သိုၵ်းမၢၼ်ႈ ယိုတ်းမိူင်း တင်ႈလၢၼ်ႇပႂ်ႉၸွမ်းတၢင်းသေ တဵၵ်းယွၼ်းငိုၼ်း ၸဝ်ႈရူတ်ႉၵႃး ၵူၼ်းမိူင်းၵႂႃႇမႃး ၼိူဝ်သဵၼ်ႈတၢင်းလူင် မိူင်းယႆ – ၵေးသီး ႁၢဝ်ႈႁႅင်း ၵႃးၼိုင်ႈလမ်းလႂ် လႆႈပၼ်ၼပ်ႉႁူဝ်မိုၼ်ႇပျႃး။

တႄႇဢဝ် ႁၢင်လိူၼ်မေႊ 2024 ၼႆႉမႃး သိုၵ်းမၢၼ်ႈ ယိုတ်းမိူင်း တင်ႈလၢၼ်ႇ ၼိူဝ်သဵၼ်ႈတၢင်းလူင် တီႈ တၢင်းၽႄ မိူင်းယႆ – မိူင်းႁႃႉ – ၵေးသီး ၼႂ်းၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇသေ ၵူတ်ႇထတ်းၸႅတ်ႈထၢမ် ၵူၺ်းဢမ်ႇၵႃး တဵၵ်းယွၼ်းငိုၼ်းပႃးထႅင်ႈ ၵႃး 1 လမ်း လႆႈပၼ်ဢမ်ႇယွမ်းမိုၼ်ႇ ရူတ်ႉၶိူင်ႈသမ်ႉ ဢမ်ႇယွမ်း 1,000 ပျႃး ၼႆယဝ်ႉ။

ၵူၼ်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶႃႈဢေႃႈ ၶဝ်ပႂ်ႉၸွမ်းတၢင်းသေ ၵူတ်ႇထတ်း တဵၵ်း ယွၼ်းငိုၼ်းၸဝ်ႈၵႃးၵႂႃႇမႃး ႁၢဝ်ႈႁႅင်းၼႆႉ ၵႃးၼိုင်ႈလမ်း ၶဝ်ယွၼ်းၼပ်ႉႁူဝ်မိုၼ်ႇမၼ်းၵမ်းလဵဝ်ၶႃႈ။ လမ်းလႄႈလမ်း ၶဝ်ယွၼ်းငိုၼ်း ဢမ်ႇမိူၼ်ၵၼ်ၶႃႈ။ ရူတ်ႉၶိူင်ႈၵေႃႈ ယွၼ်းဢေႃႈ ၼိုင်ႈလမ်းလႂ် ၼပ်ႉႁူဝ် ႁဵင်ပျႃးၶႃႈ။ ရူတ်ႉၵႃး ၵူၼ်းပိုၼ်ႉတီႈၵေႃႈ ၶဝ်ဢမ်ႇဝႆႉ ဢဝ်မူတ်း။ မိူၼ်ၼင်ႇ ၵူၼ်းမိူင်းႁႃႉ မႃးသိုဝ်ႉၶူဝ်း ၵုၼ်ႇ တီႈဝဵင်းသေ ပွၵ်ႈမိူဝ်းၵေႃႈ လႆႈသႂ်ႇပၼ်။ ၵႂႃႇၵေႃႈပၼ် မႃးၵေႃႈပၼ် ၼၼ်ႉၶႃႈယဝ်ႉ။ လိူဝ်ၸႂ်တႄႉ ဢေႃႈ ဢၼ်ၶဝ်ယွၼ်းငိုၼ်းၵူတ်ႇထတ်းၸိူင်ႉၼႆ”- ဝႃႈၼႆ။

တီႈဝဵင်းမိူင်းယႆၼႆႉ တေမီးတပ်ႉသိုၵ်းမၢၼ်ႈ ပၵ်းသဝ်းဝႆႉ မိူၼ်ၼင်ႇ – တပ်ႉၶမယ 325 ၊ ၶလယ 67 လႄႈ တပ်ႉၵွင်ႈလူင် (22) တီႈဝၢၼ်ႈၽႅတ်ႈ ၸိူဝ်းၼႆႉ။

“တပ်ႉသိုၵ်းမၢၼ်ႈ ၸိူဝ်းၼႆႉၶႃႈယဝ်ႉ ဢၼ်ပႂ်ႉၵူတ်ႉထတ်းယွၼ်းငိုၼ်းၸဝ်ႈၵႃး ၵူၼ်းမိူင်းၵႂႃႇမႃးႁၢဝ်ႈႁႅင်း ၼႆႉ ၶဝ်တေထၢမ်ၵႂႃႇလႂ်မႃး၊ တေၵႂႃႇတီႈလႂ်။ ဢၼ်ၶဝ်မႃးပႂ်ႉသေ ၵူတ်ႇထတ်းယွၼ်းငိုၼ်း ၸိူင်ႉၼႆၼႆႉ မီး မႃးၶၢဝ်းတၢင်း ၽၢၵ်ႇလိူၼ်ယဝ်ႉ။ ၵူႈပွၵ်ႈဢမ်ႇမီးၶႃႈ။ ႁဝ်းၶႃႈ ၵူၼ်းမိူင်းတႄႉ တုၵ်းယွၼ်းၶဝ်ၶၢႆႉဢေႃႈ ဢမ်ႇၼၼ်ႉ ႁႂ်ႈပူတ်းပႅတ်ႈၶႃႈဢေႃႈ လွင်ႈၶဝ်ပႂ်ႉၵူတ်ႇထတ်းယွၼ်းငိုၼ်း ၸိူင်ႉၼႆၼႆႉ”- ၵူၼ်းမိူင်းယႆ သိုပ်ႇ လၢတ်ႈၼႄၼင်ႇၼႆ။

လိူဝ်သေ တီႈတၢင်းၽႄၼႆႉယဝ်ႉ မိူၼ်ၼင်ႇ တီႈႁူဝ်ၶူဝ်ၼမ်ႉႁႃႉ ဝဵင်းမိူင်းယႆသေ ၵႂႃႇတၢင်းမိူင်းၵၢဝ် – တၢင်ႉယၢၼ်း ၼၼ်ႉၵေႃႈ သိုၵ်းမၢၼ်ႈ ယိုတ်းမိူင်း ပႂ်ႉၵူတ်ႇထတ်းယွၼ်းငိုၼ်း ႁၢဝ်ႈႁႅင်းမိူၼ်ၵၼ် ဝႃႈၼႆ။

တီႈဝဵင်းမိူင်းယႆၼႆႉ လိူဝ်သေ သိုၵ်းမၢၼ်ႈယဝ်ႉ မိူၼ်ၼင်ႇ တပ်ႉသိုၵ်းတႆး SSPP လႄႈ ၸုမ်းပျီႇတူႉၸိတ်ႉ မိူင်းႁႃႉ ဢၼ်ပဵၼ် ၸဝ်ႈသိုၵ်း လၢဝ်းမႃး (ႁွင်ႉ) ပူဝ်ႇလၢဝ်းမႃး ဢွၼ်ႁူဝ် ၸိူဝ်းၼႆႉၵေႃႈ တူင်ႉၼိုင်ဝႆႉ ဝႃႈၼႆ။