၼ်း ပႃႈၼၢင်းမျႃႉတၢၼ်း ဢႃယု 50 ပၢႆ ၵႂႃႇတီႇသူၼ်မၼ်းၼၢင်း ဢၼ်မီးၾၢႆႇ ၼႃႈတပ်ႉသိုၵ်းမၢၼ်ႈ ၶလယ 240 တီႈဝၢၼ်ႈပၢင်ၸူင် ဢိူင်ႇပဵင်းသႃႇ ၸႄႈဝဵင်းသႅၼ်ဝီ ၼၼ်ႉၵေႃႈ ယဵပ်ႇၺႃးမၢၵ်ႇမႅင်းၾင်လိၼ် တႅၵ်ႇသႂ်ႇတီႈၶႃမၼ်းၼၢင်း လႆႈပုတ်းပႅတ်ႈ တင်းသွင်ၶွၼ် ယွၼ်ႉမၢတ်ႇၸဵပ်းႁႅင်း လိူတ်ႈဢွၵ်ႇၼမ်သေ လႆႈလူႉတၢႆၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ