ၶွမ်ႊမတီႊလႅၼ်လိၼ်ထႆး – မၢၼ်ႈ ႁူပ်ႉထူပ်းဢုပ်ႇဢူဝ်းၵၼ် တႃႇသၢင်ႈလွင်ႈမိုတ်ႈၵိုဝ်းၸမ်ၸႂ်လႄႈ ႁူမ်ႈၵၼ် ၵႄႈလိတ်ႈပၼ်ႁႃ ၸွမ်းလႅၼ်လိၼ် တင်းသွင်ၸိုင်ႈမိူင်းၵႂႃႇ ဝႃႈၼႆ။

ဝၼ်းတီႈ 18/06/2024 ယၢမ်းၵၢင်ၼႂ် 8 မူင်းၶိုင်ႈ သိုဝ်ႇၶၢဝ်ႇ Maesaiperss ပိုၼ်ၽၢဝ်ႇဝႃႈ ၶွမ်ႊမတီႊလႅၼ်လိၼ်ထႆး – မၢၼ်ႈ ဢၼ်မီးၸဝ်ႈသိုၵ်းလူင် ၼထီႊ ထိမ်ႊသဵၼ်ႊ ၾၢႆႇထႆးလႄႈ တင်းၸဝ်ႈသိုၵ်း ဢွင်ႇလိၼ်းဢူး ၾၢႆႇမၢၼ်ႈ ဢွၼ် ဢဝ် ၶွမ်ႊမတီႊလႅၼ်လိၼ်တင်းသွင်ၾၢႆႇ ႁူပ်ႉဢုပ်ႇၵၼ် တီႈႁူင်းႁႅမ်း 1G1 ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။

ၼႂ်းပၢင်ၵုမ်ၼၼ်ႉ ဢုပ်ႇဢူဝ်းၵၼ်လၢႆလွင်ႈ မိူၼ်ၼင်ႇ – တႃႇၵႄႈလိတ်ႈပၼ်ႁႃ သွင်ၸိုင်ႈမိူင်း ႁူမ်ႈၵၼ်၊ လွင်ႈၵူၼ်းထႆး ၶဝ်ႈမႃးႁဵတ်းၵၢၼ် ၼႂ်းမိူင်းမၢၼ်ႈ ဢမ်ႇပဵၼ်တၢင်းၵၢၼ်၊ လွင်ႈတေတင်ႈၶိူင်ႈၸၢၵ်ႈတႅၵ်ႈ ၼမ်ႉထူမ်ႈ ၼႂ်းမႄႈၼမ်ႉသၢႆ ၊ လွင်ႈရူတ်ႉၵႃးၵိုတ်းၶမ် ၸွမ်းတၢင်းၶဝ်ႈဢွၵ်ႇလၢၼ်ႇမႄႈသၢႆ – တႃႈၶီႈလဵၵ်းလႄႈ လွင်ႈၼိမ်သဝ်း တင်းသွင်ၾင်ႇ ၸိုင်ႈမိူင်း ၸိူဝ်းၼႆႉ – ဝႃႈၼႆ။

ယဝ်ႉၵေႃႈ တီႈၼႂ်းပၢင်ၵုမ်ၼၼ်ႉ မီးလွင်းထတ်းသၢင်ၶိုၼ်း လွင်ႈသွင်ၸိုင်ႈမိူင်း ႁူမ်ႈမိုဝ်းၵၼ်သေ ၵႄႈလိတ်ႈပၼ်ႁႃမႃး လွင်ႈၾႆးပႃႇလႄႈ မွၵ်ႇၶႂၼ်း ပဵၼ်ဢၼ်ၶႅမ်ႉလႅပ်ႈယဝ်ႉတူဝ်ႈၵႂႃႇလီငၢမ်း ၸိူဝ်းၼႆႉ။

ဢိင်ၼိူဝ် လွင်ႈပၢင်ၵုမ်ၼႆႉသေ ႁဵတ်းႁႂ်ႈမိူင်းထႆးတင်း မိူင်းမၢၼ်ႈ မီးလွင်ႈမိုတ်ႈၵိုဝ်းၸမ်ၸႂ် ၼႅၼ်ႈၼႃမႃးထႅင်ႈ ဝႃႈၼႆ။