သိုၵ်းမၢၼ်ႈ တေႃႉၵူၼ်းပႅၵ်ႇၼႃႈ မွၵ်ႈပၢၵ်ႇ သူင်ႇဝႆႉၼႂ်းၵႄႈၼမ်ႉၶမ်း – မူႇၸေႊ  

သိုၵ်းမၢၼ်ႈ တီႉၺွပ်းၵူၼ်းသူႇသမ်းၵိၼ်ယႃႈမဝ်းၵမ် ၼႂ်းဝဵင်းမူႇၸေႊ မွၵ်ႈပၢၵ်ႇ ၵႂႃႇပွႆႇဝႆႉ တီႈသဵၼ်ႈတၢင်းလူင် ၼႂ်း ၵႄႈၼမ်ႉၶမ်း – မူႇၸေႊ ႁဵတ်းႁႂ်ႈၵူၼ်းပိုၼ်ႉတီႈမႆႈၸႂ် လွင်ႈႁူမ်ႇလူမ်ႈ။

ဝၼ်းတီႈ 17/06/2024 ယၢမ်းဝၢႆးဝၼ်း သိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉ ႁူမ်ႈၵၼ်သေ တီႉၺွပ်း ၵူၼ်းသူႇသမ်းယႃႈမဝ်းၵမ် တၢင်းပႃႇႁဵဝ်ႇမူႇၸေႊ၊ မၢၼ်ႈဝဵင်း၊ ၸွၼ်ႊၸူဝ်ႇလႄႈ ဝဵင်းၼၢင်း ၸိူဝ်းၼႆႉ သႂ်ႇၵႃးတၢင်ႇသၢႆး 2 လမ်းသေ ၵႂႃႇပွႆႇဝႆႉ ၸွမ်းတၢင်းလူင် ၼႂ်းၵႄႈၼမ်ႉၶမ်း – မူႇၸေႊ ၼႆယဝ်ႉ။

ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈတင်း ပျီႇတူႉၸိတ်ႉ ႁူမ်ႈၵၼ်သေ တီႉၺွပ်းၵူၼ်းသူႇသမ်းယႃႈမဝ်းၵမ်မွၵ်ႈ 100 ၼႂ်းဝဵင်းမူႇၸေႊသေ သႂ်ႇၵႃးတၢင်ႇသၢႆး 2 လမ်း ၵႂႃႇပွႆႇပႅတ်ႈ ၸွမ်းမၢၼ်ႈတိုင်းလူင်၊ ၸေႊလၢၼ်ႉ၊ ၵွင်းထူဝ်ႇလိၼ် ၼႂ်းၵႄႈၼမ်ႉၶမ်း – မူႇၸေႊ ၸိူဝ်းၼၼ်ႉၶႃႈဢေႃႈ။ ၵႃးတၢင်ႇသၢႆး 1 လမ်းလႂ် ၶဝ်တၢင်ႇၵူၼ်း မွၵ်ႈ 50 ၼႆႉ။ ယဝ်ႉၵေႃႈ သိုၵ်းမၢၼ်ႈ – ပျီႇတူႉၸိတ်ႉ ၸိူဝ်းၼႆႉ ၶီႇၵႃးသေ ၸွမ်းသူင်ႇပၼ်ထႅင်ႈ ဢမ်ႇယွမ်း 4-5 လမ်းၶႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ၵႂႃႇပွႆႇတူဝ်ၵူၼ်းသူႇသမ်းယႃႈမဝ်းၵမ်ၼႆႉသေ ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ်ၸွမ်း ဢမ်ႇပဵၼ်လပ်းပဵၼ်ၼွၼ်း ယွၼ်ႉၵူဝ်ပဵၼ်ၽူႈလၵ်ႉၸၵ်ႉၶုတ်ႈ ဝႃႈၼႆ။  

“မိူဝ်ႈၶမ်ႈဝႃးၼႆႉ ၵူၼ်းဝၢၼ်ႈၵူၼ်းၼုမ်ႇ လႆႈလိုပ်ႈႁေႃႈတင်းၶမ်ႈၶႃႈဢေႃႈ ႁိူဝ်ႉတင်းၶမ်ႈၶႃႈယဝ်ႉ ၵူဝ်ပဵၼ်ၽူႈလၵ်ႉ ၵူၼ်းၸူၼ်ဢေႃႈ ၵွပ်ႈၼႆ လႆႈလိုပ်ႈဢွၵ်ႇဝၢၼ်ႈ။ ၵူၺ်းၵႃႈ ဢမ်ႇၸၢင်ႈလိုပ်ႈၵႂႃႇတၢင်းလႂ် ၶမ်ႈဝႃးၶဝ်သွၼ်ႈၼွၼ်းၼႂ်းထဵင်ၼႃးၵေႃႈမီး မၢင်ၸိူဝ်း လုၺ်းၼမ်ႉၶၢမ်ႈၵေႃႈမီးဢေႃႈ။ မိူဝ်ႈၼႆႉ မိူင်းလႅင်း ၸိူဝ်းၵိုတ်းၼွၼ်းဝႆႉ ၸွမ်းထဵင်ၼႃး ၸိူဝ်းၼၼ်ႉတႄႉ ၸင်ႇႁႂ်ႈၶဝ်ၶၢႆႉဢွၵ်ႇၵႂႃႇၶႃႈဢေႃႈ”- ၵူၼ်းဝဵင်းမူႇၸေႊ သိုပ်ႇလၢတ်ႈ ၼႄၼင်ႇၼႆ။

ၵူၼ်းသူႇသမ်းယႃႈမဝ်းၵမ် ဢၼ်သိုၵ်းမၢၼ်ႈ တၢင်ႇၵႃးၵႂႃႇပွႆႇပႅတ်ႈၼၼ်ႉ ၵမ်ႈၼမ် ပဵၼ်ၵူၼ်းတၢင်ႇတီႈသီႇလႅၼ် မႃးႁဵတ်းၵၢၼ်တီႈမူႇၸေႊသေ တိတ်းၸပ်းယႃႈမဝ်းၵမ် ၸိူင်ႉၼၼ်ၵူၺ်း ဢၼ်ဝႃႈ ပဵၼ်ၵူၼ်းၸႃႇတိ ဝဵင်းမူႇၸေႊတႄႉ ဢမ်ႇမီး။ ၵွပ်ႈၼႆလႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ် လႆႈပဵၼ်ၵၢၼ်ယၢပ်ႇၽိုတ်ႇၸွမ်း။ ၵဵဝ်ႇၵပ်းလွင်ႈၼႆႉ သိုၵ်းမၢၼ်ႈ ဢမ်ႇထုၵ်ႇလီမႃးပွႆႇပႅတ်ႈၸိူင်ႉၼႆ သင်ပဵၼ်လႆႈ ႁႂ်ႈသူင်ႇတူဝ် ပွၵ်ႈၶိုၼ်းဝဵင်းၽႂ်မၼ်း – ၵူၼ်းပိုၼ်ႉတီႈ တုၵ်းယွၼ်းလၢတ်ႈ ၼႄၼင်ႇၼႆ။

ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ ယဝ်ႉၵေႃႈ ပဵၼ်ဝဵင်းၵႃႉၶၢႆၵေႃႈၸႂ်ႈလႄႈ ၵူၼ်းတၢင်ႇတီႈသီႇလႅၼ် မႃးႁဵတ်းၵၢၼ်ၵေႃႈၼမ်။ ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ၶၢဝ်းတၢင်း 3 ပီပၢႆၼႆႉ ႁဵတ်းႁႂ်ႈၽူႈလၵ်ႉ ၸၵ်ႉၶုတ်ႈ လိူင်ႇၼမ်ႁႅင်း။ ပၢင်တေႃႇလွင်းၵေႃႈ ထၢင်ႇႁၢင်ႈပိုတ်ႇၼမ်မႃးထႅင်ႈသေ ႁဵတ်းႁႂ်ႈ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်။ ၼႂ်းလိူၼ်ၵျုၼ်ႊၼႆႉ ၵူၼ်းမူႇၸေႊ ၺႃးၸူၼ်ၼႂ်းႁိူၼ်း၊ ၼႂ်းႁၢၼ်ႉ၊ ၸူၼ်ရူတ်ႉၶိူင်ႈ ၸွမ်းတၢင်းလႄႈ ၺႃးတီႉၺွပ်းဢဝ်ပဵၼ်တူဝ်ယိူဝ်ႇ (ပြန်ပေးဆွဲ) မႃး ၸိူင်ႉၼႆၼႆႉ ဢမ်ႇယွမ်း 5 ပွၵ်ႈ ဝႃႈၼႆ။