ၵူၼ်းသႅၼ်ဝီ ၽူႈယိင်း ဢႃယု 50 ပၢႆ ၵေႃႉၼိုင်ႈ ၵႂႃႇၽဵဝ်ႈသူၼ်သေ ယဵပ်ႇၺႃးမၢၵ်ႇမႅင်းၾင်လိၼ် တႅၵ်ႇတိူဝ်ႉသႂ်ႇ ထိုင်တီႈၶႃပုတ်းတင်းသွင်ၶွၼ် လႆႈမၢတ်ႇၸဵပ်းႁႅင်းသေ လူႉတၢႆၵႂႃႇ ဝႃႈၼႆ။
ဝၼ်းတီႈ 15/06/2024 ယၢမ်းဝၢႆးဝၼ်း ပႃႈၼၢင်းမျႃႉတၢၼ်း ဢႃယု 50 ပၢႆ ၵႂႃႇတီႇသူၼ်မၼ်းၼၢင်း ဢၼ်မီးၾၢႆႇၼႃႈတပ်ႉသိုၵ်းမၢၼ်ႈ ၶလယ 240 တီႈဝၢၼ်ႈပၢင်ၸူင် ဢိူင်ႇပဵင်းသႃႇ ၸႄႈဝဵင်းသႅၼ်ဝီ ၸႄႈတွၼ်ႈ လႃႈသဵဝ်ႈ ၸိုင်ႈတႆးပွတ်းႁွင်ႇ ယဵပ်ႇၺႃးမၢၵ်ႇမႅင်းၾင်လိၼ် တႅၵ်ႇသႂ်ႇ တီႈၶႃမၼ်းၼၢင်း လႆႈပုတ်း ပႅတ်ႈ တင်းသွင်ၶွၼ် ယွၼ်ႉမၢတ်ႇၸဵပ်းႁႅင်း လိူတ်ႈဢွၵ်ႇၼမ်သေ လႆႈလူႉတၢႆၵႂႃႇ ၼႆယဝ်ႉ။
ၵူၼ်းဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်း ၵႂႃႇၽဵဝ်ႈသူၼ်သေ ယဵပ်ႇၺႃးမၢၵ်ႇမႅင်းၾင်လိၼ်ၶႃႈ ဢေႃႈ။ ဢွင်ႈတီႈဢၼ်ယဵပ်ႇၺႃးၼၼ်ႉ ပဵၼ်တီႈသူၼ်မၼ်းၼၢင်း တၢင်းၾၢႆႇၼႃႈတပ်ႉသိုၵ်းမၢၼ်ႈ 240 ၼၼ်ႉၶႃႈ။ ၶႃမၼ်းၼၢင်း လႆႈပုတ်းပႅတ်ႈတင်းသွင်ၶွၼ်သေ လႆႈလူႉသဵင်ႈၵႂႃႇၶႃႈဢေႃႈ”- ဝႃႈၼႆ။
ပႃႈၼၢင်းမျႃႉတၢၼ်း ဢႃယု 50 ပၢႆၼႆႉ ပဵၼ်ၵူၼ်းဝၢၼ်ႈပၢင်ၸူင် ဢိူင်ႇပဵင်းသႃႇ ၼႆယဝ်ႉ။
မိူဝ်ႈဝၼ်းတီႈ 14/05/2024 ယၢမ်းၵၢင်ၼႂ်မွၵ်ႈ 10 မူင်း ၸၢႆးသၢႆလႅင်း ဢႃယု 31 ပီ ၵႂႃႇၽဵဝ်ႈသူၼ်သေ ယဵပ်ႇၺႃးမၢၵ်ႇမႅင်းတႅၵ်ႇသႂ်ႇ တီႈဝၢၼ်ႈႁူဝ်တႃႈ ဢိူင်ႇၵွင်းႁေႃ ၼၼ်ႉၵေႃႈ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ထိုင်တီႈလႆႈသူင်ႇယူတ်းယႃတူဝ် တီႈႁူင်းယႃ ဝဵင်းၵုၼ်လူင်။
တႄႇဢဝ် လိူၼ်ဢေႊပရိူဝ်ႊ – လိူၼ်မေႊ ႁၢၼ်ႉတေႃႇထိုင် လိူၼ်ၵျုၼ်ႊၼႆႉ ၵူၼ်းမိူင်းသႅၼ်ဝီ ယဵပ်ႇၺႃး မၢၵ်ႇမႅင်းၾင်လိၼ် တႅၵ်ႇတိူဝ်ႉသႂ်ႇ 8 ၵေႃႉယဝ်ႉ။ ၼႂ်းၼၼ်ႉ လူႉတၢႆ 3 ၵေႃႉ မၢတ်ႇၸဵပ်း 5 ၵေႃႉ ယဝ်ႉၵေႃႈ တႅၵ်ႇတိူဝ်ႉသႂ်ႇ ၵႂၢႆးလူႉတၢႆ တူဝ်ၼိုင်ႈ ၸွမ်းၼင်ႇ – ၸုမ်းၶၢဝ်ႇၽူႈတွႆႇႁွၵ်ႈ လႆႈၵဵပ်းသဵၼ်ႈမၢႆဝႆႉ ၼင်ႇၼႆ။
မိူၼ်ၼႆ ၼင်ႇၵဝ်ႇ တီႈဝဵင်းမူႇၸေႊၵေႃႈ မိူဝ်ႈဝၼ်းတီႈ 07/06/2024 ၼၼ်ႉ ၵူၼ်းမၢၼ်ႈတူင်ႈၶၢၼ်ႊၼိူဝ် ၼၼ်ႉၵေႃႈ ၵႂႃႇထႆၼႃးသေ ယဵပ်ႇၺႃးမၢၵ်ႇမႅင်းၾင်လိၼ် တႅၵ်ႇသႂ်ႇ ၸၢၵ်ႇမၢၵ်ႇတိူဝ်ႉၺႃး မၢၵ်ႇတႃ မၼ်းၸၢႆး ဢိတ်းဢွတ်းလႄႈ ၸွမ်းတူဝ် ၵမ်ႈၽွင်ႈ။
မိူဝ်ႈလိူၼ်မေႊ ပူၼ်ႉမႃးၼၼ်ႉၵေႃႈ ၽူႈၸၢႆး ဢႃယု 30 ပီ ၵေႃႉၼိုင်ႈ ၵႂႃႇႁႃၽိုၼ်းသေ ယဵပ်ႇၺႃးမၢၵ်ႇမႅင်းၾင်လိၼ် တီႈႁိမ်းဝၢၼ်ႈဝဵင်းၼၢင်း ၼႂ်းၸႄႈဝဵင်းမူႇၸေႊ ၼၼ်ႉၵေႃႈ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်းသေ လႆႈသူင်ႇယူတ်းယႃတူဝ် တီႈႁူင်းယႃ။
ၼႂ်းႁူဝ်ပီ 2024 ၼႆႉၵူၺ်း ၵူၼ်းမိူင်းၼႂ်းၸႄႈဝဵင်းမူႇၸေႊ ယဵပ်ႇၺႃးမၢၵ်ႇမႅင်းၾင်လိၼ် ဢမ်ႇယွမ်း 16 ၵေႃႉယဝ်ႉ။ ဝၢႆးပၢင်ယၼ်ႇသိုၵ်း 1027 မႃးၼႆႉ မိူၼ်ၼင်ႇ ၼႂ်းဝဵင်းၼမ်ႉၶမ်း၊ ဝဵင်းမူႇၸေႊ၊ ဝဵင်းသႅၼ်ဝီလႄႈ ဝဵင်းသီႇပေႃႉ ၸိူဝ်းၼႆႉ ၵႆႉလႆႈငိၼ်းၵူၼ်းမိူင်း ၵႂႃႇယဵပ်ႇၺႃးမၢၵ်ႇမႅင်းၾင်လိၼ် ၶႂ်ႈဝႃႈမီးၵူႈလိူၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ